Pagbantay sa Kalibutan

Ginsurbe sang British Broadcasting Corporation ang 13,000 ka tawo sa 26 ka pungsod kag nagapakita nga “ang korapsion amo ang pirme ginaistoryahan nga problema sa bug-os nga kalibutan.” Pero, ang ginakabig nga pinakagrabe nga problema amo ang kaimulon.—BBC NEWS, BRITANYA.

“Ginabutangan sang mga simbahan sa bilog nga [Estados Unidos] sing GPS ang estatwa sang lapsag nga si Jesus sa ila mga belen. Sang sini lang nga tinuig, nagdamo ang makawat sing mga estatwa sang belen sa bilog nga pungsod.”—THE WEEK, U.S.A.

“Ang komite sang [U.S.] Food and Drug Administration nagrekomendar nga indi pagpasugtan nga magdonar sing dugo ang mga tawo nga may chronic fatigue syndrome, kay nagakabalaka sila nga basi may isa ka virus nga mahimo ginabangdan sini nga balatian.”—THE WALL STREET JOURNAL, U.S.A.

Kasanag nga Makapatay sang Bakterya

May bag-o nga naimbento sa University of Strathclyde, sa Glasgow, Scotland nga nagagamit sing tama ka baskog nga kasanag para mapatay ang maisog nga mga bakterya sa ospital. Mas epektibo ini sa pagpatay sang kagaw sangsa pagpaninlo kag paggamit sing pamatay-kagaw.

Pagkalbo sa Kagulangan kag ang Malaria

Ang pagkalbo sa kagulangan amo ang rason sang halos 50 porsiento nga pagdamo sang kaso sang malaria. Amo ini ang ginsiling sang mga researcher nga nagtuon sa mga rekord sang 54 ka distrito sang Brazil kag naggamit sing mga laragway sang pagpangtroso nga nakuha sang satelayt. Ang lamok nga ginahalinan gid sang malaria sa sina nga mga lugar amo ang Anopheles darlingi. “Ang mga nakalbo nga kagulangan nga may mga danaw kag indi gawa masilakan sang adlaw amo ang ginaistaran sini nga lamok,” siling ni Sarah Olson, ang nanguna sa sini nga research. Ang mga lugar nga may madamo sing malaria amo ang mga lugar nga mas madamo ang napulod nga mga kahoy.

Nagalupad nga Lukos

May mga piktyur nga nagapamatuod nga ang pila ka klase sang lukos makalupad paagi sa pagbutyog. Naobserbahan sang mga biologo nga “ang lukos nga mga walo ka pulgada kadaku makalupad sing asta sa duha ka metros paibabaw kag makabutyog sing asta 10 metros kalayo paagi sa pagkapaykapay kag paagi sa pagpatiyog sang ila mga gawaygaway,” siling sang Scientific American. Ginasuyop sini ang tubig kag ginabuga nga daw pareho sa jet para makabuylo. Ginapakita sang mga piktyur nga daw ginagamit sini ang ila mga kapay bilang pakpak.