Magdiretso sa kaundan

Magdiretso sa listahan sang kaundan

1. Maghalong sa Pagpamakal

1. Maghalong sa Pagpamakal

 1. Maghalong sa Pagpamakal

KON indi ikaw ang nagasagod ukon nagatanom sang inyo kalan-on, mahimo nga mabakal ka gid sa merkado ukon supermarket. Kon amo, paano mo masiguro nga maayo nga pagkaon ang imo mabakal?

Planuha kon ano ang una mo baklon.

“Unaha bakal ang wala nagakalub-ok nga mga pagkaon,” siling sang Food Safety Information Council sa Australia. “Ipaulihi ang mga frozen food.” Dugang pa, magbakal lang sang mainit nga linuto kon manugpauli ka na.

Pilia ang preska.

Kon posible, magbakal lang sang preska nga pagkaon. * Si Ruth nga taga-Nigeria may duha ka bata. Nagsiling sia: “Temprano pa ako nagapanindahan para preska pa ang akon mabakal.” Si Elizabeth nga taga-Mexico sa merkado man nagapanindahan. “Preska nga mga utan kag prutas ang mabakal ko diri, kag makapili gid ako,” siling niya. “Ginasigurado ko nga ang karne nga ginabakal ko bag-o lang ihaw. Dayon, gina-ref ko lang ang indi ko maluto.”

Usisaa ang imo ginabakal.

Pamangkuta ang imo kaugalingon: ‘Maayo bala ang itsura sang akon ginabakal? Wala bala sing baho ang karne?’ Kon mabakal ka sing naputos na, usisaa ang putos. Kon may samad na ang putos, mahimo nasudlan na sang bakterya ang unod sini.

Si Chung Fai, nga sa supermarket sa Hong Kong nagabakal sang pagkaon, nagsiling: “Dapat mo gid tan-awon ang expiration date sa putos sang pagkaon.” Ngaa? Nagapaandam ang mga eksperto nga ang “expired” nga pagkaon mahimo gihapon bangdan sang balatian bisan maayo pa ini tulukon, indi baho, kag namit pa ang sabor.

Tinlui ang imo mga suludlan.

Hugasi pirme sa mainit nga tubig kag habon ang imo mga suludlan sa pagpaninda. Paina ang suludlan sang isda kag karne agod indi mahigkuan ang iban mo nga ginpamakal.

Ang mag-asawa nga sanday Enrico kag Loredana nga taga-Italya, nagapanindahan sa malapit lang sa ila. “Sa sini nga paagi,” paathag nila, “indi malub-ok ang pagkaon kay makapauli kami dayon.” Kon sobra pa 30 minutos antes ka makapauli, ibutang ang mga frozen food sa insulated bag ukon cooler.

Sa masunod nga artikulo, binagbinagon naton ang dapat himuon sa pagpreparar sang pagkaon pag-abot sa balay.

[Nota]

^ par. 6 Tan-awa ang artikulo nga “Paagi 1—Husto nga Pagkaon,” sa Marso 2011 nga Magmata!

[Kahon sa pahina 4]

HANASA ANG IMO KABATAAN: “Ginatudluan ko ang akon mga bata nga antes magbakal sang naputos na nga pagkaon, pareho sang snacks, tan-awon gid nila anay ang expiration date.” —Ruth, Nigeria