Magdiretso sa kaundan

Magdiretso sa listahan sang kaundan

 Ang Pagtamod sang Biblia

“Ang Kamatuoran Magahilway sa Inyo”—Paano?

“Ang Kamatuoran Magahilway sa Inyo”—Paano?

MINILYON nga tawo ang nagapati nga hilway sila, pero ang matuod indi. Halimbawa, madamo ang naulipon sang mga disparatis. Ang iban nahadlok sa patay, amo nga nagahatag sila sing malahalon nga mga halad para indi maakig ang mga patay. May mga tawo naman nga nahadlok mapatay kay indi sila sigurado kon ano ang nagakatabo kon mapatay kita. Mahilway pa bala ining mga tawo sa sining mga pagpati nga makatublag sa hunahuna kag emosyon, kag magasto? Huo! Subong sang ginsiling ni Jesucristo nga ginsambit sa ibabaw, ang makahatag sing kahilwayan amo ang kamatuoran. Pero ano nga kamatuoran? Kamatuoran sa kabug-usan ukon kamatuoran tuhoy sa isa ka espesipiko nga butang?

Si Jesus nagpaathag: “Kon magpabilin kamo sa akon pulong, . . . mahibaluan ninyo ang kamatuoran, kag ang kamatuoran magahilway sa inyo.” (Juan 8:31, 32) Ang “pulong,” ukon mga panudlo ni Jesus, makita sa Biblia.

Sang magsiling si Jesus nga “ang kamatuoran magahilway sa inyo,” ang panguna nga ginapatuhuyan niya amo ang kahilwayan sa sala kag kamatayon. Pero ang kamatuoran nga yara sa Pulong sang Dios nagahilway man sa aton sa mga disparatis, kahadlok sa patay kag kamatayon, kag iban pa. Paano?

1. Kahilwayan sa disparatis. Madamo ang nagapati nga may mga butang kuno ukon numero nga dimalas. Ang iban nagapangita anay sing maayo nga patimaan, nagalantaw sa horoscope, ukon nagapamangkot sa espiritista antes maghimo sing importante nga mga desisyon.

Kon paano nagahilway ang kamatuoran sa Biblia: Sang panahon sang Biblia, ang pila sa katawhan sang Dios nagpati man sa disparatis. Nagsimba pa gani sila “sa dios sang Suerte” kag “sa dios sang Kapalaran”! Ano ang pagtamod ni Jehova nga Dios sa sini? “Padayon ninyo nga ginahimo ang malain sa akon panulok,” siling niya. (Isaias 65:11, 12, NW) Amo man sini ang pagtamod sang Dios sa mga nagapamangkot sa mga espiritista. Ang “bisan sin-o nga nagadangop sa espiritista . . . makangilil-ad kay Jehova.”—Deuteronomio 18:11, 12, NW.

Ang mga disparatis kag mga espiritista makahalalit bangod mga ‘pahito ini sang Yawa,’ ang isa nga gintawag ni Jesus nga “amay sang kabutigan.” (Efeso 6:11; Juan 8:44) Kon mangayo ka sing direksion parte sa importante nga butang, mamangkot ka bala sa isa ka butigon? Siempre indi! Gani, maayo gid kon likawan mo ang bisan ano nga may kaangtanan sa “amay sang kabutigan.”

Ang kaalam nga nabase sa sibu nga ihibalo sa mga prinsipio sang Biblia kag sa katuyuan sang Dios sa katawhan makabulig gid agod makadesisyon ka sing maayo. “Ang GINOO nagahatag sing kaalam; gikan sa iya baba nagagowa ang ihibalo kag paghangup,” siling sang Hulubaton 2:6.

2. Kahilwayan sa kahadlok sa patay. Madamo ang nagapati nga ang “espiritu” sang napatay nga mga katigulangan makaimpluwensia sa mga buhi. Nagapati sila nga ining mga “espiritu” dapat pahamut-an paagi sa mga halad, kay kon indi maakig sila. Subong resulta, ang iban nagapangutang sing daku para may igasto sa mga halad kag magarbo nga mga seremonya.

Kon paano nagahilway ang kamatuoran sa Biblia: Ginasugid sa aton sang Biblia ang kamatuoran parte sa kahimtangan sang mga patay. Halimbawa, si Jesus nagsiling nga ang mga patay ‘nagakatulog.’ (Juan 11:11, 14) Ano ang buot niya silingon? Ang sabat makita sa Manugwali 9:5: “Ang buhi nakahibalo nga mapatay sila, apang ang patay wala makahibalo sang bisan ano.” Huo, ang patay pareho lang sa isa nga nagakatulog  sing hamuok nga wala gid sing animo. Wala na sila nagaluntad kag indi na makahimo sing maayo ukon makahalit sa aton.

Pero, may mga tawo nga nagasiling nga naistorya kuno nila ang mga patay. Paano ini natabo? Ginapaathag sang Biblia nga sang una, madamo nga anghel ang nagrebelde sa Dios. (2 Pedro 2:4) Ining malaut nga mga espiritu ginatawag nga mga demonyo kag ginatinguhaan nila nga patalangon ang mga tawo. (1 Timoteo 4:1) Ang isa sang ila mga paagi para mahimo ini amo ang pagpakunokuno nga sila ang patay, gani ginapapati ang mga tawo nga ang mga patay nagakabuhi pa sa pihak nga kalibutan.

3. Kahilwayan sa sayop nga kahadlok sa kamatayon. Suno sa Biblia, ang kamatayon isa ka kaaway. (1 Corinto 15:26) Gani, natural lang nga mahadlok kita kag indi luyag mapatay. Pero, dapat naton likawan ang sayop nga kahadlok sa kamatayon.

Kon paano nagahilway ang kamatuoran sa Biblia: Magluwas nga ginasugid sang Biblia ang kamatuoran parte sa kahimtangan sang patay, ginasugid man sini ang katuyuan sang Dios nga banhawon ang mga patay. “Magaabot ang tion,” siling ni Jesus, “nga ang tanan nga yara sa handumanan nga mga lulubngan makabati sang iya [ni Cristo] tingog kag magagua.”—Juan 5:28, 29; Binuhatan 24:15.

Ano ang ila kahimtangan kon ‘maggua’ sila? May halimbawa nga ginpakita si Jesus sang ginbanhaw niya ang pila ka tawo. Ang kada isa sa ila nagbalik sa ila orihinal nga kahimtangan—tawo gihapon. (Marcos 5:35-42; Lucas 7:11-17; Juan 11:43, 44) Nahisanto ini sa tinaga nga “pagkabanhaw,” nga nagakahulugan “pagtindog.” Sang nakig-istorya sa tigulang na nga si Daniel, ang Dios nagsiling: “Magapahuway ka [ukon magatulog sa kamatayon], kag magatindug sa imo kapalaran sa katapusan sang mga adlaw.” (Daniel 12:13) Sigurado nga nalugpayan gid si Daniel, amo nga naatubang niya ang kamatayon nga may kaisog kag dignidad!

Ang isa sa mga rason nga nagkari si Jesus sa duta amo ang “pagbantala sing kahilwayan sa mga bihag”—mga naulipon sa butig nga mga pagpati. (Lucas 4:18) Bangod ang iya panudlo nabase sa Biblia, padayon sini nga ginahilway ang katawhan adlaw-adlaw. Nagalaum gid kami nga ang kamatuoran sa Biblia magahatag man sa imo sing dayon nga kahilwayan.

NAMANGKOT KA BALA?

Paano kita ginahilway sang kamatuoran sa Biblia gikan sa

● disparatis—Isaias 8:19, 20; 65:11, 12.

● kahadlok sa patay?—Manugwali 9:5; Juan 11:11, 14.

● kahadlok sa kamatayon?—Juan 5:28, 29; Binuhatan 24:15.

[Blurb sa pahina 11]

Ang kamatuoran sa Biblia nagahilway sa mga tawo gikan sa disparatis, kahadlok sa patay, kag sayop nga kahadlok sa kamatayon