ANG buaya amo ang nahibaluan nga pinakamakusog magkagat sa mga sapat nga nagakabuhi subong. Halimbawa, ang buaya sa dagat, nga makita malapit sa Australia, halos tatlo ka pilo nga mas makusog magkagat sangsa leon kag tigre. Pero ang baba sang buaya tuman ka sensitibo—mas sensitibo pa sangsa punta sang tudlo sang tawo. Paano ina natabo kay madamol kag matig-a ang panit sang buaya?

Ang apipingig sang buaya puno sang linibo ka nerve sang igbalatyag. Sa tapos sang pagtuon sa ila, ang researcher nga si Duncan Leitch nagsiling: “Ang tagsa ka punta sang mga nerve nagagua sa buho sang bagol.” Ini nga plastada nagaamlig sa mga nerve fiber nga yara sa apipingig kag nagabulig nga mangin sensitibo gid nga makabatyag sa pila ka bahin amo nga indi ini matakus sang mga instrumento. Subong resulta, mahibaluan sang buaya kon bala pagkaon ukon mga sagbot ang yara sa iya baba. Amo man ini ang rason kon ngaa mabutang sang inang nga buaya ang iya mga boto sa iya baba nga indi niya makagat. Ang apipingig sang buaya kombinasyon gid sang kusog kag pagkasensitibo.

Ano sa banta mo? Ang apipingig sang buaya resulta bala sang ebolusyon? Ukon gindesinyo ini?