Magdiretso sa kaundan

Magdiretso sa listahan sang kaundan

 Gindesinyo Bala Ini?

Ang Pakpak sang Namib Beetle

Ang Pakpak sang Namib Beetle

● Mga 900 ka milyon ka tawo sa bilog nga kalibutan ang wala sing makuhaan sing matinlo nga tubig. Sa madamo nga lugar, malayo pa ang ginalakbay sang mga babayi kag kabataan para magsag-ub sing tubig. “Naluoy gid ako sa mga imol nga inoras pa nga nagalakat kada adlaw para magkuha lang sang ila panguna nga kinahanglanon,” siling ni Shreerang Chhatre, isa ka enhinyero sa Massachusetts Institute of Technology. Para masolusyunan ini, gintun-an ni Chhatre kag sang iya mga kaupod kon paano makatipon sing tubig halin sa tun-og, kag nakakuha sila sang ideya sa Namib beetle.

Binagbinaga: Kada aga, nalikop sang tun-og ang desyerto sang Namib, Aprika. Ginahingalitan ini sang Namib beetle paagi sa pag-atubang sa hangin sa husto nga anggulo. * Ang mga pakpak sini may mga kudolkudol nga nagakuha sang tigdiutay nga tubig sa hangin. Samtang nagasupot ang tubig, nagabug-at ini kag nagailig sa mga kanalkanal sang pakpak sang beetle diretso sa baba sini.

Gusto ini ilugon nanday Chhatre para makasupot sila sang matinlo nga tubig nga magamit sang mga tawo. Siempre, mas madamo nga tubig ang kinahanglan sang mga tawo sangsa Namib beetle para mabuhi. Kag daku ang kinahanglan nga pundo para sa sini nga proyekto. Subong, ang proyekto sang pagsupot sing tun-og para gamiton sang tawo “padayon gihapon nga ginapauswag,” siling ni Chhatre.

Ano sa banta mo? Ang ikasarang bala sang pakpak sang Namib beetle resulta sang ebolusyon? Ukon gindesinyo ini?

[Nota]

^ par. 4 May iban pa nga sahi sang bagangan nga nagasupot man sing tubig sa sini nga paagi.

[Retrato sa pahina 22]

Ang tigdiutay nga tubig nga nagasupot kag nagadalhay pakadto sa baba sang beetle

[Picture Credit Line sa pahina 22]

Photo: Chris Mattison Photography/photographersdirect.com