Magdiretso sa kaundan

Magdiretso sa listahan sang kaundan

Ano ang Himuon sang Ginharian sang Dios?

Ano ang Himuon sang Ginharian sang Dios?

Gintudluan ni Jesus ang iya mga disipulo nga ipangamuyo ang pagkari sang Ginharian. Kabalo sia nga indi gusto sang Dios ang malain nga nagakatabo sa duta kag ang Ginharian sang Dios amo lamang ang gobierno nga makasolbar sini. Ano ang himuon sang Ginharian sang Dios?

ANO NA ANG NAHIMO SANG GINHARIAN SANG DIOS?

Sa nagligad nga artikulo, ginbinagbinag naton ang tanda nga ginhatag ni Jesus. Ini nga tanda pamatuod nga natukod na ang Ginharian sang Dios sa langit kag si Jesucristo amo ang Hari.

Ang Biblia nagasiling nga kon maggahom na si Jesus bilang Hari sang Ginharian, palayason niya si Satanas kag ang iya mga demonyo sa langit. Ang duta na lang ang ila mahalitan, kag amo ini ang isa sa mga rason kon ngaa malala na gid ang sitwasyon sugod sang 1914.—Bugna 12:7, 9.

Bisan pa nagalala na gid ang sitwasyon sang kalibutan, si Jesus, nga Hari sang Ginharian sang Dios, may ginahimo para buligan ang mga tawo sa bilog nga duta. Bilang katumanan sang tagna ni Jesus, madamo subong sa bilog nga kalibutan ang nagatuon kag nagasunod sang mga prinsipio sang Biblia sa ila kabuhi. (Isaias 2:2-4) Natun-an sang minilyon ka tawo kon paano mangin balanse sa ila pagtamod sa ila obra, kon paano mangin malipayon ang ila pamilya, kag kon paano ma-enjoy ang materyal nga mga butang pero wala nagapaulipon sa sini. Subong, ini nga mga tawo nagabenepisyo na sa ila natun-an kag nangin mga klase sang tawo nga gusto sang Dios nga mangin sakop sang iya Ginharian.

 ANO ANG MASUNOD NGA HIMUON SANG GINHARIAN SANG DIOS?

Bisan pa nagagahom na si Jesus sa langit, ginagamhan gihapon sang mga tawo ang duta. Pero, ginsilingan sang Dios si Jesus: “Maggahom ka sa tunga sang imo mga kaaway.” (Salmo 110:2) Sa indi madugay, laglagon sang bug-os ni Jesus ang tanan nga nagapamatok kag paumpawan ang mga gusto magsunod sa Dios.

Sa sina nga tion, manghikot ang Ginharian sang Dios para

  • Laglagon ang butig nga relihion. Dulaon na ang mga relihion nga nagtudlo sing kabutigan parte sa Dios kag nagpabudlay sa mga tawo. Ginalaragway sang Biblia ang butig nga relihion bilang makihilawason nga babayi. Madamo nga tawo ang makibot sa kalaglagan sang butig nga relihion.—Bugna 17:15, 16.

  • Tapuson ang paggahom sang tawo. Manghikot ang Ginharian sang Dios para tapuson ang paggahom sang tawo.—Bugna 19:15, 17, 18.

  • Laglagon ang malain nga mga tawo. Ano ang himuon sang Ginharian sang Dios sa mga hungod nga nagahimo sing malain kag wala nagatuman sa Dios? “Ang mga malauton utdon sa duta.”—Hulubaton 2:22.

  • Laglagon si Satanas kag ang iya mga demonyo. Si Satanas kag ang iya mga demonyo indi na ‘makapatalang pa sa mga pungsod.’—Bugna 20:3, 10.

Ano ang buot silingon sini sa mga nagapasakop sa Ginharian sang Dios?

 ANO ANG HIMUON SANG GINHARIAN SANG DIOS PARA SA KATAWHAN?

Bilang Hari sa langit, mas madamo sang himuon si Jesus sangsa nahimo sang mga manuggahom nga tawo. Buligan sia sang 144,000 nga kaupod niya nga magagahom, nga ginpili halin sa katawhan. (Bugna 5:9, 10; 14:1, 3) Siguraduhon niya nga matuman ang kabubut-on sang Dios diri sa duta. Ano ang himuon sang Ginharian sang Dios para sa mga tawo?

  • Dulaon ang balatian kag kamatayon. “Wala sing pumuluyo nga magasiling: ‘Nagamasakit ako,’” kag “wala na sing kamatayon.”—Isaias 33:24; Bugna 21:4.

  • Siguraduhon nga may matuod nga paghidait kag kalig-unan. ‘Mangin bugana ang paghidait sang imo mga anak,’ kag “magapungko ang kada isa sa ila sa idalom sang ila puno sang ubas kag sa idalom sang ila kahoy nga higuera, kag wala sing magapahadlok sa ila.”—Isaias 54:13; Miqueas 4:4.

  • Hatagan sing makalilipay nga hilikuton ang mga tawo. “Ang akon mga pinili magakalipay sa binuhatan sang ila kamot. Indi sila magpangabudlay sa wala sing pulos.”—Isaias 65:22, 23.

  • Solbaron ang problema sa palibot. “Ang kamingawan kag ang kigas nga duta magahugyaw, kag ang desyerto nga kapatagan magakalipay kag mapuno sing mga bulak.”—Isaias 35:1.

  • Tudluan ang mga tawo kon paano magkabuhi sing wala katapusan. “Ini nagakahulugan sang kabuhi nga wala sing katapusan, ang pagkilala nila sa imo, ang lamang matuod nga Dios, kag sa imo ginpadala, si Jesucristo.”—Juan 17:3.

Gusto sang Dios nga mabaton mo ini nga mga pagpakamaayo. (Isaias 48:18) Binagbinagon sa masunod nga artikulo kon ano ang mahimo mo subong para mabaton mo ining matahom nga palaabuton.