Magdiretso sa kaundan

Magdiretso sa listahan sang kaundan

Ano ang Himuon Mo Para Makaistar Ka sa Bag-ong Kalibutan?

Ano ang Himuon Mo Para Makaistar Ka sa Bag-ong Kalibutan?

Ginbinagbinag naton sa nagligad nga mga artikulo, nga sa indi na lang madugay tapuson sang Dios ang korap nga sistema sini nga kalibutan, pati na ang tanan nga problema sini. Makasalig kita nga matabo gid ini. Ngaa? Bangod ang Pulong sang Dios, ang Biblia, nagpromisa:

“Ang kalibutan nagataliwan.”—1 JUAN 2:17.

Makasalig kita nga may mga maluwas kay ini man nga bersikulo sa Biblia nagapromisa:

“Ang isa nga nagahimo sang kabubut-on sang Dios nagapabilin sing dayon.”

Gani kon gusto naton maluwas, dapat naton himuon ang kabubut-on sang Dios. Kag para mabal-an naton kon ano ang kabubut-on sang Dios, dapat anay naton sia makilala.

KILALAHA ANG DIOS PARA MALUWAS

Si Jesus nagsiling: “Ini nagakahulugan sang kabuhi nga wala sing katapusan, ang pagkilala nila sa imo, ang lamang matuod nga Dios.” (Juan 17:3) Para maluwas kita kag mabuhi sing wala katapusan, dapat naton ‘kilalahon’ ang Dios. Indi lang ini basta pagpati sa Dios ukon may pila lang kita ka butang nga nahibaluan parte sa iya. Dapat naton sia mangin abyan. Para magbakod ang aton relasyon sa aton mga abyan, dapat may tion kita para sa ila. Gani, dapat may tion man kita sa Dios para mangin suod kita sa iya. Binagbinaga ang pila ka kamatuoran nga matun-an naton sa Biblia nga makabulig para mangin abyan naton ang Dios. Ini nga mga kamatuoran makabulig man sa aton nga indi maguba ang aton pagpakig-abyan sa iya.

 BASAHA ANG PULONG SANG DIOS, ANG BIBLIA, KADA ADLAW

Ang pagpangamuyo nga buligan ka sang Dios kag ang paghimo sang iya kabubut-on, makabulig sa imo nga maluwas sa katapusan sang kalibutan

Regular kita nga nagakaon para mabuhi kita. Pero si Jesus nagsiling: “Ang tawo indi sa tinapay lamang mabuhi kundi sa tagsa ka pulong nga nagagua sa baba ni Jehova.”—Mateo 4:4.

Subong, mabasa naton ang mga pulong ni Jehova sa Biblia. Kon tun-an mo ining sagrado nga libro, matun-an mo kon ano ang ginhimo sang Dios sang una, kon ano ang iya ginahimo subong, kag kon ano ang iya himuon sa palaabuton.

MANGAMUYO SA DIOS NGA BULIGAN KA

Kon gusto mo tumanon ang Dios, dapat mo untatan ang paghimo sing mga butang nga ginsiling niya nga sala. Pero mahimo mabudlayan ka. Kon amo sina ang imo sitwasyon, ano ang dapat mo himuon? Makabulig gid kon makilala mo sing maayo ang Dios.

Binagbinaga ang isa ka babayi nga tawgon naton nga si Sakura. Imoral ang iya pagkabuhi. Sang nagtuon sia sing Biblia, natun-an niya ang sugo sang Dios nga ‘magpalagyo sa seksuwal nga imoralidad.’ (1 Corinto 6:18) Nangamuyo si Sakura sa Dios nga buligan sia nga mauntatan ang malain niya nga ginahimo. Pero kinahanglan niya gihapon batuan ang paghimo sing imoral. “Kon makapamensar gani ako sing imoral,” siling niya, “nagapangamuyo ako kay Jehova kag ginasugid ko sa iya ang tanan, kay kabalo ’ko nga indi ko ’ni masarangan nga ako lang. Nakabulig sa akon ang pangamuyo nga mangin malapit pa gid kay Jehova.” Pareho kay Sakura, minilyon man ka tawo ang nagapanikasog nga makilala ang Dios. Ginabuligan niya sila nga mabag-o ang ila kabuhi para mahimo nila ang mga butang nga makapahalipay sa iya.—Filipos 4:13.

Kon mas makilala mo pa gid ang Dios, ‘kilalahon ka man sang Dios’ bilang iya pinalangga nga abyan. (Galacia 4:9; Salmo 25:14) Dayon, mahimo ka maluwas kag makaistar sa bag-ong kalibutan sang Dios. Pero ano ang mangin sitwasyon sa sinang bag-ong kalibutan? Sabton ini sa masunod nga artikulo.

^ par. 15 Jehova ang ngalan sang Dios suno sa Biblia.