Sa isa ka pagtuon, mga 33 porsiento sang mga nagatabok sa dalan ang wala nagakonsentrar kay nagapamati sila sang musika, nagapakig-istorya sa cell phone, kag iban pa. Ang pinakadelikado amo ang pag-text. Ang mga naga-text nagadugay sing 18 porsiento kon magtabok sa dalan kon ikumparar sa mga nagakonsentrar kag mga 3.9 ka beses nga mahimo indi nila masunod ang traffic light, magtabok sa indi talabukan, ukon magtabok nga wala nagatan-aw anay.

Ang mga babayi nga ginakuha halin sa Nigeria para himuon nga mga sex slave sa Europa ginapahimo sang isa ka ritwal sa tulutemplo sang nagahimo sing juju para indi sila manugid. Para dominaron kag siguraduhon nga magpati ining mga babayi, ginapahog sila nga silutan sa kalibutan sang mga espiritu kon indi sila magsunod.

Ginadula sing mga 5 asta 10 porsiento sang madugay na nga mga wala sing obra ang ila kurso kag eksperiensia sa ila mga résumé bangod mahimo sila mangin tam-an ka kalipikado.

Ang aso nga halin sa gatong nga kahoy ginakabig nga amo ang panguna nga kabangdanan sang kamatayon sa pigado nga mga pungsod, diin apat ka milyon ang nagakapatay kada tuig bangod sang mga balatian may labot sa sini. Nagasiling ang mga researcher nga ang makahililo nga mga kemikal nga ginapagua sang kahoy ukon uling pareho kadelikado sa hilo nga halin sa aso sang sigarilyo.