Magdiretso sa kaundan

Magdiretso sa listahan sang kaundan

Ano ang Tulumuron sang Ginikanan?

Ano ang Tulumuron sang Ginikanan?

 Ang Pagtamod sang Biblia

Ano ang Tulumuron sang Ginikanan?

ANO ang gusto mo matabo sa imo tin-edyer sa ulihi?

A. Mangin pareho gid sa imo.

B. Mangin rebelyuso sa imo.

C. Mangin responsable nga adulto.

Ang pila ka ginikanan nagpili sing Opsyon C, pero ang ila ginahimo nagapakita nga pabor sila sa Opsyon A. Ginapilit nila ang ila mga bata nga sundon ang ila mga prinsipio. Halimbawa, ang ginikanan ang nagapili kon ano nga karera ang kuhaon sang ila bata. Ano ang resulta? Ginasupak sang bata ang iya ginikanan kon makabaton na sia sing gamay nga kahilwayan. Gani, ang mga bata nga ginapilit sang ila ginikanan nga mangin pareho sa ila, nagarebelde.

Kon Ngaa Indi Epektibo ang Sobra nga Pagkontrol

Gusto mo mangin responsable nga adulto ang imo tin-edyer kag makadesisyon sing maalamon. Paano mo ini mahimo? Isa lang ang sigurado: Ang sobra nga pagkontrol sa kabataan indi maayo. Binagbinaga ang duha ka rason.

1. Ang sobra nga pagkontrol sa kabataan wala nabase sa Biblia. Gintuga ni Jehova nga Dios ang mga tawo nga may kahilwayan sa pagbuot. Makapili sila kon ano ang ila gusto nga himuon, maayo man ukon malain. Halimbawa, sang nagsingkal si Cain batok sa iya utod nga si Abel, si Jehova nagsiling sa iya: “Kon nagahimo ka sing maayo, indi ka bala pagbayawon? Kag kon wala ka nagahimo sing maayo, ang sala nagapuut sa gawang; manginsa imo ang iya handum, apang gahumi sia.”—Genesis 4:7.

Talupangda nga sang ginlaygayan ni Jehova si Cain, wala niya ini ginpilit nga magtuman sa iya. Si Cain ang madesisyon kon bala kontrolon niya ang iya kaakig ukon indi. Ano ang aton matun-an sa sini? Wala ginapilit ni Jehova ang iya mga tinuga nga magtuman sa iya, gani indi man pagpilita ang imo mga tin-edyer. *

2. Sa masami, indi maayo ang resulta kon sobra ang pagkontrol mo sa imo kabataan. Halimbawa, ginapilit ka sang isa ka manugbaligya nga magbakal sang ila produkto. Samtang ginapilit ka niya nga baklon ini, mas labi na gid gani nga mamalibad ka bisan kinahanglan mo pa ini. Gusto mo na sia pahalinon kay ginapilit ka gid niya.

Amo man sini ang matabo kon ginapilit mo nga ilugon sang imo tin-edyer ang imo mga talaksan, pagpati, kag tulumuron. “Baklon” ayhan niya ini? Mahimo nga indi gid! Kabaliskaran ang matabo kon piliton mo gid sia, kag indi na niya magustuhan ang imo mga pagsulundan. Masami nga nagakapaslawan ang mga ginikanan kon ginakontrol gid nila ang ila bata. Gani, ano ang mahimo mo?

Imbes nga kontrolon mo ang kabuhi sang imo tin-edyer, paagi sa pagpilit sa iya nga sundon ang imo mga talaksan nga mahimo ginhimo mo sang bata pa sia, ngaa indi mo sia pagbuligan nga makita ang kaayuhan kon himuon niya ang husto? Halimbawa, kon ikaw isa ka Cristiano, ipakita sa iya ang mga benepisyo kon magkabuhi sia suno sa mga prinsipio sang Dios.—Isaias 48:17, 18.

Samtang ginatudluan mo sia, mangin maayo nga halimbawa sa iya. Ipakita sa iya ang maayo nga pamatasan nga gusto mo nga ilugon niya. (1 Corinto 11:1) Ipaathag sa iya kon ngaa amo sina nga mga prinsipio ang imo ginasunod.  (Hulubaton 4:11) Kon matun-an na sang imo bata nga higugmaon ang Dios kag ang Iya pagsulundan, mangin maalamon gid sia sa pagdesisyon bisan wala ka.—Salmo 119:97; Filipos 2:12.

Tudlui Sila sa Pag-obra

Suno sa pahina 2 sini nga magasin, daw kadasig lang mag-abot ang tion nga ‘bayaan sang bata ang iya amay kag ang iya iloy.’ (Genesis 2:24) Gani, gusto gid sang isa ka ginikanan nga matudluan sing obra ang iya bata para magamit niya sa iya pagdaku. Binagbinaga ang pila ka obra nga kinahanglan niya himuon samtang ara pa sia sa inyo balay.

Mga Ulubrahon sa Balay. Ang imo bala tin-edyer makahibalo magluto, maglaba, mamalantsa, maninlo ukon manghimos sang iya kuarto? Makahibalo bala sia magmentinar ukon magkay-o sing diutay nga guba sang salakyan? Kon amo, maatipan na niya ang iya panimalay sa ulihi. Si apostol Pablo nagsiling: “Natun-an ko nga mangin kontento bisan ano ang akon kahimtangan.”—Filipos 4:11.

Pagpakig-angot sa Iban. (Santiago 3:17) Maayo bala makig-angot sa iban ang imo tin-edyer? Masolbar bala niya ang mga di-paghangpanay sing kalmado kag mainayuhon? Gintudluan mo bala sia nga respetuhon ang iban kag solbaron sing mahidaiton ang mga problema? (Efeso 4:29, 31, 32) Ang Biblia nagsiling: “Padunggi ang tanan nga sahi sang mga tawo.”—1 Pedro 2:17.

Pagbadyet sing Kuarta. (Lucas 14:28) Mabuligan mo bala ang imo tin-edyer nga makatuon sing bokasyonal nga trabaho, maggasto suno sa iya kita, kag indi mangutang? Gintudluan mo bala sia nga magsupot para sa mga kinahanglanon nga mga butang, indi magpataka sing bakal, kag mangin kontento? (Hulubaton 22:7) Si Pablo nagsulat: “Kon kita may pagkaon, panapton kag pasilungan, mangin kontento na kita.”—1 Timoteo 6:8.

Ang mga tin-edyer nga natudluan sa pagsunod sa matarong nga mga prinsipio kag kinahanglanon nga mga obra para magamit sa ila pangabuhi, handa gid sa pagkaadulto. Gani, nalab-ot sang mga ginikanan ang ila tulumuron.—Hulubaton 23:24.

[Nota]

^ par. 11 Para sa dugang nga impormasyon, tan-awa ang Pebrero 1, 2011 nga Ang Lalantawan pahina 18-19.

NAMANGKOT KA BALA?

● Ano ang imo tulumuron subong isa ka ginikanan?—Hebreo 5:14.

● Ano ang mga responsibilidad sang imo tin-edyer kon mangin adulto na sia?—Josue 24:15.

[Mga Retrato sa pahina 25]

Ano ang gusto mo matabo sa imo tin-edyer sa ulihi?

Pareho gid sa imo . . .

Rebelyuso

Responsable