Magdiretso sa kaundan

Magdiretso sa listahan sang kaundan

Maayo Para sa Tagipusuon kag Panglawas

Maayo Para sa Tagipusuon kag Panglawas

 Maayo Para sa Tagipusuon kag Panglawas

“Ang malinong nga tagiposoon amo ang kabuhi sang unud.”—HULUBATON 14:30.

“Ang tagiposoon nga malipayon maayo nga bolong.”—HULUBATON 17:22.

● Ining simple pero importante nga mga tinaga ginsiling ni Hari Solomon sang Israel mga tatlo na ka libo ka tuig ang nagligad. * Pero matuod bala ini? Ano ang ginapakita sang medisina subong?

Parte sa kinatuhayan sang maakigon nga tawo kag sang may malinong nga tagipusuon, ang Journal of the American College of Cardiology nagsiling: “Ginapakita sang mga pagtuon subong nga ang kaakig kag kaugot mahimo magresulta sa CHD [coronary heart disease].” Gani, ang Journal nagsiling nga para malikawan kag mabulong ang CHD, indi lang bulong ang kinahanglan, kundi pagkontrol man sa hunahuna ilabi na sa kaakig kag kaugot. Buot silingon, husto ang ginasiling sang Biblia nga mangin maayo ang panglawas sang tawo nga may malinong nga tagipusuon.

Amo man sini ang epekto sang malipayon nga tagipusuon. Ang isa ka doktor sa Scotland nga si Derek Cox nagsiling sa isa ka report sa BBC News: “Kon malipayon ka, diutay lang ang imo risgo nga magmasakit sangsa mga indi malipayon.” Nagsiling man ini nga report: “Ang mga malipayon nga tawo talagsa lang nagabalatian sa tagipusuon kag maistrok.”

Ngaa husto ang ginsiling ni Solomon, kag sang iban pa nga manunulat sang Biblia? Simple lang ang sabat. “Ginhatagan sang Dios si Solomon sing labi nga kaalam kag paghangup.” (1 Hari 4:29, Biblia sang Katilingban sang mga Kristiano, BKK) Isa pa, mahapos mahangpan ang ginsiling ni Solomon amo nga makabenepisyo gid ang tanan. Kag wala ini sing bayad!

Maayo gid kon basahon mo ang Biblia adlaw-adlaw. Pareho sang naeksperiensiahan sang minilyon, malipay ka man kon “ang kaalam magasulud sa imo tagiposoon, kag ang ihibalo manginkahamut-an sa imo kalag; ang pagbinagbinag magabantay sa imo; ang paghangup magatipig sa imo.” (Hulubaton 2:10, 11) Makapalig-on gid ini, indi bala?

[Nota]

^ par. 4 Sa Biblia, ang tinaga nga tagipusuon masami nga nagapatuhoy sa nasulod nga pagkatawo sang isa, lakip ang iya emosyon.