Magdiretso sa kaundan

Magdiretso sa listahan sang kaundan

Gout—Ano ang mga Kabangdanan Sini?

Gout—Ano ang mga Kabangdanan Sini?

 Gout—Ano ang mga Kabangdanan Sini?

ANG gout isa sa kinaandan nga mga klase sang arthritis nga mahimo grabe kasakit. “Kon indi mapagua ang uric acid sa imo lawas, nagaresulta ini sa gout,” siling sang libro nga Arthritis. Dugang pa, “isa ini ka balatian nga maathag ang kabangdanan—ang pagsupot sang daw mga kristal nga uric acid sa mga lutalutahan . . . , ilabi na gid sa kamalagku sang tiil.”

Ang uric acid isa ka elemento nga nagaupod sa dugo nga dapat paguaon sang lawas. Halin ini sa natunaw nga substansia nga ginatawag purine. Kon ang uric acid magsupot kag indi mag-upod sa ihi, ining matalom kag manipis nga mga kristal nagasupot sa lutalutahan sang kamalagku ukon sa iban pa nga lutalutahan. Mahimo magbanog ang lutalutahan, mainit kon tandugon, kag grabe ka sakit. * “Bisan masalapay lang ini, indi gid maagwanta ang kasakit,” siling ni Alfred nga may amo sini nga balatian.

“Kon indi mabulong, mahimo magdugay sing isa ka semana ang gout,” siling sang artikulo nga ginbalhag sang Arthritis Australia. “Mahimo nga binulan ukon tinuig pa antes ini maglukmat. Pero kon indi ini mahatagan sing atension, mahimo pirme ini maglukmat, mangin mas masakit, kag mahimo nga masamad sing permanente ang mga lutalutahan. Mahimo man ini maglala kag madugay mag-ayo.

Ang gout amo ang isa sa pinakamahapos bulngon nga arthritis. Mapaayo ini sang mga bulong para sa banog nga wala sing steroid. Kon grabe na ini kag pirme nagalukmat, mahimo ini bulngon sang allopurinol agod indi magdamo ang uric acid. Puede bala malikawan ang paglukmat sang gout? Posible, kon mahibaluan sang may balatian ang mga kabangdanan sini.

 Sin-o ang Masami nga Nagabalatian Sini?

Suno sa pila ka eksperto, sobra sa 50 porsiento sang may amo sini nga balatian ang napanubli nila sa ila pamilya. “Si Tatay kag si Lolo pareho nga may gout,” siling ni Alfred nga ginsambit kaina. Dugang pa, ang kalabanan nga may gout amo ang mga lalaki, ilabi na ang mga nagaedad sing 40 asta 50. Ang matuod, tatlo ukon apat ka pilo ang posibilidad sang mga lalaki nga magbalatian sini sangsa mga babayi. Talagsa lang nagabalatian sini ang mga babayi nga wala pa nagmenopos.

Sobra nga katambukon kag pagkaon: Ang Encyclopedia of Human Nutrition nagsiling: “Ang pagbulong sa gout wala lamang nagalakip sang paglikaw sa mga pagkaon nga bugana sa purine, kundi sa pagbulong sang mga balatian nga may labot sa gout: sobra nga katambukon, insulin resistance syndrome, kag dyslipidemia,” ukon abnormal nga kadamuon sang lipid sa dugo, pareho sang kolesterol.

Ginarekomendar sang pila ka eksperto nga haganhaganon ang pagkaon sang mga pagkaon nga madamo sing purine, subong sang yeast, pila ka klase sang isda, kag karne. *

Pag-inom: Kon sobra ang pag-inom sang makahulubog nga ilimnon, mabudlayan ang imo lawas sa pagpagua sang uric acid amo nga nagasupot ini.

Balatian: Suno sa Mayo Clinic sa Estados Unidos, mahimo bangdan sang gout ang pila ka balatian, lakip na ang “wala mabulong nga high blood (hypertension), kag malala nga mga balatian subong sang diabetes, pagdamo sang tambok kag kolesterol sa dugo (hyperlipidemia), kag pagsupon sang mga ugat (arteriosclerosis).” Ginaangot man ang gout sa “gulpi ukon grabe nga pagbalatian ukon pagkasamad, kag malawig nga paghigda,” subong man sang balatian sa kidney. Ang kamalagku sa tiil amo gid pirme ang ginatubuan sang gout bangod mahinay ang pagdalagan sang dugo sa sini kag mas mabugnaw ini sangsa iban nga bahin sang lawas—duha ka kabangdanan sang pagdamo sang uric acid.

Mga bulong: Ang bulong nga nagapalukmat sang gout nagalakip sang thiazide diuretics (mga bulong nga nagapagua sang tubig sa lawas, masami para sa mga may high blood), diutay nga dosage sang aspirin, antirejection nga mga bulong nga ginahatag sa mga pasyente nga nagapa-transplant, kag mga bulong para sa chemotherapy.

Lima ka Paagi Para Malikawan ang Paglukmat

Bangod ang paglukmat sang gout naangot sa estilo sang pagkabuhi, ang masunod nga mga panugda mahimo makabulig para malikawan ang paglukmat sini. *

1. Bangod ang gout resulta sang problema sa metabolismo, dapat limitahan sang may amo sini nga balatian ang mga pagkaon nga madamo sing kalori para indi sila magsobra ka tambok. Kon magsobra na kabug-at, mabudlayan man ang mga lutalutahan.

2. Likawi ang gulpi nga pagpaniwang, kay mahimo ini magpadamo sang uric acid sa dugo.

3. Likawi ang sobra nga protina halin sa karne. Ginarekomendar sang iban nga 170 ka gramo lang nga karne, lakip ang manok kag isda, ang kaunon kada adlaw.

4. Kon nagainom ka sing makahulubog nga ilimnon, haganhagana lang. Mas maayo nga likawan mo ang tanan nga makahulubog nga ilimnon kon may gout ka.

5. Damua inom sang mga wala sing alkohol nga ilimnon. Makabulig ini para matunaw ang uric acid kag mapagua sa lawas. *

Ini nga mga panugda nagapahanumdom sa aton sa sugo sang Biblia nga mangin “haganhagan sa mga batasan” kag indi mangin “palainom sing alak.” (1 Timoteo 3:2, 8, 11) Nagapamatuod ini nga nahibaluan gid sang aton mahigugmaon nga Manunuga kon ano ang pinakamaayo para sa aton.

[Mga Nota]

^ par. 3 Amo man sini ang mga sintomas kon ang calcium pyrophosphate magsupot sa lutalutahan, ilabi na sa mahining nga mga labotlabot sa punta sang tul-an. Pero lain ini nga balatian nga nagakinahanglan sang lain man nga pagbulong.

^ par. 9 Suno sa artikulo nga ginbalhag sa Australian Doctor, ang pagkaon sing mga uhong kag utan nga madamo sing purine, subong sang mga liso, lentejas, kulitis, kag cauliflower, “wala sing labot sa paglala sang gout.”

^ par. 14 Ini nga artikulo indi giya sa pagpabulong. Ang kada isa mahimo nagakinahanglan sang lainlain nga paagi sa pagbulong. Isa pa, indi niya dapat pag-untatan ang iya ginatomar nga bulong ukon bag-uhon ang iya mga ginakaon kon wala pa niya makonsulta ang iya doktor.

^ par. 19 Ini nga impormasyon nabase sa rekomendasyon sang Mayo Foundation for Medical Education and Research.

[Diagram/Retrato sa pahina 24]

(Para sa aktual nga pormat, tan-awa ang publikasyon)

Nagabanog nga lutalutahan

Synovium

[Retrato]

Nagsupot nga kristal sang uric acid