Magdiretso sa kaundan

Magdiretso sa listahan sang kaundan

Pagbantay sa Kalibutan

Pagbantay sa Kalibutan

 Pagbantay sa Kalibutan

Sa Germany, 7 sa 10 ka lapsag ang ginahimuan sang ila ginikanan sing profile kag e-mail address ukon ginapost ang ila mga piktyur ukon mga ultrasound image sa Internet. Pero nagapaandam ang mga eksperto nga may epekto ini sa bata asta magdaku sia.—BABY UND FAMILIE, GERMANY.

Suno sa rekord sang gobierno, 14,000 ka babayi ang nagakapatay kada tuig sa Rusya bangod sa pagsakit sa ila sa ila mismo puluy-an.—RIA NOVOSTI, RUSYA.

Ang nagatupa nga niebe sa Mount Everest sa kataason nga 6,858 metros asta 7,752 metros may arsenic kag cadmium nga makahalit sa ginaimnan nga tubig. Ginapatihan nga tawo ang balasulon sini.—SOIL SURVEY HORIZONS, U.S.A.

Ang lamang nga kompanya nga ginatugutan sa pag-imprinta sing Biblia sa China nakaimprinta sing ika-80 ka milyon nga kopya sining karon lang. Nagaimprinta ini sing 1 ka milyon ka Biblia kada bulan—25 porsiento ini sang ginaimprinta sa bilog nga kalibutan.—XINHUA, CHINA.

“Mga sulusobra sa 10 porsiento sa mga adulto nga Amerikano (10.1 porsiento) ang nagbiya sa Katoliko bisan pa ginpadaku sila nga Katoliko.”—NATIONAL CATHOLIC REPORTER, U.S.A.

Mga Kalamidad sang 2010

Ang nagapanguna nga insurance company nagrekord sing 950 ka kalamidad sa bilog nga kalibutan sang 2010. Nalabawan sini ang aberids sang nagligad nga dekada nga 785 kada tuig. Ang lima ka grabe gid nga kalamidad amo ang linog sa Chile, China, kag Haiti; baha sa Pakistan; heat wave sa Rusya, nga nagpatay sa linibo bangod sa kainit kag polusyon sa hangin. Sa aminhan nga Europa naman, ang abo halin sa bulkan sang Iceland, wala man sing direkta nga halit, pero nakaupang ini sa biyahe sang mga eroplano. Sa Australia, ang duha ka beses nga pag-ulan sing dalagku nga yelo nagtuga sing sobra $2 bilyones (U.S.) nga halit. “Ang kabug-usan nga halit, lakip ang mga wala sing insurance,” siling sang The Telegraph sang London, “naglab-ot sing $130 bilyones kon ipaanggid sang nagligad nga tuig nga $50 bilyones.”

Ang mga Neanderthal Bala Pareho sa Aton?

“Madugay na nga ginapatihan nga ang mga Neanderthal mas manubo sa Homo sapiens, pero amat-amat ini nga nagbag-o kay ang masarangan sang mga tawo masarangan man kuno nila,” siling sang New Scientist. Natukiban sining karon lang nga ang mga Neanderthal nagapatindog man sing balay kag dapog, makahibalo magkontrol sing kalayo, nagasuksok sing bayo, nagaluto, nagahimo sing mga gamit kag nakaimbento sang glue para matapik ang baslay sa bangkaw. May mga pamatuod man nga ginatatap nila ang mga nagamasakit, nagasuksok sila sing mga puni, kag ginalubong ang ila mga patay. Suno kay Propesor Erik Trinkaus, antropologo sa Washington University, St. Louis, Missouri, U.S.A., “tawo ang mga Neanderthal kag mahimo nga pareho ang ikasarang sang ila panghunahuna sa aton.”