Magdiretso sa kaundan

Magdiretso sa listahan sang kaundan

Ngaa Ginadumtan ang Matuod nga mga Sumulunod ni Jesus?

Ngaa Ginadumtan ang Matuod nga mga Sumulunod ni Jesus?

 Ang Pagtamod sang Biblia

Ngaa Ginadumtan ang Matuod nga mga Sumulunod ni Jesus?

“Itugyan kamo sang mga tawo sa kapipit-an kag patyon kamo, kag dumtan kamo sang tanan nga pungsod tungod sa akon ngalan.”—MATEO 24:9.

GINSILING ini ni Jesus pila lang ka adlaw antes sia ginpatay. Sang gab-i antes sang iya kamatayon, nagsiling sia sa iya matutom nga mga apostoles: “Kon ginhingabot nila ako, hingabuton man nila kamo.” (Juan 15:20, 21) Ngaa ginadumtan ang mga nagatuman kag nagasunod kay Jesus? Indi bala nga nagsakripisyo si Jesus para sa iban, naglugpay sa mga imol, kag naghatag sing paglaum sa mga ginapigos?

Ginasabat ini sang Biblia. Kon usisaon naton ini, mahibaluan naton kon ngaa ang mga nagasunod sa Cristo ginahingabot man pareho sa iya.

Wala Sila Kahibalo sang Ila Ginahimo

Nagsiling si Jesus sa iya mga sumulunod: “Ang tion magaabot nga ang tagsatagsa nga nagapatay sa inyo magahunahuna nga nagahimo sia sang sagrado nga pag-alagad sa Dios. Apang himuon nila ini nga mga butang bangod wala sila makakilala sa Amay ukon sa akon.” (Juan 16:2, 3) Madamo gid man nga manughingabot ang nagapati nga nagaalagad sila sa Dios nga ginaalagad ni Jesus, pero naimpluwensiahan sila sang butig nga mga pagpati kag tradisyon sang relihion. “May kakugi sila sa Dios; apang indi suno sa sibu nga ihibalo.” (Roma 10:2) Isa sa ila amo si Saulo sang Tarso, nga nangin Cristianong si apostol Pablo.

Miembro si Saulo sang grupo nga ginatawag Fariseo, ang gamhanan kag maimpluwensia nga sekta sang Judiyo nga nagapamatok sa mga Cristiano. “Sadto manugpasipala ako kag manughingabot kag tampalasan nga tawo,” siling ni Saulo sang ulihi. Nagsiling pa gid sia: “Wala ako sing nahibaluan kag nagpanghikot nga wala sing pagtuo.” (1 Timoteo 1:12, 13) Pero sang natun-an niya ang kamatuoran parte sa Dios kag kay Jesus, nagbag-o sia gilayon.

Amo man sini ang nagakatabo sa madamo nga manughingabot nga nangin Cristiano. Pareho ni Saulo, ang pila sa ila ginhingabot man. Pero, wala sila magbalos sing malaut sa malaut kundi ginsunod nila ang laygay ni Jesus: “Padayon nga higugmaa ang inyo mga kaaway kag ipangamuyo ang mga nagahingabot sa inyo.” (Mateo 5:44) Ginatinguhaan sang mga Saksi ni Jehova nga sundon ini kag nagalaum sila nga magbag-o ang pila ka manugpamatok, pareho ni Saulo.

Ang Iban sa Ila Nahisa

Madamo sa nagapamatok kay Jesus ang nahisa sa iya. Nahibaluan gid sang Romanong gobernador nga si Poncio Pilato nga “gintugyan [si Jesus] sang puno nga mga saserdote bangod sa kahisa” para ilansang sia. (Marcos 15:9, 10) Ngaa nahisa kay Jesus ang Judiyong mga lider sang relihion? Una, bangod malapit si Jesus sa ordinaryo nga mga tawo nga ginapakanubo nila. “Ang bug-os nga kalibutan nagasunod na sa iya,” reklamo sang mga Fariseo. (Juan 12:19) Isa pa, sang ginbaton sang mga tawo ang mensahe sang mga sumulunod sang Cristo, “nahisa gid sila” kag ginhingabot ang mga Cristianong ebanghelisador.—Binuhatan 13:45, 50.

Ang iban naman naakig sa maayo nga pamatasan sang mga alagad sang Dios. Nagsiling si apostol Pedro sa iya pareho nga mga Cristiano: “Bangod wala kamo nagapadayon sa pagdalagan upod sa ila [mga malauton] sa sini nga dalanon padulong sa amo man nga lamawan sang pagpatuyang, nagakatingala sila kag padayon  nga nagapakalain sa inyo.” (1 Pedro 4:4) Amo man sini ang nagakatabo subong. Siempre pa, ginalikawan sang matuod nga mga Cristiano ang malain nga pamatasan, pero wala sila nagabatyag nga mas matarong ukon superyor sa iban. Indi ini batasan sang mga Cristiano, kay ang tanan nga tawo nakasala kag nagakinahanglan sang kaluoy sang Dios.—Roma 3:23.

Gindumtan Bangod “Indi Bahin sang Kalibutan”

“Indi ninyo paghigugmaa ang kalibutan ukon ang mga butang sa kalibutan,” siling sang Biblia. (1 Juan 2:15) Ano nga kalibutan ang ginasiling ni apostol Juan? Amo ini ang katawhan nga nahamulag sa Dios kag nagasunod kay Satanas, ang “dios sining kalibutan.”—2 Corinto 4:4, PBS; 1 Juan 5:19.

Makapasubo nga ang pila nga nagahigugma sa kalibutan kag sa kalainan nagapamatok sa mga nagasunod sa mga panudlo sang Biblia. Gani, ginsilingan ni Jesus ang iya mga apostoles: “Kon kamo bahin sang kalibutan, higugmaon sang kalibutan ang iya. Apang bangod kamo indi bahin sang kalibutan, kundi ginpili ko kamo gikan sa kalibutan, bangod sini ang kalibutan nagadumot sa inyo.”—Juan 15:19.

Makapasubo nga ginadumtan sang mga tawo ang mga alagad ni Jehova bangod indi sila bahin sang puno sing korapsion, inhustisya, kag bayolente nga kalibutan nga ginagamhan ni Satanas! Gusto sang madamo nga tawo nga mangin mas maayo ang aton kalibutan, pero indi nila masarangan ang indi makita nga manuggahom sini. Si Jehova nga Dios lamang ang makalaglag kay Satanas, kag himuon gid niya ini!—Bugna 20:10, 14.

Ining dalayawon nga paglaum amo ang “maayong balita sang ginharian” nga ginawali sang mga Saksi ni Jehova sa bug-os nga kalibutan. (Mateo 24:14) Kumbinsido gid ang mga Saksi nga ang Ginharian sang Dios lamang, ang iya gobierno nga ginagamhan sang Cristo, amo ang makapaluntad sang dayon nga paghidait kag kalipay sa duta. (Mateo 6:9, 10) Gani, padayon sila nga nagawali parte sa Ginharian, kay para sa ila, mas importante gid ang kahamuot sang Dios sangsa mga tawo.

NAMANGKOT KA BALA?

● Ngaa ginpamatukan ni Saulo sang Tarso ang mga sumulunod sang Cristo?—1 Timoteo 1:12, 13.

● Ano ang malain nga batasan sang pila sa mga kaaway ni Jesus?—Marcos 15:9, 10.

● Ano ang pagtamod sang matuod nga mga Cristiano sa kalibutan?—1 Juan 2:15.

[Retrato sa pahina 21]

Sang 1945, gin-atake ang mga Saksi ni Jehova sa Quebec, Canada, bangod nagawali sila sang maayong balita sang Ginharian sang Dios

[Credit Line]

Courtesy Canada Wide