ANO ang mas malala pa sangsa kapaslawan? Ang indi matuod nga kadalag-an. Kay man, kon mapaslawan ka sa pila mo ka panikasog, may mahimo ka pa para matadlong ini. Isa pa, makatuon ka sa imo eksperiensia kag manikasog nga himuon ang imo labing masarangan sa sunod.

Pero tuhay ang indi matuod nga kadalag-an. Mahimo hunahunaon mo nga nagmadinalag-on ka, pero ang matuod, napaslawan ka gali. Sa tion nga marealisar mo nga kinahanglan mo na magbag-o, basi ulihi na ang tanan.

Binagbinaga ang isa ka halimbawa. Namangkot sadto si Jesucristo: “Ano ang mabenepisyo sang isa ka tawo kon maangkon niya ang bug-os nga kalibutan apang madula ang iya kalag?” (Mateo 16:26) Maaplikar ini sa mga nagapaninguha sang manggad kag sang tanan nga mabakal sini—nga amo ang panguna nga halimbawa sang indi matuod nga kadalag-an. “Ang paghunahuna lamang nga magtaas ang posisyon, pagtigayon sang mas madamo nga kuarta ukon pagkabutang, indi makabusog sang kalag,” siling sang career counselor nga si Tom Denham. “Ang pagtakus sang kadalag-an base lamang sa kuarta manabaw kag indi makahatag sing matuod nga kalipay.”

Pat-od nga madamo ang magaugyon sa sini. Sa isa ka surbe sa Estados Unidos, “ang pagtigayon sang madamo nga kuarta” ika-20 lang sa listahan sang 22 ka “rason sang madinalag-on nga kabuhi.” Ang mga nagapanguna sa sini amo ang maayong panglawas, maayo nga kaangtanan sa iban, kag ang obra nga nanamian mo gid.

Ginapakita sini nga kon pamangkuton ang mga tawo, madamo ang nakahibalo sang kinatuhayan sang matuod kag indi matuod nga kadalag-an. Pero, nabudlayan sila magdesisyon base sa husto nga pagtamod sa kadalag-an.