Magdiretso sa kaundan

Magdiretso sa listahan sang kaundan

Ang Kamatuoran sang Biblia Naghilway sa Ila

Ang Kamatuoran sang Biblia Naghilway sa Ila

 Ang Kamatuoran sang Biblia Naghilway sa Ila

NAGSILING si Jesucristo sa iya mga tagpalamati: “Mahibaluan ninyo ang kamatuoran, kag ang kamatuoran magahilway sa inyo.” (Juan 8:32) Makita naton sa masunod nga mga halimbawa nga puede gid kita mahilway sa butigon kag nagapatalang nga mga demonyo, ang sa likod sang espiritismo.—Juan 8:44.

Ipakita sini nga may gahom ang kamatuoran sang Biblia para hilwayon kita. Amo lang gid ini ang makahilway sa mga tawo. Kon usisaon mo ang Biblia, indi ka gid mapaslawan.

[Kahon/Retrato sa pahina 8]

Ang mga laragway gin-akto lang liwat

● Si Susanna isa ka babayi nga saserdote sa Brazil. Gusto niya gamiton ang iya gahom para makabulig sa iban. Isa pa, nanamian sia “mag-istorya sa iya iloy nga patay na.” Pero sang ulihi, ginsilingan sia sang iya “iloy” nga maghikog para mag-updanay sila sa kalibutan sang mga espiritu. Gani naglalain gid sia kag pirme lang niya ini ginadamgo. Dayon, nagtuon si Susanna kag ang iya bana sa Biblia upod sa mga Saksi ni Jehova. Gintinguhaan gid nila nga ‘pamatukan ang Yawa,’ gani sang ulihi, ‘nagpalayo ini sa ila.’ (Santiago 4:7) Subong, may kalinong na sila kag wala na si Susanna nagadamgo parte sini. “Madamo ako sing pasalamatan kay Jehova,” siling niya, “pero nagapasalamat gid ako sa iya kay ginhilway niya ako sa espirituwal nga kadulom.”

[Kahon/Retrato sa pahina 8]

● Si Timothy nga taga-West Africa isa ka apa. * Bangod wala sia nabuligan sang mga doktor, nagkadto sia sa mga faith healer. Pero wala man sia nag-ayo. “Naglalain gid ako kay daw gin-into lang ako nila,” sulat niya. Dayon nagtuon si Timothy sa Biblia upod sa mga Saksi ni Jehova. Ginpaathag nila sa iya ang katuyuan sang Dios nga dulaon ang tanan nga balatian kag kasablagan. Nagsiling sia: “Ginahulat ko gid ang adlaw sa bag-ong kalibutan sang Dios nga ‘makabati na ang bungol . . . kag magasinggit sa kalipay ang apa.’” (Isaias 35:1-6, APD) Subong, nagagamit sia sing portabol nga DVD player para isugid sa iban nga apa ang kamatuoran sa Biblia nga makahatag sa ila sing matuod nga kahilwayan.

[Footnote]

^ par. 8 Ang iban nga ngalan gin-islan.

 [Kahon/Retrato sa pahina 9]

● Si Evelyn isa ka espiritista sa Estonia. Gusto niya sundon si Jesus nga nagpang-ayo, para mabuligan ang iya iloy nga may malala nga balatian. Gani, nagtuon sia kon paano gamiton ang mga pendulum para mabal-an kag mabulong ang malala nga mga balatian. Sang ulihi, gin-usisa niya ang Biblia. Ano ang resulta? “Nabal-an ko nga naintuan lang gali ako,” siling niya. “Gani, ginsunog ko ang akon mga pendulum kag mga gamit sa espiritismo.” Subong, nagatudlo na sia sang mga kamatuoran sa Biblia.

[Kahon/Retrato sa pahina 9]

● Si Mary nagdaku sa isa ka isla sa Papua New Guinea. Ang mga tawo didto nahadlok sa mga patay. Kon may mapatay sa ila lugar, nagatulog si Mary sa idalom sang katre sang iban kay nahadlok sia nga halitan sang mga espiritu sang napatay kon isahanon lang sia. Dayon, natun-an niya sa Biblia nga daw pareho lang nga nagakatulog ang mga patay. Ara sila sa lulubngan kag nagahulat nga banhawon sa Paraiso nga duta. (Lucas 23:43; Juan 11:11-14) Gani subong, wala na sia nahadlok sa mga patay.

[Kahon/Retrato sa pahina 9]

● Si Alicia, nga ginpadaku sa isa ka Cristiano nga pamilya sa Estados Unidos, nangin interesado sa mga libro kag pelikula parte sa espiritismo. Dayon ginpamensaran niya sing maayo ang iya mga natun-an sa Biblia. Sang narealisar niya nga ginatilawtilawan na gali niya nga ‘mag-ambit sa lamesa ni Jehova kag sa lamesa sang mga demonyo,’ gin-untatan niya ang iya ginahimo. Sa karon, matinlo na ang iya konsiensia sa atubangan ni Jehova.—1 Corinto 10:21.