Magdiretso sa kaundan

Magdiretso sa listahan sang kaundan

Ara Bala ang Dios Bisan Diin?

Ara Bala ang Dios Bisan Diin?

 Ang Pagtamod sang Biblia

Ara Bala ang Dios Bisan Diin?

MADAMO ang nagapati nga ang Dios ara bisan diin kag sa bisan ano nga butang. Sa pangamuyo sang maalam nga si Hari Solomon, amo sini ang ginpangabay niya kay Jehova: “Pamati ka sa langit nga imo puluy-an.” (1 Hari 8:30, 39) Ginapakita sang Biblia nga si Jehova nga Dios may puluy-an. Gintawag ini ni Solomon nga “langit.” Pero ano ang buot silingon sini?

Kon kaisa, ginagamit sang Biblia ang tinaga nga “langit” kag “mga langit” kon ginapatuhuyan ang aton pisikal nga uniberso. (Genesis 2:1, 4) Pero bangod ang Dios ang nagtuga sa tanan nga butang, may puluy-an na sia antes pa niya gintuga ang uniberso. Ang ginaistaran sang Dios wala sing labot sa materyal nga mga butang. Gani kon magsiling ang Biblia nga langit nga ginaistaran ni Jehova nga Dios, wala sini ginapatuhuyan ang aton kahawaan kundi ang lugar sang mga espiritu.

Ang Palanan-awon ni Juan

Ginapakita sang Biblia ang matahom nga ginaistaran ni Jehova paagi sa palanan-awon ni apostol Juan. Nakita niya sa sini nga palanan-awon nga ginbuksan ang puertahan sa mga langit kag nabatian niya ang tingog nga nagasiling: “Saka diri.”—Bugna 4:1.

Dayon, ginpakita kay Juan ang palanan-awon parte kay Jehova nga Dios mismo: “May trono sa langit . . . Kag ang dagway sang isa nga nagalingkod kaangay sa bato nga jaspe kag sa malahalon nga pula nga bato, kag sa palibot sang trono may balangaw nga kaangay sa esmeralda kon tulukon. . . . May mga kilat kag mga tingog kag mga daguob nga nagagikan sa trono . . . Kag sa atubangan sang trono may isa ka daw salaming nga dagat kaangay sang kristal.”—Bugna 4:2-6.

Ginapakita sini ang nagabadlak nga katahom kag indi matupungan nga himaya ni Jehova. Talupangda ang palibot sang iya trono. Ang balangaw nagapakita sang kalinong kag paghidait. Ang mga kilat, tingog, kag daguob nagapadaku sang gahom sang Dios. Ang daw salaming nga dagat nagapakita sa katinlo sang mga nagapalibot sa Dios.

Bisan ang palanan-awon ni Juan simbuliko lang, madamo ini sing ginasugid sa aton parte sa ginaistaran ni Jehova. Naorganisar gid ni Jehova sing maayo ang langit. Indi ini magamo.

Ara sa Tanan nga Lugar sa Tanan nga Tion?

Bangod si Jehova may ginaistaran, wala sia sa tanan nga lugar sa tanan nga tion. Pero ngaa nahibaluan niya ang tanan nga nagakatabo? (2 Cronica 6:39) Ang isa ka rason amo ang iya balaan nga espiritu, ukon aktibo nga puersa. Ang salmista nagsiling: “Sa diin bala ako makadto palayo sa imo [e]spiritu? Ukon diin bala ako malagyo gikan sa imo atubangan? Kon magsaka ako sa langit, yadto ka didto! Kon maghigda ako sa Sheol, yadto ka didto!”—Salmo 139:7-10.

Para mahangpan ang epekto sang balaan nga espiritu sang Dios, binagbinagon naton ang adlaw. Ara ini sa isa ka lugar pero nagalab-ot ang enerhiya sini sa malapad nga bahin sang duta. Sing kaanggid, si Jehova nga Dios may ginaistaran. Pero mahimo niya ang bisan ano sa bisan diin man sa uniberso. Dugang pa, ginagamit ni Jehova ang iya balaan nga espiritu para mabal-an ang nagakatabo sa bisan  diin sa ano man nga tion. Gani ang 2 Cronica 16:9 nagsiling: “Ang mga mata sang GINOO nagapanoloktolok sa bug-os nga duta, sa pagpakita nga sia mabakud tungud sa ila nga may tagiposoon nga himpit ayon sa iya.”

Ginapangunahan man sang Dios ang iya espiritu nga mga tinuga, ang mga anghel. Ginapakita sang Biblia nga nagadamo sila sing ginatos ka milyon—mahimo sing binilyon ukon sobra pa. * (Daniel 7:10) Mabasa pirme sa Biblia nga ang mga anghel nangin representante sang Dios sa duta, nagpakig-istorya sa mga tawo, kag nagreport sa Dios. Halimbawa, sang panahon ni Abraham, gin-imbestigahan sang mga anghel ang reklamo batok sa Sodoma kag Gomorra. Nagdesisyon ang Dios nga laglagon ini nga mga siudad, mahimo pagkatapos nga mabaton ang report halin sa mga anghel.—Genesis 18:20, 21, 33; 19:1, 13.

Gani, ginapakita sang Biblia nga indi na kinahanglan nga ara si Jehova nga Dios sa tanan nga lugar. Paagi sa iya balaan nga espiritu kag mga anghel, mahibaluan niya kon ano ang nagakatabo sa iya mga tinuga.

Maathag nga makilala pa gid naton ang Manunuga paagi sa Biblia. Sa sini, natun-an naton nga nagaistar ang Dios sa langit, sa lugar sang mga espiritu kag indi sa pisikal nga langit. Kaupod niya didto ang linaksa ka gamhanan nga espiritu nga mga tinuga kag may ara sila kalinong, gahom, kag kaputli. Ginapasalig kita sang Biblia nga magaabot ang tion nga ang tawo magapuyo sa isa ka malinong nga duta pareho sa kahimtangan sa langit.—Mateo 6:10.

[Nota]

^ par. 13 Suno sa Bugna 5:11, “linaksa ka linaksa” ang mga anghel sa palibot sang trono sang Dios. Ang isa ka laksa 10,000. Kon i-multiply mo ang isa ka laksa sa isa ka laksa (10,000 x 10,000), isa ka gatos ka milyon. Pero ginsambit sang kasulatan ang termino nga “linaksa ka linaksa,” buot silingon posible nga may binilyon ka anghel.

NAMANGKOT KA BALA?

● Ara bala ang Dios bisan diin?—1 Hari 8:30, 39.

● Asta diin ang epekto sang espiritu sang Dios?—Salmo 139:7-10.

[Blurb sa pahina 29]

Ang adlaw ara sa isa ka lugar pero nagalab-ot ang enerhiya sini sa malapad nga bahin sang duta. Sing kaanggid, ang Dios may ginaistaran. Pero ang epekto sang iya balaan nga espiritu nagalab-ot bisan diin sa uniberso