Magdiretso sa kaundan

Magdiretso sa listahan sang kaundan

“Sulati Ninyo Si Anton!”

“Sulati Ninyo Si Anton!”

 “Sulati Ninyo Si Anton!”

● Sa malayo nga lugar sang Schelkan sa Stavropol’ Kray, sa Rusya, nagaistar ang isa ka tin-edyer nga Saksi ni Jehova nga si Anton. Bata pa lang sia sang nahibaluan nga may Duchenne muscular dystrophy sia. Isa ini ka balatian nga wala sing bulong nga madasig nga nagapakupos sang mga maskulo. Sa masami nagakapatay ang pasyente antes mag-20 anyos. Sang nuebe anyos si Anton, indi na sia makalakat kag makabangon.

Sang nagbisita ang mag-asawa nga sanday Yevgeny kag Diana sa isa ka kongregasyon sang mga Saksi, nakilala nila si Anton. “Bisan tama kaluya si Anton sa pisikal,” siling ni Diana, “mabakod gid ang iya pagtuo sa Dios. Napatay ang iya magulang nga lalaki sa amo man nga balatian sa edad nga 19. Nahibaluan ni Anton nga indi na sia magdugay. Pero malipayon sia gihapon kag positibo.”

Ginpalig-on ni Diana kag sang iya bana si Anton nga dugangan pa ang iya pagpanaksi paagi sa pagsulat sa mga tawo sa kaingod nga mga lugar. Sang 2005, nakapadala sia sing mga 500 ka sulat. Nasubuan sia kay wala gid sing may nagbalos. Pero padayon sia nga nagsulat kag nangamuyo nga giyahan sia kon paano mabuligan ang madamo nga tawo, bisan pa may balatian sia.

Isa ka adlaw samtang nagabasa si Anton sang isa ka pamantalaan, nabasa niya nga may babayi nga nagamasakit kag nagakinahanglan sing pagpalig-on. Ginsulatan sia ni Anton, kag ang bahin sini, ginsulat man sa amo nga pamantalaan: “Bisan pa indi na mag-ayo ang akon balatian, ang pagbasa sing Biblia nakabulig sa akon nga maglig-on ang akon paglaum sa palaabuton,” sulat niya. “Nalipay gid ako nga makabaton sing sulat, kag ginapaabot ko gid ini.”

Natandog gid ang babayi sa sulat ni Anton amo nga nagsulat sia sa pamantalaan. Gin-imprinta ini nga may tig-ulo, “Sulati Ninyo si Anton!” Nagpasalamat gid sia sa pagpalig-on ni Anton parte sa pagbasa sing Biblia kag nagsiling: “Buligan ta si Anton! Sabta ninyo ang iya mga sulat. Kinahanglan gid niya ang inyo makapalig-on nga mga pulong!” Nasulat man diri ang adres ni Anton.

Nag-inabot lang ang mga sulat para kay Anton sa ila gamay nga post office—mga 30 ka sulat kada adlaw! Naghalin ini sa bilog nga Rusya, Germany, Pransia, Estonia, Lithuania, Latvia kag iban pa. Nakabaton man sia sing ginatos ka sulat halin sa bumalasa sang pamantalaan. “Nalipay gid si Anton!” siling ni Diana. “Ginatos na ka tawo ang iya ginasulatan kag ginapaambitan sang iya nabase sa Biblia nga pagtuo.”

Sobra isa ka tuig nga ginbalusan ni Anton ang mga nagsulat sa iya, kag ginsugiran sila sing kamatuoran sa Biblia. Sang nagluya na ang iya mga kamot, gindikta na lang niya ang iya isulat. Sang Septiembre 2008, napatay si Anton sa edad nga 20. Bisan nagluya sia, madamo sia sing napalig-on bangod sa iya pagtuo kag handum nga mapanaksihan ang iban.