Magdiretso sa kaundan

Magdiretso sa listahan sang kaundan

Ano ang Imo mga Lalab-uton?

Ano ang Imo mga Lalab-uton?

 Ano ang Imo mga Lalab-uton?

● Ano ang gusto mo sa imo kabuhi? Rasonable bala ang imo mga tulumuron, ukon nagapantasya ka lang pirme sa mga butang nga indi mo malab-ot? Ang isa ka maalam nga tawo nagsiling: “Ang bisan ano nga nakita sang mata daw labi nga maayo sangsa ginahandum sang tagipusoon. Wala man ini sing kapuslanan kag paglagas sa hangin.”—Eclesiastes 6:9, BKK.

“Ang bisan ano nga nakita sang [aton] mata” nagapatuhoy sa aton matuod nga kahimtangan subong. Wala man sing malain kon gusto naton pauswagon ang aton kabuhi. Pero suno sa Biblia, indi maalamon ang paghandum sang indi realistiko nga mga tulumuron. Ang pila ka halimbawa amo ang paghandum nga mangin popular, manggaranon, perpekto ang panglawas, kag makakita sing perpekto nga bana ukon asawa.

Isa pa, ang mga nagatinguha sa mga lalab-uton pareho sang manggad, mahimo nga indi gid makontento. “Ang bisan sin-o nga nagahigugma sa kuwarta kag sa iban pa nga manggad indi makontento sini. Ini wala man sing pulos,” siling sang Biblia. (Manugwali 5:10, APD) Gani, ang espirituwal kag maalam nga tawo, kontento na sa “bisan ano nga nakita sang [ila] mata” ukon sa kon ano lang ang ara. Ginabaton nila ini nga kamatuoran: “Wala kita sing nadala sa kalibutan, kag wala man kita sing mapagua.”—1 Timoteo 6:7.

Mangin malipayon lang ang tawo kon pun-an niya ang iya espirituwal nga kinahanglanon. (Mateo 5:3) Paano naton ini mahimo? Si Jesucristo nagsiling: “Ang tawo mabuhi, indi sa tinapay lamang, kundi sa tagsa ka pulong nga nagagua sa baba ni Jehova.” (Mateo 4:4) Ini nga mga pulong mabasa sa Biblia, kag indi ini mabudlay lab-uton.

Ang isa sa sini mabasa sa Salmo 37:4, [NW] nga nagasiling: “Magkalipay ka man kay Jehova, Kag ihatag niya ang mga ginapangayo sang imo tagipusuon.” Subong Labing Gamhanan nga Dios, hatagan ni Jehova ang iya matutom nga mga sumilimba sing mga butang nga indi mahatag sang tawo: perpekto nga panglawas, materyal nga kinahanglanon, kag kabuhi nga walay katapusan sa Paraiso nga duta. (Lucas 23:43; Bugna 21:3, 4) Realistiko gid ang pagpati sa sini.