Paano Mangin Popular?

ANG industriya sang musika, kadasig magbag-o kag grabe ang kompetisyon. Madasig man magbag-o ang teknolohiya kag ang gusto sang mga tawo. Ang musika nga popular subong, buas indi na. Ang mga promotor “pirme nagapangita sing bag-o nga kanta nga magustuhan sang madamo,” siling sang eksperto nga si Kelli S. Burns. Pero indi ini mahapos. “Madamo nga kabataan ang nagahandum nga mangin sikat nga singer, . . . pero madugay kag mabudlay ini matuman,” siling sang isa ka libro parte sa industriya sang musika.—Tan-awa ang kahon nga “Mga Pagbag-o sa Industriya sang Musika,” sa pahina 6.

Paghimo sing mga Liriko

Gusto sang mga manugkomposo (1) nga makahimo sing liriko nga nagapabutyag sang paglaum, handum, kag balatyagon sang mga tawo. Ano ang pirme nga topiko sang kanta? Gugma. Ginatinguhaan sang mga manugkomposo nga maghimo sing malip-ot nga mga liriko para madali ini masaulo kag madumduman sang tagpalamati.

Dayon, irekord ini sang manugkomposo kag pamatian sang recording company. Kon sa banta nila mangin mabakal ini nga kanta, mahimo nila tanyagan sing kontrata (2) ang nagkanta. Pero kon indi, (halimbawa indi sia  sikat) mahimo nila baklon ang kanta kag ipakanta sa sikat nga singer.

Sa Estudyo

Para may magdumala sa pagrekord (3), ang recording company nagakuha sing eksperiensiado nga prodyuser. Sia ang nagadesisyon kon maayo ang kanta ukon estilo. Sia man ang nagapangita sing mga recording studio, manug-areglar sing musika, manugkopya, musikero, backup nga bokalista, manugdumala sa pagrekord, kag mga kagamitan para mangin de-kalidad kag mabakal ang kanta.

Indi dungan ang pagrekord. Masami ginauna ang tambor, gitara, baho nga gitara, kag organ. Dayon, ginadugang ang mga tingog sang bokalista, backup singer, instrumento, kag sound effect para makahimo sing orihinal nga kopya sang rekording (4).

Pagbaligya

Para mangin mabakal ang kanta, nagahimo sing music video (5) ang mga recording company. Ining tatlo asta lima ka minuto nga video nagapakita sing aktual nga pagkanta sang singer para mas makilala sia kag makaganansia sila.

Mas madamo ang nagabakal sing album sang singer sa mga lugar nga iya ginakonsiertuhan (6). Gani, gina-promote nila ang album paagi sa pagkonsierto sa iban nga lugar. Ang kalabanan nga singer may Web site (7).  Mabatian mo diri ang ila musika, makita ang ila mga piktyur, video, blog, iskedyul sang ila konsierto, link sa mga nagaidolo sa ila, kag labi na gid ang mga balaligyaan sing musika sa Internet.

Sin-o ang magahimo sang kanta nga popular? Siempre, ikaw nga nagapamati. Ti, ano ang imo basihan sa pagpili sang musika? Ang tunog bala, ang singer, ukon ang mensahe sini? Importante gid ini nga pamangkot, bangod daku ang impluwensia sang musika sa aton. Nagapahanumdom ini sa aton sa importante nga laygay sang aton Manunuga: “Bantayi ang imo tagiposoon sa bug-os nga kakugi; kay sa sini nagagowa ang mga ilig sang kabuhi.”—Hulubaton 4:23.

Paano mo ini matuman? Kon ginikanan ka, ano ang imo himuon para indi mahalitan sang musika ang hunahuna, balatyagon, kag ang kaangtanan sang imo kabataan sa Dios?

[Kahon sa pahina 6]

Mga Pagbag-o sa Industriya sang Musika

Ang Internet kag barato nga mga gadyet kag program sa pagrekord amo ang rason sa pag-uswag sang industriya sang musika. Sa karon, ang mga musikero puede makahimo sing de-kalidad nga rekording bisan ara lang sa ila balay kag mabatian ini sa bilog nga kalibutan. Suno sa magasin nga The Economist, ang “pila ka sikat nga mga singer wala na nagaagi sa recording company.”