Magdiretso sa kaundan

Magdiretso sa listahan sang kaundan

 Pamangkot sang mga Pamatan-on

Ngaa Dapat Magtambong sa Miting sang mga Cristiano?

Ngaa Dapat Magtambong sa Miting sang mga Cristiano?

NANAMIAN KA BALA MAGTAMBONG SA MGA MITING?

HUO → PADAYUNA ANG IMO GINAHIMO

WALA → ANO ANG PUEDE MO HIMUON?

GINSUGO sang Biblia ang mga Cristiano nga magtipon para magsimba. (Hebreo 10:25) Pero ano ang himuon mo kon wala ka nanamian magtambong? Paano kon nagalagaw ang imo pensar kag nagaimadyin kon ano tani ang imo ginahimo kon wala ka sa miting? Maghimo sing mga pagbag-o paagi sa pagsunod sa isa ukon kapin pa nga mga panugda sa masunod nga mga pahina.

1. HIMUA SING REGULAR

Teksto sa Biblia: “Dili pagpabay-i ang aton mga pagtilipon, subong sang pamatasan sang pila ka mga tawo.”—Hebreo 10:25, Biblia sang Katilingban sang mga Kristiano.

Ngaa dapat mo himuon sing regular ang isa ka butang nga wala ka man nanamian? Kay kon himuon mo ini, manamian ka na sa ulihi! Pamensara ini: Paano ka mangin sagad sa isa ka sports kag manamian sa sini, kon talagsa ka lang nagapraktis? Amo man sini sa miting sang mga Cristiano. Kon pirme ka nagatambong, mas magasuod ka kay Jehova kag mas gusto mo Sia alagaron. Bangod sini, manamian ka na sa pagtambong!—Mateo 5:3.

Tip: Kada tapos sang miting, pasalamati ang bisan isa lang nga may bahin. Isulat kon ano ang isa ka butang sa miting nga nakabulig sa imo. Kag bangod ang kalabanan nga ginahambalan sa miting parte sa pagministeryo, tinguhai nga mapauswag ang imo paagi sa pagsugid sa iban sang imo mga ginapatihan. Kon himuon mo ini, mas maapresyar mo ang imo matun-an sa mga miting.

“Halin sang bata pa ako, ginatudluan ako nga dapat magtambong gid sa mga miting. Bangod naanad ako nga wala gid nagaabsent, nadala ko ini asta subong.”—Kelsey.

Ang punto: Ang mga regular nga nagatambong, mas nanamian na sa mga miting, kag madamo pa sila sing natun-an!

 2. MAMATI SING MAAYO

Teksto sa Biblia: “Talupangda ninyo kon paano kamo nagapamati.”—Lucas 8:18.

Suno sa mga researcher, pagkatapos sang isa ka adlaw nga presentasyon, malipatan na sang kalabanan nga tagpalamati ang 60 porsiento sang ila nabatian. Kon ang imo kuarta daw amo sini kadasig madula, indi bala nga dapat halungan mo gid ini?

Tip: Pungko ka upod sa imo ginikanan malapit sa stage para indi ka dali madisturbo. Isulat ang importante nga mga punto. Bisan pa lainlain ang paagi sang kada isa sa pagtuon, makabulig ang pagsulat nga masentro mo ang imo atension sa humalambal kag magamit mo pa ini sa ulihi.

“Sang una natak-an gid ako mamati sa mga miting, pero lain na subong. Ginapamensar ko kon ngaa nagatambong ako. Indi lang ini isa ka ritwal, pareho sang pagkadto sa simbahan. Nagatambong ako sa mga miting para magsimba kag magtuon sang mga butang nga magamit ko sa akon pagkabuhi.”—Kathleen.

Ang punto: Kon magkadto ka sa miting kag wala ka namati, daw pareho lang nga nagkadto ka sa punsion kag wala ka nagkaon.

 3. MAGPAKIGBAHIN

Teksto sa Biblia: “Subong nga ang salsalon mapatalom sang salsalon man, ang tawo makatuon sa iya kapareho nga tawo.”—Hulubaton 27:17, Ang Pulong sang Dios, APD.

Subong pamatan-on, may importante ka nga papel sa mga miting sa kongregasyon. Daku ang mabulig sang imo pagtambong kag pagpakigbahin, nagakomento ka man ukon nagapakig-istorya sa pareho mo nga Cristiano.

Tip: Tinguhai nga makakomento ka sing bisan isa lang sa mga bahin nga may pamangkot kag sabat. Magboluntaryo sa pagpaninlo kag sa iban pa nga ulubrahon antes sang miting, sa tion sang miting, kag pagkatapos sang miting. Istoryaha ang tawo nga talagsa mo lang maistorya.

“Sang tin-edyer pa ako, nagaboluntaryo ako sa pagpanghatag sing mikropono kag paghanda sang stage para sa miting. Bangod sini, nabatyagan ko nga kinahanglan ako, kag dapat gid ako magtambong kag magkadto sing temprano. Nakabulig ini sa akon nga mangin mas interesado sa espirituwal nga mga butang.”—Miles.

Ang punto: Indi ka lang magpungko, magbulig ka! Mas malipay ka kon nagapakigbahin ka sangsa nagatan-aw ka lang.

Ang iban pa nga artikulo sang “Young People Ask” makita sa Web site nga www.watchtower.org/ype

[Kahon/Mga Retrato sa pahina 21]

IMBITADO KA!

Gusto mo bala

● Mahibaluan ang kamatuoran parte sa Dios?

● Mangin mas maayo nga tawo?

● Makakita sing maayo nga mga abyan?

Ang miting sang mga Saksi ni Jehova makabulig sa imo nga mahimo ini. Makaduha sa isa ka semana sila nga nagatipon sa ila mga Kingdom Hall para magsimba. Wala sing koleksion nga ginahimo, kag ang tanan imbitado.

Ang mga Kingdom Hall indi pareho sa mga simbahan nga ginakadtuan mo. Sa miting sang mga Saksi ni Jehova, ginapadaku gid ang pagtuon sa Biblia. Matun-an mo man diri kon paano ang Pulong sang Dios makabulig sa imo nga mangin maayo ang imo kabuhi!—Deuteronomio 31:12; Isaias 48:17.

Sai—Sang una ko nga kadto sa Kingdom Hall, nakibot ako nga wala ini sang mga santos, wala man sing nakasutana, kag wala sing may nagapangolekta sing kuarta. Gin-abiabi ako sang tanan. Mahapos intiendihon ang ginabinagbinag sa miting, kag eksakto gid ang mga ginahambalan diri. Amo ini ang kamatuoran nga ginapangita ko!

Deyanira—Katorse anyos ako sang una ako nga nagtambong sa miting sang mga Saksi ni Jehova. Gin-abiabi ako sang tanan. Nalipay gid sila nga nagtambong ako, kag interesado gid sila sa akon. Bangod sini, wala na ako nahuya nga magtambong liwat!

[Kahon/Piktyur sa pahina 22]

Hibalua kon ano nga reperensia ang gamiton sa masunod nga miting sa kongregasyon. Magpili sang isa ka bahin sa miting nga nanamian mo gid kag . . .

GUNTINGA KAG KOPYAHA

Sulati ang masunod antes ka magtambong sa miting.

Bahin sa miting:

․․․․․

Ang gusto ko mahibaluan sa sini nga topiko:

․․․․․

Sulati ang masunod pagkatapos sang bahin.

Ang natun-an ko:

․․․․․

Ang nanamian ko gid sa bahin sang ispeker nga ihambal ko sa iya:

․․․․․