Magdiretso sa kaundan

Magdiretso sa listahan sang kaundan

Nasapwan Ko ang Matuod nga Gugma kag Paghidait

Nasapwan Ko ang Matuod nga Gugma kag Paghidait

 Nasapwan Ko ang Matuod nga Gugma kag Paghidait

Panugiron ni Egidio Nahakbria

Samtang nagadaku ako, pamatyag ko biniyaan ako kag wala ginapalangga. Pero subong, nabatyagan ko na ang pagpalangga kag kalinong. Paano ini natabo? Isugid ko sa inyo.

NATAWO ako sang 1976, sa payagpayag nga duta ang salog sa kabukiran sang East Timor, nga bahin sadto sang Indonesia. Imol gid ang amon mga ginikanan, kag ikawalo ako sa pulo nila ka bata. Bangod indi nila kami masarangan saguron, ang akon lang kapid nga lalaki ang ila ginhawiran kag ginhatag nila ako sa akon pakaisa.

Sang Disiembre 1975, sang wala pa ako natawo, ginsalakay sang Indonesia ang East Timor, kag nagsugod ang inaway nga naglawig sing sobra 20 ka tuig. Gani, bata pa ako nakita ko na ang kapintas kag pag-antos. Nadumduman ko pa sang nagsalakay ang mga soldado sa amon lugar kag nagpalalagyo ang mga tawo para indi mapatay. Nalagyo kami sang akon pakaisa sa bukid upod sa linibo pa ka taga-East Timor.

Pero natultulan kami sang mga soldado kag ginpaulanan nila kami sing bomba. Asta subong madumduman ko pa ang kahadlok, kamatayon, kag halit nga resulta sadto. Bisan sang nakapauli na kami, pirme gihapon ako ginakibang. Madamo sa kaingod namon ang wala na makita ukon ginpatay, kag nahadlok ako nga basi ako na ang masunod.

Sang dies anyos ako, nagmasakit ang akon pakaisa kag napatay. Gani ginhatag naman ako sang akon ginikanan kay Lola. Balo sia kag naugot sa iya kabuhi kag para sa iya pabug-at ako. Gani gin-ulipon niya ako. Isa ka adlaw, sang nagmasakit ako kag indi na makaobra, ginbakol niya ako kag ginpabay-an nga mapatay. Maayo lang kay ginsagop ako sang akon Tiyo kag ginpaistar upod sa ila pamilya.

Nakaeskwela gid man ako sang 12 anyos na ako. Pero nagmasakit ang akon tiya kag grabe gid ang kasubo sang akon tiyo. Para indi na sila mabug-atan, naglayas ako kag nag-upod sa grupo sang mga soldado sa Indonesia nga nagatener sa kagulangan. Ginhimo nila ako nga manuglaba, manugluto, kag manugpaninlo sa kampo. Maayo ang ila pagtratar sa akon kag nabatyagan ko nga importante ako sa ila. Pero pagligad sang pila ka bulan, nakita ako sang akon mga paryente kag ginpilit nila ang mga soldado nga papulion ako.

Nangin Aktibista Ako

Pagkatapos ko hayskul nagkadto ako sa Dili, ang kapital  sang East Timor, kag nag-eskwela sa kolehiyo. Didto ko nakilala ang mga pamatan-on nga pareho man sa akon ang inagihan. Para sa amon, ang lamang paagi nga mahilway ang amon pungsod kag mabag-o ang sistema amo ang pagrebelde. Nag-organisar kami sing madamo nga rally, nga ang kalabanan nagresulta sa mga riot. Madamo sa akon mga abyan ang nasamaran. Ang iban napatay pa gani.

Sang nangin independiente ang East Timor sang 2002, puno ini sing kagulub-an, linibo ang napatay, kag ginatos ka libo ang nadulaan sing puluy-an. Naglaum ako nga mag-ayo ang kahimtangan. Pero madamo gihapon ang wala sing obra, imol, kag padayon ang ginamo sa pulitika.

Nagbag-o ang Akon Kabuhi

Sadto nga tion, nagaistar ako sa akon pila ka paryente, kag isa sa ila si Andre nga nagatuon sing Biblia upod sa mga Saksi ni Jehova. Debotado ako nga Romano Katoliko, amo nga wala ako nalipay nga nagaupod sia sa iban nga relihion. Pero, interesado ako sa Biblia kag kon kaisa ginabasa ko ang Biblia ni Andre nga ginatago niya sa iya kuarto. Ang akon nabasahan nagpainteres pa gid sa akon.

Sang 2004, sang ginhatagan ako ni Andre sang imbitasyon para sa Memoryal sang kamatayon ni Jesus, nagdesisyon ako nga magtambong. Sala ang pagbasa ko sa imbitasyon, amo nga nag-abot ako mga duha pa ka oras antes magsugod. Sang nag-alabot na ang mga Saksi nga taga-didto kag taga-iban nga pungsod, ginkamusta nila ako kag gin-abiabi gid. Nagdayaw gid ako. Ginlista ko sa notebook ang ginsambit nga mga bersikulo sang humalambal, kag sang ulihi gintan-aw ko ini sa akon Katoliko nga Biblia para mabal-an kon matuod ang iya ginsiling. Amo gid!

Pagkasunod semana, nagtambong ako sa Misa sa amon simbahan. Bangod naleyt ako upod sa pila pa, nagkuha ang pari sing baratiha kag gintabog kami pagua. Samtang ara kami sa gua, gintapos sang pari ang iya misa paagi sa pagsiling: “Kabay ang paghidait ni Jesus mangin yara sa inyo.” Ang isa ka maisog nga babayi nagsinggit, “Ano nga paghidait kay bag-o mo man lang gintabog ang mga tawo?” Wala sia ginsapak sang pari. Naglakat ako kag wala na gid magbalik sa simbahan.

Wala madugay, nag-upod ako kay Andre sa pagtuon sing Biblia kag pagtambong sa mga miting sang mga Saksi. Nabalaka ang amon mga paryente gani ginpamatukan nila kami. Ginpaandaman kami sang lola ni Andre: “Makutkot gid ako sang inyo lulubngan kon padayon kamo nga magtuon sa sina nga relihion.” Pero wala ini nagpugong sa amon. Determinado gihapon kami nga mag-uswag sa espirituwal.

Paghimo sing mga Pagbag-o

Samtang nagatuon ako sa Biblia, narealisar ko nga wala ko pa gid gali mahibaluan kon ano ang gugma. Matig-a ang akon balatyagon kag wala ako sing salig sa iban. Pero gin-ulikdan gid ako sang mga Saksi. Sang nagmasakit ako, ginpabay-an ako sang akon mga paryente pero ginduaw ako kag ginbuligan sang mga Saksi. Ang ila gugma indi lang “paagi sa pulong ukon paagi sa dila, kundi paagi sa buhat.”—1 Juan 3:18.

Bisan pa kaisog sang akon hitsura kag personalidad, ginpakitaan ako sang mga Saksi sing “simpatiya” kag “utudnon nga pagpalangga.” (1 Pedro 3:8) Amo ko pa lang nabatyagan nga ginapalangga ako. Naghumok ang akon personalidad kag natun-an ko nga higugmaon ang Dios kag ang akon isigkatawo. Sang ulihi, sang Disiembre 2004, ginsimbuluhan ko ang akon dedikasyon kay Jehova paagi sa pagpabawtismo sa tubig. Wala madugay, nabawtismuhan man si Andre.

Pagpakamaayo Bisan May Kabudlayan

Sang nabawtismuhan na ako, gusto ko gid buligan ang mga tawo nga makahibalo kon ano ang matuod nga gugma kag hustisya. Gani nagpayunir ako, ang tawag sang mga Saksi ni Jehova sa mga nagahatag sing daku nga tion sa Cristianong pagministeryo. Mas makalilipay ang pagsugid sa iban sang makapabakod nga mensahe sa Biblia sangsa pag-entra sa mga rally kag riot. Amo gid ini ang matuod nga pagbulig sa mga tawo!

Sang 2006, nagsugod liwat ang tension sa East Timor. Nag-ilinaway ang mga grupo nga madugay na nagadumtanay. Ginsalakay ang siudad sang Dili, kag madamo nga taga-sidlangan ang nagpalalagyo para indi sila mapatay. Nalagyo ako  upod sa iban nga Saksi pakadto sa Baucau, isa ka daku nga banwa nga mga 120 kilometros sa sidlangan sang Dili. Pero nangin pagpakamaayo pa ini kay natukod namon didto ang una nga kongregasyon sa gua sang Dili.

Pagligad sang tatlo ka tuig, sang 2009, gin-agda ako nga magtambong sa isa ka pinasahi nga eskwelahan sa Jakarta, Indonesia para sa mga Cristiano nga nagahatag sing daku nga tion sa pagministeryo. Ginbaton ako kag ginpalangga sang mga Saksi sa Jakarta. Nagdayaw gid ako sa ila matuod nga gugma. Nabatyagan ko gid nga bahin ako sang bug-os kalibutan nga “paghiliutod,” subong “pamilya” nga nagaulikid gid sa akon.—1 Pedro 2:17.

May Paghidait Na!

Pagkatapos sang amon klase, nagbalik ako sa Baucau, kag diri ako nagaistar asta subong. Nalipay gid ako sa pagbulig sa mga tawo diri sa espirituwal, pareho sa pagbulig sang iban sa akon. Halimbawa, sa isa ka malayo nga lugar sa Baucau, nagatudlo kami sing Biblia sa 20 ka tawo, lakip na ang mga tigulang nga indi makahibalo magbasa kag magsulat. Nagatambong sila tanan sa mga miting kada semana, kag tatlo sa ila ang nangin bahin sang amon “pamilya” subong bawtismado nga miembro sang Cristianong kongregasyon.

Nakilala ko man si Felizarda, isa ka mabuot kag mainabyanon nga babayi nga nagbaton sang kamatuoran sa Biblia kag nagpabawtismo. Nagpakasal kami sang 2011. Nalipay man ako kay ang paryente ko nga si Andre nagaalagad sa talatapan sang mga Saksi ni Jehova sa East Timor. Ginarespeto na subong sang kalabanan namon nga paryente ang amon pagtuo, lakip ang lola ni Andre nga sang una namahog nga ilubong niya kami.

Sang una, maakigon ako kag nagabatyag nga wala gid sang may nagapalangga sa akon kag mabudlay ako higugmaon. Pero salamat gid kay Jehova nga Dios kay nasapwan ko ang matuod nga gugma kag paghidait!

[Retrato sa pahina 19]

Si Egidio, sang aktibista pa sia

[Retrato sa pahina 21]

Sanday Egidio kag Felizarda, kag ang mga miembro sang kongregasyon sang Baucau, sa East Timor