Magdiretso sa kaundan

Magdiretso sa listahan sang kaundan

Nagmadinalag-on ang Ikaduha nga Pamilya

Nagmadinalag-on ang Ikaduha nga Pamilya

Nagmadinalag-on ang Ikaduha nga Pamilya

INDI LANG KAUPOD SA BALAY

Ang 20 anyos nga bata nga babayi ni Philip nga si Elise nagaistar pa sa ila balay kag amo ang nagahimo sang mga ulubrahon sa balay. Nagpakasal si Philip kay Louise. Mangin maayo ayhan ang relasyon ni Elise kag Louise?

Louise: Indi kami magsahuanay sang primero. Nanamian ako magtener kag mag-obra sa sulod sang balay.

Elise: Gin-areglar ni Louise ang balay kag madamo sia sing ginpanghaboy. Isa ka bes, nanghimos man ako. Lain ang nabutangan ko sang pila ka gamit kay indi ko na madumduman ang naplastaran sini. Naakig si Louise, kag nagbaisay kami. Isa ka semana kami nga wala nagbugnuhanay.

Louise: Isa ka bes, ginsilingan ko si Elise, “Wala ko kabalo kon ano ang matabo sa aton, pero indi ako makasaho nga nagaamo kita sini.” Sina nga gab-i, ginkadtuan niya ako kag nangayo sing pasaylo. Ginhakos ko sia kag naghibi kami.

Elise: Wala ginkuha ni Louise ang akon pila ka piktyur sa dingding, kag wala man ginkuha ni Tatay ang suga nga ginbutang ko sa sala. Daw ka gamay man lang sini nga butang, pero nakabulig ini sa akon nga mabatyagan nga wala nagbag-o ang tanan sa balay. Nagapasalamat man ako sa pag-atipan ni Louise sa akon manghod nga lalaki kon ara sia sa amon. Duha na ka tuig ang nagligad, kag ginakabig ko na sia nga bahin sang amon pamilya.

Louise: Indi ko lang upod sa balay si Elise, kundi amiga ko man sia.

“MAS IMPORTANTE ANG PAGHIUSA”

Sanday Anton kag Marelize may tig-tatlo ka bata sang nagpakasal sila anom ka tuig na ang nagligad.

Anton: Naga-camping kami nga pamilya, kag may tion kami para sa tagsa ka bata. Pila pa ka tuig kag naka-adjust ang amon pamilya. Pero subong nasolbar na ang kalabanan namon nga problema.

Marelize: Importante gid nga tamdon namon ang mga kabataan subong “amon,” indi “imo kag akon.” Nadumduman ko pa nga naglalain ako sang abi ko indi husto ang pagdisiplina ni Anton sa isa ko bata nga lalaki kay ginpapungko niya sa unahan sang salakyan ang iya bata nga babayi. Natun-an ko nga mas importante ang paghiusa sangsa pagpungko sa unahan. Ginatinguhaan namon nga pareho ang amon pagtratar sa ila.

Wala ko man ginaistorya ang sinadya namon sa una ko nga pamilya, kay basi magbatyag ang akon pamilya subong nga wala kami nanamian sa ila. Sa baylo, ginapasalamatan ko sila.

‘MAGHATAG ANAY SING KOMENDASYON’

Nagpakasal sanday Francis kag Cecelia apat na ka tuig ang nagligad. May tatlo ka dalagku nga kabataan si Cecelia, kag may isa ka tin-edyer nga bata nga lalaki si Francis.

Francis: Ginatinguhaan ko gid nga indi matahap ang mga kabataan sa akon. Pirme kami nagaupdanay magkaon, kag amo man ini ang tion nga makaistoryahanay kami. Ginapalig-on ko man sila nga magbulig sa mga ulubrahon sa balay, kay makabenepisyo sa sini ang pamilya.

Cecelia: Ginaistorya ko gid ang amon tagsa ka bata kon ano ang ila mga ginakabalak-an kag mga gusto. Kon magtipon ang amon pamilya, nagahatag anay kami sing komendasyon dayon ginahambal namon kon ano pa ang dapat pauswagon. Kag kon makasala ako, ginabaton ko ini kag nagapangayo sing pasaylo.

GINPADAKU SANG DUHA KA STEPPARENT

Wala na makita sang 20 anyos nga si Yuki ang iya tatay sugod pa sang lima sia ka tuig. Sang ulihi, namana si Nanay niya kay Tomonori, pero napatay si Nanay niya sang pulo sia ka tuig. Pagligad sang lima ka tuig, ang iya stepfather nga si Tomonori nangasawa kay Mihoko, amo nga ginpadaku sia sang duha ka stepparent.

Yuki: Sang nangasawa liwat ang akon stepfather, naghunahuna ako, “Indi ko kinahanglan sing manding. Kadamo na sing pagbag-o sa akon pamilya.” Daw indi ko ini mabaton, gani indi maayo ang akon pagtamod sa iya.

Mihoko: Bisan pa wala ako ginpilit sang akon bana nga palanggaon ang iya manak pareho sang iya pagpalangga, gintinguhaan ko nga mangin suod kay Yuki. Gintinguhaan namon nga mapadayon niya ang iya rutina, lakip na ang iya pagsimba sa Dios, paglingawlingaw, kag pagpakig-istorya sa iya pagkatapos namon panihapon. Mas naintiendihan ko pa gid sia sang naistoryahan namon ang pagkapatay sang iya nanay.

Sang nagbusong ako, nabalaka kami kay Yuki kag gusto namon nga pasaligon sia nga bahin sia sang pamilya. Ginapabulig namon sia sa pagpakaon, pagpaligo, kag pag-ilis sang dayaper sang bata, kag ginadayaw namon sia sa atubangan sang iban. Suod katama si Itsuki kay Yuki. Antes pa sia makahambal sing “papa” ukon “mama” makahibalo na sia maghambal sing niinii, buot silingon manong.

Yuki: Subong manak, natural lang nga magbatyag ka nga nagaisahanon lang kag biniyaan. Mahimo ginasugid mo ini sa iban, pero daw indi ka nila mahangpan. Apang nalipay gid ako kay ginabuligan ako sang pareho ko nga mga Cristiano. Subong, wala na ako natahap sa akon manding. Ginahatagan niya ako sing maayo nga mga laygay, kag masugid ko na sa iya ang akon ginabatyag.

[Blurb sa pahina 9]

Indi mangampo! Mahimo mangin malipayon kag madinalag-on ang ikaduha nga pamilya