Ano ang Magabag-o?

“Ang pungsud indi magbayaw sing espada batok sa pungsud.”

“Ang pumuluyo indi magsiling, ‘Nagamasakit ako.’”

“Wala na sing kamatayon.”

DAW imposible matabo ang mga ginsambit sa ibabaw. Pero makasiguro kita nga indi lang ini isa ka damgo. Ngaa? Kay indi ini mga promisa sang mga pulitiko nga wala sing ikasarang sa pagbag-o sang aton kalibutan. Ini nga mga promisa mabasa sa Biblia. *

Para sa madamo nga tawo, ang Biblia kinaraan na nga libro kag indi na praktikal subong. Amo man bala sina ang imo pagpati? Kon amo, ngaa indi mo pag-usisaon sing maayo ang ginasiling sang Biblia? Ang matuod, sa Biblia lamang makita ang rekord sang kasaysayan sang tawo halin gid sa umpisa. Ginapaathag sini ang masunod:

● Kon paano nangin makaluluoy ang kahimtangan sang katawhan.—Roma 5:12.

● Kon paano solusyonan sang Dios ini nga kahimtangan.—Juan 3:16.

● Kon ngaa indi mabag-o sang gobierno ang aton kalibutan.—Jeremias 10:23.

● Kon ngaa masaligan naton ang promisa sang Dios.—Josue 23:14.

Dulaon gid bala sang Dios ang gutom, inaway, balatian, kag kamatayon nga ginaantos sang mga tawo subong? Ini nga promisa mahapos patihan kon batunon naton ang masunod:

1. Ang Dios amo ang nagtuga sa aton.

2. Nagaulikid sia sa aton.

3. May gahom sia sa pagbag-o sang kalibutan.

4. Amo sini ang iya katuyuan.

May basihan bala para patihan naton ining apat ka punto? Ginaagda ka sang mga Saksi ni Jehova, ang naghimo sini nga magasin, nga usisaon ini paagi sa pagtuon sa Biblia.

Mahimo may Biblia ka pero ayhan talagsa lang ukon wala mo gid ini ginabasa. Bisan ang madamo nga nagabasa sing Biblia, nagasiling nga mabudlay ini hangpon. Kon amo man sini ang imo opinyon, ginaagda ka namon nga magtuon sing Biblia upod sa mga Saksi ni Jehova. Minilyon ka tawo sa bilog nga kalibutan ang nakabenepisyo sa sini. Paano nila ini ginahimo?

Mahimo ka kadtuan sang mga Saksi ni Jehova sa inyo balay ukon sa iban nga lugar nga kombeniente sa imo kada semana para tun-an ang Biblia upod sa imo. Wala ini sing bayad. Makabulig ini sa imo para masabat ang mga pamangkot subong sang, Ngaa nagaantos kita? Ngaa indi masarangan sang gobierno sang tawo nga bag-uhon ang kalibutan? Ano ang Ginharian sang Dios, kag ano ang mahimo sini nga indi mahimo sang gobierno sang tawo? *

Para sa dugang nga impormasyon sa pagtuon sing Biblia sa puluy-an, kontaka ang mga Saksi ni Jehova sa inyo lugar ukon tan-awa ang Web site nga www.jw.org. Mahimo ka man makasulat sa nagakaigo nga adres nga nalista sa pahina 5 sini nga magasin.

[Mga Nota]