Magdiretso sa kaundan

Magdiretso sa listahan sang kaundan

Kon May Malala nga Balatian

Kon May Malala nga Balatian

“Sang nabal-an ko nga may kanser ako sa baga kag sa colon, abi ko mapatay na ako. Pero sa tapos ko magpakonsulta, nagpamensar ako, ‘Sige, bisan pa wala ko ini ginapaabot, dapat mangita ako sing paagi para maatubang ko ini.’”—Linda, 71 anyos.

“Nagaantos ako sa tuman kasakit nga balatian kag bangod sini nagangutngot ang akon wala nga guya. Isa ka bes, bangod sang grabe nga kasakit na-depress ako. Pirme ako nagabatyag nga nagaisahanon kag napensaran ko pa gani nga maghikog.”—Elise, 49 anyos.

KON ikaw ukon ang imo pinalangga may malala nga balatian nga mahimo magresulta sa kamatayon, kabalo ka gid kon daw ano ini kabudlay. Luwas sa balatian, kinahanglan mo man atubangon ang sarisari nga emosyon. Mahimo mahadlok ka pa gid kag mabalaka bangod sa pagbalikbalik sa doktor, mabudlay ukon mahal nga pagpabulong, ukon ang indi maayo nga epekto sang bulong. Mabudlay gid kon indi ka mapahamtang bangod sa malala nga balatian.

Sa diin kita makapangayo sing bulig? Madamo ang nabuligan sang pagpangamuyo sa Dios kag pagbasa sing makapaumpaw nga mensahe sa Biblia. Makabulig man ang pagpalangga kag pagsuporta sang pamilya kag mga abyan.

 ANG NAKABULIG SA IBAN NGA MAGBATAS

Si Robert, nga 58 anyos nagsiling: “Ang pagtuo sa Dios makabulig sa imo nga mabatas ang imo balatian. Mangamuyo kay Jehova. Isugid sa iya ang imo ginabatyag. Pangabaya ang iya balaan nga espiritu. Mangayo sa iya sing kusog para mangin mabakod ka para sa imo pamilya kag mangin kalmado samtang ginabatas ang imo balatian.

“Daku gid nga bulig kon ara ang imo pamilya para buligan ka sa imo ginabatyag. Isa ukon duha sa ila ang nagatawag sa akon kada adlaw kag mamangkot, ‘Kamusta ka na?’ Ginapalig-on man ako sang akon mga abyan nga nagaistar sa sarisari nga lugar. Nagapaumpaw gid sila sa akon, kag nagabulig ini sa akon nga magpadayon.”

Kon nagabisita ka sa imo abyan nga may balatian, talupangda ang ginsiling ni Linda: “Gusto sang pasyente nga daw normal lang gihapon ang iya kabuhi kag mahimo indi niya gusto istoryahan ang parte sa balatian. Gani istoryahi ang masami ninyo ginaistoryahan.”

Ang kusog halin sa Dios kag paumpaw sa Kasulatan, pati na ang suporta sang mapinalanggaon nga pamilya kag mga abyan, makabulig sa aton nga mabatyagan nga may pulos ang aton kabuhi, bisan pa may malala kita nga balatian.