Magdiretso sa kaundan

Magdiretso sa listahan sang kaundan

Impluwensia nga Mangin Indi Bunayag

Impluwensia nga Mangin Indi Bunayag

 Impluwensia nga Mangin Indi Bunayag

“Dinumaan na ang pagkabunayag sa negosyo, kag ang mga bunayag nagakaputo.”—Stephen, U.S.A.

NAGAUGYON ka bala sa sini? Matuod, may bentaha ang pagkadibunayag, pero umalagi lang ini. Gani, ang mga tawo nga gusto mangin bunayag matilawan gid sa masunod nga mga sitwasyon.

Personal nga Tentasyon. Sin-o bala ang indi malipay kon mas madamo sia sing kuarta ukon mga luho sa kabuhi? Gani, kon may kahigayunan nga makakuarta paagi sa pagdinaya, mabudlay ini balibaran.

● “Ako ang nagaaprobar sing mga kontrata para sa amon kompanya. Pirme ako ginatanyagan sing hamham. Mabudlay ini pangindian.”—Franz, Middle East.

Para Magdaku ang Kita. Sining karon lang, ang mga negosyo sa bilog nga kalibutan apektado gid sang pagnubo sang ekonomiya. Dapat man sila magdungan sa madasig nga pag-uswag sang teknolohiya kag grabe nga kompetisyon sa ila lugar kag sa bilog nga kalibutan. Mahimo magbatyag ang mga empleyado nga para malab-ot ang ginapangayo sang mga tag-iya kag mga manedyer, dapat magdinaya sila.

● “Nagapati kami nga kinahanglan namon ini himuon . . . kay kon indi, maputo ang amon kompanya.”—Reinhard Siekaczek, gin-aresto bangod sa paghamham.—The New York Times.

Impluwensia sang Iban. Kon kaisa, ang mga katrabaho ukon mga kostumer amo pa ang nagasulsol ukon nagasugo sa imo nga magbinutig ka upod sa ila.

● “Ang manedyer sang isa namon ka importante nga kliyente nagsiling nga untaton na niya ang ila transaksion sa amon kon wala ako sing ihatag nga hamham sa iya.”—Johan, Bagatnan nga Aprika.

Kultura. Sa pila ka kultura, kinaandan na ang paghatag sing regalo kon may transaksion ka. Mabudlay mahibaluan kon nagadinaya ang isa ukon wala, kon ang basihan amo lang ang kadakuon kag rason sa paghatag sing regalo. Sa madamo nga lugar, ang kurakot nga mga opisyal nagapangayo sing kuarta antes nila himuon ang ila obligasyon kag para unahon ka nila.

● “Mabudlay pirme hibaluon ang kinalain sang tip sa hamham.”—William, Colombia.

Kahimtangan. Mas grabe ang pagsulay nga magdaya sa mga nagaistar sa mga pungsod nga tama kaimol ukon may mga inaway sibil. Sa sini nga mga lugar, ang mga wala nagapangdaya ukon nagapangawat ginakabig nga indi maayo nga manug-aman sa ila mga pamilya.

● “Ang pagkadibunayag ginakabig nga normal kag indi malain, basta indi ka lang madakpan.”—Tomasi, Congo Kinshasa.

Kon Paano Nadula ang Pagkabunayag

Ang pagsulay nga mangin indi bunayag may daku nga epekto. Sang ginsurbe ang mga manedyer sa Australia, 9 sa 10 ang nagsiling nga  ang paghamham kag korapsion “sala pero indi malikawan.” Nagsiling man sila nga handa nila sikwayon ang ila prinsipio para makuha ang isa ka kontrata ukon para sa kaayuhan sang ila kompanya.

Pero para sa mga nagadinaya, bunayag sila. Paano nila ginapapati ang ila kaugalingon nga bunayag sila? Ang Journal of Marketing Research nagreport: “Nagapangdaya ang iban para makakuarta, pero ginadayaan nila ang ila kaugalingon sa pagpati nga bunayag sila.” Para indi sila pagkonsiensiahon, nagapangita sila sing mga balibad para pakadiutayon, ukon pakamatarungon ang ila pagdinaya.

Halimbawa, may termino sila nga ginagamit para sa pagkadibunayag nga indi masakit pamatian. Ang pagbinutig ukon pagpangdaya amo kuno ang paagi para mapadali ang transaksion. Mahimo nila ini tawgon nga “pabor” ukon “padanlog.”

Ginapamag-an naman sang iban ang kahulugan sang pagkabunayag. Si Tom nga nagaobra sa isa kompanya nga nagapautang, nagsiling: “Ang pagpati sang mga tawo sa pagkabunayag nagadepende sa kon paano nila ini malutsan, indi sa kon ano ang husto.” Si David nga may mataas anay nga posisyon sa iya ulubrahan nagsiling: “Ginapakalain ang pagkadibunayag kon mabalahuba ini, pero wala ini sing problema kon malutsan mo. Ang mga tawo nga makalusot, ginakabig nga maalam.”

Madamo ang nagasiling nga kinahanglan mo magdinaya para magmadinalag-on ka. Ang isa ka madugay na nga negosyante nagsiling: “Bangod sa kompetensia, nagasiling ang mga tawo, ‘Himua ang tanan para makuha mo ina nga obra.’” Pero husto bala ini? Indi ayhan nga ‘ginadayaan nila ang ila kaugalingon paagi sa butig nga pangatarungan’? (Santiago 1:22) Hibalua sa masunod nga artikulo ang praktikal nga mga bentaha sang pagkabunayag.

[Blurb sa pahina 5]

“Ang pagpati sang mga tawo sa pagkabunayag nagadepende sa kon paano nila ini malutsan, indi sa kon ano ang husto”

[Retrato sa pahina 5]

Madamo ang nagasiling nga kinahanglan mo magdinaya para magmadinalag-on ka