Magdiretso sa kaundan

Magdiretso sa listahan sang kaundan

Makalilipay nga Hitabo sa Malawi—1,000 ka Kingdom Hall!

Makalilipay nga Hitabo sa Malawi—1,000 ka Kingdom Hall!

 Makalilipay nga Hitabo sa Malawi—1,000 ka Kingdom Hall!

“ABI ko anay imposible ini sa Malawi,” siling ni Augustine. Ang ginatumod niya amo ang pagpatindog sing madamo nga Kingdom Hall, ang tawag sang mga Saksi ni Jehova sa ila tilipunan para sa pagsimba. Sang 1993, may 30,000 ka Saksi sa Malawi, isa ka gamay nga pungsod sa bagatnan-sidlangan sang Aprika. Ang problema, wala sila sing nagakaigo nga tilipunan para sa ila pagsimba kag pagtuon sing Biblia.

Pero lain na ang kahimtangan subong. Sa Blantyre sang Septiembre 2010, natapos sang mga Saksi sa Malawi ang ila ika-1,000 nga Kingdom Hall! * Ngaa 30,000 na sila antes sila nagsugod sa pagtukod sing mga duog para sa pagsimba? Kag sang ginsugdan nila ini, paano nila natapos ang pagpatindog sang 1,000 ka tilipunan sa malip-ot lang nga tion sa sining pigado nga pungsod? Kag ano ang nangin epekto sining dalayawon nga proyekto sa mga Saksi kag sa mga tawo sa palibot?

Mabudlay nga Tion

Sang temprano nga bahin sang katuigan 1900, ang mga Saksi ni Jehova, nga kilala sadto nga mga Estudyante sang Biblia, nagsugod sa pagtudlo parte sa kamatuoran sa Biblia sa Malawi. Sang 1967, ang kadamuon sang mga Saksi naglab-ot sa 17,000. Kaangay sa mga Cristiano sang unang siglo, nakilal-an sila nga nagatuman sa kasuguan kag nagatahod sa mga opisyal sang gobierno. Nagpabilin man sila nga neutral sa pulitika.—Juan 18:36; Binuhatan 5:29.

Pero makapasubo nga sang tungatunga sang katuigan 1960, ginpamatukan sila sang gobierno bangod sa ila panindugan sa Biblia. Sang 1967, gindumilian sila. Madamo ang ginpahalin sa ila trabaho, kag may mga tawo man nga nag-agaw kag nagguba sang ila mga propiedad. Bangod sa sobra nga pagpamatok kag sa kulba nga posible matabo ang genocide, linibo ka mga Saksi ang nalagyo sa Mozambique kag Zambia.

Sang ulihi, nag-ayo ang kahimtangan para sa mga Saksi ni Jehova sa Malawi, kag ang kalabanan sa ila ginpapauli sang temprano nga bahin sang katuigan 1990. Tuman gid ang ila kalipay sang Agosto 12, 1993, sang ginkuha na ang pagdumili sa ila pagkatapos sang 26 ka tuig! Pero may bag-o naman sila nga problema. Sobra na sila 30,000 sa 583 ka kongregasyon, pero wala sila sing nagakaigo nga mga tilipunan! Ano ang himuon nila?

Nagpakita sing Gugma!

Sa una nga anom ka tuig pagkatapos ginkuha ang pagdumili, ang mga Saksi sa Malawi nakapatindog man sing mga Kingdom Hall bisan pa diutay lang ang ila pundo. Pero indi nila masambot ang pagdamo sang mga Saksi kada tuig. Ano ang solusyon? Amo ang pag-aplikar sang prinsipio sa Biblia nga makita sa 2 Corinto 8:14. “Paagi sa pag-alalangay,” ang sobra nga pundo  sang iban nga pungsod ‘makapuno sa kakulangan’ sang mga lugar nga kaangay sang Malawi. Bangod sini, sang 1999, ginsugdan sang Nagadumala nga Hubon sang mga Saksi ni Jehova ang pinasahi nga programa sa pagbulig sa pagtukod sang mga tilipunan sang pagsimba sa imol nga mga pungsod. Ining mahigugmaon nga bulig nagresulta sa madasig nga pagpatindog sing mga Kingdom Hall sa Malawi. *

Sang una, ang mga kongregasyon sa Malawi nagahiwat sang ila Cristiano nga mga miting sa mga eskwelahan lang, temporaryo nga tilipunan, ukon sa idalom pa gani sang kahoy. Subong, ang 1,230 ka kongregasyon nagatipon na kag nagatuon sa Biblia sa dungganon nga mga bilding nga gindedikar para sa matuod nga pagsimba. Gani daku gid ang pagpasalamat sang sobra sa 75,000 ka Saksi sa Malawi sa bulig nga ginhatag sang ila mga kauturan sa bilog nga kalibutan.

Ang isa pa ka rason kon ngaa madamo sila sing napatindog nga tilipunan sa malip-ot lang nga tion amo nga simple lang ang gusto nila nga Kingdom Hall. Indi nila gusto ang malahalon nga bilding kundi ang isa nga may dignidad, nga nagapadungog sa Dios kag komportable para sa pagbinagbinag kag pagtuon sa Biblia.

Nakabenepisyo ang mga Tawo sa Palibot

Sang una, ginapakanubo ang mga Saksi ni Jehova sa Malawi kay wala sila sing tilipunan. Kon kaisa ang pila sa ila nahuya sa pag-imbitar sa mga interesado sa ila mga miting. Gani nalipay gid sila sang may matahom na sila nga Kingdom Hall kag wala na sila nahuya sa pag-imbitar sa ila mga kaingod kag mga interesado sa ila mga miting. Sa isa gani ka lugar, nakibot gid ang isa ka kongregasyon sang 698 ang nagtambong sa miting sa ila bag-o nga Kingdom Hall!

Madamo nga Saksi kag iban nga tawo ang nagsiling nga wala gid nila ginapaabot nga makapatindog sila sing matahom kag mabakod nga tilipunan sa ila lugar. Nadumduman ni Augustine, nga ginsambit kaina, nga may kongregasyon sang una nga sa idalom lang sang kahoy nagahiwat sang miting. “Manami lang kon tig-ilinit,” siling ni Augustine. “Pero kon tig-ululan, problema gid.” Kon nakaagi ka na nga nabasa sa nagabundak nga ulan, mahibaluan mo kon ano ang buot silingon ni Augustine.

Ginsaysay ni Augustine ang iya eksperiensia sang ginbisitahan niya ang kongregasyon sang Chimwanje. “Naghiwat kami sang miting sa isa ka payagpayag nga wala sing dingding,” siling niya. “Wala namon matalupangdan nga may nagaistar na gali nga daku kag dalitan nga damang sa atop. Sang nagapamulongpulong ako, gulpi lang nagtupa ang damang malapit sa akon tiil!  Nabatian ko nga nagsinggit ang isa sa mga nagtambong, ‘Patya Augustine, patya!’ Gintapakan ko ang damang, amo nga asta subong buhi pa ako.” Karon nga bag-o na ang ila Kingdom Hall, wala na nila naeksperiensiahan ini nga mga tublag.

“Isa ka Hiyas sa Komunidad”

Madamo nga komunidad kag lokal nga pangulo ang nagdayaw kag nagtahod sa mga Saksi ni Jehova sang nakita nila ang programa sang pagpatindog sang mga Kingdom Hall. Ari ang ila mga komento:

✔ “Ang pagpatindog sang mga Saksi ni Jehova sang tilipunan sa pagsimba, kag ang ila ginpakita nga gugma kag paghiusa, isa ka hiyas sa komunidad nga maayo gid nga ilugon sang iban nga relihion.”—Lokal nga pangulo sa Chabwenzi.

✔ “Ang ginadayawan ko gid sa mga Saksi amo ang ila paghiusa. Pulo na ka tuig sang ginsugdan namon ang pagpatindog sang amon simbahan, pero wala ko kabalo kon san-o pa ini matapos. Nagapasalamat gid ako sa inyo pagpatindog sang matahom nga bilding sa amon lugar.”—Lokal nga pangulo sa Chigwenembe.

✔ “Kanami gid sa inyo tan-awon kon nagaobra. Madasig pero kalimpyo! May paghiusa gid kamo.”—Lokal nga pangulo sa Chiuzira.

Ang pagpatindog sang mga Kingdom Hall talalupangdon gid, kay bisan ang mga editor sang Chichewa/Chinyanja—English Dictionary nagsiling parte sa mga Saksi: “Ang mga Saksi ni Jehova madamo sing napatindog [nga Kingdom Hall].”

“Ini nga Kingdom Hall Isa Gid ka Milagro”

Sang Enero 30, 2011, gindedikar sang kongregasyon sang Manyowe sa Blantyre, nga ginsambit kaina, ang ila bag-o nga Kingdom Hall. Amo ini ang ika-1,000 nga Kingdom Hall sa Malawi. “Ini nga Kingdom Hall isa gid ka milagro,” siling sang isa ka miembro sang kongregasyon. “Daw damgo ini nga nangin matuod.”

“Wala gid sing adlaw nga nag-absent ako sa proyekto,” siling sang pamatan-on nga babayi sa kongregasyon sang Manyowe. “Nalipay gid ako nga nakabulig ako sa pagpatindog sing matahom nga duog sang pagsimba sa amon lugar.”

“Nabudlayan kami magkuha sing pahanugot sa lokal nga awtoridad para makapatindog kami sang amon Kingdom Hall,” paathag sang isa ka elder sa kongregasyon. “Pila ka beses nga wala ginpirmahan sang mga opisyal sang siudad ang amon permit. Pero ginpanikasugan gid sang lokal nga pangulo nga si Mrs. Liness Chikaoneka, nga kumbinsihon ang mga opisyal nga pirmahan ini.”

Isa ka adlaw, gin-updan ni Mrs. Chikaoneka ang isa ka elder para papirmahan ang permit. “Gusto ko nga magpatindog ang mga Saksi sang ila Kingdom Hall sa amon lugar,” siling niya sa opisyal. “Maayo sila nga mga tawo. Wala pa gid ako sing may gin-atubang nga kaso parte sa ila sa amon korte.” Ginpirmahan dayon sang opisyal ang mga papeles.

Nalipay gid si Mrs. Chikaoneka sang gindedikar ang Kingdom Hall. “Ginakabig ko nga bugal,” siling niya, “nga ginpatindog ining matahom nga bilding sa amon lugar!”

Sa bug-os nga Malawi, padayon nga nagapasalamat ang mga Saksi ni Jehova kag ang ila mga kaingod sa programa sang pagpatindog sing mga Kingdom Hall. Bangod sa dalayawon nga pagsakripisyo kag pagpangabudlay sang mga Saksi ni Jehova sa sini nga pungsod, indi na tama kadamo nga Kingdom Hall ang kinahanglan patindugon kon ikomparar sang 1993. Matuod nga kinahanglan pa nila gihapon magpatindog sing mga Kingdom Hall kay ang mga tawo padayon nga nagabaton sang “maayong balita sang ginharian [sang Dios]” kag may bag-o naman nga mga kongregasyon nga ginatukod. (Mateo 24:14) Gani, nagapasalamat gid ang mga Saksi sa bulig kag donasyon sang ila mga kauturan sa bilog nga kalibutan. *

Pero labaw sa tanan, ginapasalamatan sang mga Saksi ang ila Dios nga si Jehova. Ang ila ginabatyag pareho sa ginsiling sang salmista: “Ang tanan nga pungsod nga imo ginhimo magakari, kag magayaub sila sa atubangan mo, O Jehova, kag magahimaya sila sa imo ngalan. Kay ikaw daku kag nagahimo sing makatilingala nga mga butang.”—Salmo 86:9, 10, NW.

[Mga Nota]

^ par. 3 Subong, sobra na sa 1,030 ang ila Kingdom Hall.

^ par. 9 Halin sang 1999, ang mga Saksi ni Jehova nakapatindog na sing 23,786 ka Kingdom Hall sa 151 ka imol nga pungsod sa bilog nga kalibutan.

^ par. 28 Ang buluhaton sang mga Saksi ni Jehova sa bilog nga kalibutan ginasuportahan sang boluntaryo nga mga donasyon.

[Retrato sa pahina 24]

Sang wala pa ang programa sang pagpatindog sang mga Kingdom Hall, nagatipon sila sa mga payagpayag para sa pagsimba

[Retrato sa pahina 24]

Subong ang mga kongregasyon nagatipon na sa mga Kingdom Hall pareho sini