Magdiretso sa kaundan

Magdiretso sa listahan sang kaundan

Matapos Bala Ini nga Kalibutan?

Matapos Bala Ini nga Kalibutan?

Mahimo nabatian mo na nga may ginasiling ang Biblia nga katapusan sang kalibutan. (1 Juan 2:17) Buot bala silingon nga maubos ang tanan nga tawo sa duta? Maguba bala ang planeta nga Duta ukon mangin planeta na lamang bala ini nga wala na sing kabuhi?

INDI ANG SABAT SANG BIBLIA SA SINI NGA MGA PAMANGKOT!

Ano ang Mabilin?

ANG MGA TAWO

Ang ginasiling sang Biblia: Ang Dios “wala nagtuga [sang duta] sa wala sing pulos, kundi nagbuhat sini agod puy-an.” —ISAIAS 45:18.

ANG PLANETA NGA DUTA

Ang ginasiling sang Biblia: “Ang isa ka kaliwatan nagataliwan kag ang isa ka kaliwatan nagaabot; apang ang duta nagapabilin tubtob sa wala sing katubtuban.”—MANUGWALI 1:4.

ANG BUOT SILINGON SINI: Ginasugid sang Biblia nga indi gid maguba ang duta kag may magaistar gid sa sini pirme. Ti, ano ang buot silingon sang katapusan sang kalibutan?

BINAGBINAGA: Ginpaanggid sang Biblia ang malapit na lang matabo nga katapusan sang kalibutan sa natabo sang panahon ni Noe. Sadto nga tion, ang duta ‘puno sang kasingki’ ukon kapintas. (Genesis 6:13) Pero matarong nga tawo si Noe. Gani ginluwas sang Dios si Noe kag ang iya pamilya sang ginlaglag sang Dios ang malain nga mga tawo paagi sa baha. Parte sa natabo sadto nga panahon, ang Biblia nagsiling: “Ang kalibutan sadto nalaglag sa baha.” (2 Pedro 3:6) Amo sina ang katapusan sang kalibutan sadto nga tion. Pero ano ang nalaglag ukon natapos? Indi ang duta, kundi ang malain nga mga tawo nga nagaistar sa duta. Gani kon may ginasugid ang Biblia parte sa katapusan sang kalibutan, indi buot silingon sini nga maguba ang planeta nga Duta. Kundi buot silingon sini nga laglagon sang Dios ang malain nga mga tawo kag ang tanan nga sistema nga ila ginhimo.

 Ano ang Matapos?

PROBLEMA KAG KALAINAN

Ang ginasiling sang Biblia: “Sa indi na lang madugay, madula na ang mga malauton; pangitaon mo sila sa ila nahamtangan, kag wala na sila didto. Apang ang mga mahagop magapanubli sang duta, kag mangin malipayon gid sila sa bugana nga paghidait.” —SALMO 37:10, 11.

ANG BUOT SILINGON SINI: Bisan pa ginlaglag sang Dios ang malain nga mga tawo paagi sa Baha sang panahon ni Noe, wala nadula sing bug-os ang kalainan. Pagkatapos sang Baha, may malain liwat nga mga tawo nga nagpabudlay sa kabuhi sang iban. Pero sa indi na lang madugay dulaon sang Dios ang tanan nga kalainan. Pareho sa ginsiling sang manunulat sang Salmo: “Madula na ang mga malauton.” Tapuson sang Dios ang kalainan paagi sa iya Ginharian. Ini nga Ginharian isa ka gobierno sa langit nga magagahom sa bilog nga duta. Gamhan sini ang mga tawo nga nagatuman sa Dios.

BINAGBINAGA: Suportahan bala sang mga lider sang kalibutan subong ang Ginharian sang Dios? Indi. Ginasugid sang Biblia nga kontrahon nila ang Ginharian sang Dios. (Salmo 2:2) Ano dayon ang matabo? Buslan sang Ginharian sang Dios ang tanan nga gobierno sang tawo, kag “ini lamang ang magapabilin sing dayon.” (Daniel 2:44) Pero ngaa kinahanglan tapuson ang paggahom sang tawo?

 KINAHANGLAN—Tapuson ang Paggahom sang Tawo

Ang ginasiling sang Biblia: “Wala sing ikasarang ang tawo sa pagtuytoy sang iya tikang.”—JEREMIAS 10:23.

ANG BUOT SILINGON SINI: Wala gintuga ang mga tawo para gamhan ang pareho nila nga tawo. Gani sang ginhimo nila ini, indi gid maayo ang resulta kag wala nila nasolbar ang ila mga problema.

BINAGBINAGA: Suno sa Britannica Academic, ang sarisari nga gobierno sa bilog nga kalibutan daw indi gid “makasolbar sang mga problema pareho sang kapigaduhon, gutom, balatian, kalamidad, kag inaway ukon iban pa nga kapintas.” Nagsiling pa ini: “Ang iban . . . nagapati nga masolusyunan lamang ini nga mga problema kon isa na lang ang gobierno sa bilog nga kalibutan.” Pero, bisan pa maghiusa ang tanan nga gobierno sa kalibutan, indi gihapon perpekto nga mga tawo ang magagahom sa sini, amo nga indi nila masolbar ang mga problema sa kalibutan. Ang Ginharian sang Dios amo lamang ang gobierno nga makadula sing bug-os sang tanan nga problema sa kalibutan.

Ginatudlo sang Biblia nga ang katapusan sang kalibutan ukon sang malain nga sistema sang kalibutan subong, indi dapat pagkahadlukan sang maayo nga mga tawo. Sa baylo, isa ini ka makalilipay nga paglaum para sa aton kay buslan na sang matahom nga bag-ong kalibutan sang Dios ining guba kag daan na nga kalibutan!

San-o ina matabo? Isugid sang masunod nga artikulo ang sabat sang Biblia.