Magdiretso sa kaundan

Magdiretso sa listahan sang kaundan

Pagbantay Sa Kalibutan

Pagbantay Sa Kalibutan

 Pagbantay Sa Kalibutan

“Sang Enero 2009, walo ka estado ang nagapanag-iya sing sobra sa 23 300 ka nuklear nga mga armas.”—STOCKHOLM INTERNATIONAL PEACE RESEARCH INSTITUTE, SWEDEN.

Sa Aprika, ang linibo ka tasok, bubon, kag bomba nga bag-o lang ginhimo sa bulig sang iban nga pungsod guba na, “sa simple lang nga rason: wala na ini ginaatipan.”—INTERNATIONAL INSTITUTE FOR ENVIRONMENT AND DEVELOPMENT, BRITANYA.

Gin-scan sang mga Sientipiko ang Tinday nga Mammoth

Nakuhaan sang Ruso nga mga sientipiko sing detalyado nga piktyur ang mga organo sang lawas sang mammoth. Nasapwan ang kompleto nga lawas sining mga tatlo ukon apat ka bulan pa lang nga mammoth sa yelo sa Yamalo-Nenets sa Arctic Russia. “Amo ini ang pinakamaayo nga napreserbar nga patay nga lawas indi lang sang mga mammoth kundi sang bisan ano nga sapat nga nagkabuhi sang una,” siling ni Alexei Tikhonov, ang deputy director sang Russian Academy of Science’s Zoological Institute. Ginapakita sang tomography, nga pareho sa ginagamit sa pag-scan sa lawas sang tawo, nga wala gid sing diperensia ang lawas sang mammoth. Naghinakop man sila nga “mahimo nalumos” ini bangod “may nagsupon” nga daw mga lutak sa iya tinai kag puwak.

Madasig nga Diborsio

Mas mahapos na gid subong ang pagdiborsio sa Mexico City, report sang pamantalaan nga El Universal. Sang 2008, ginkuha na sa kasuguan ang 21 ka rason nga mahimo makadiborsio, pareho sang pagluib, pagpanakit, kag iban pa. Sa karon ang kinahanglan lang amo ang pagdeposito sing $400 (U.S. nga dolyar) sa bangko sang mga abogado kag ipadala sa korte ang napirmahan nga aplikasyon nga makuha sa Internet, nga nagasiling nga wala na niya ginahigugma ang iya asawa ukon bana. Wala na sang dapat pamatud-an pa sa hukom. Mga duha ukon apat lang ka bulan makuha na ang diborsio, indi pareho sang una nga tinuig pa ang kinahanglan. Istoryahan na lang ugaling ang parte sa kon kay sin-o makadto ang bata, sustento, pagtunga sang propiedad, kag iban pa nga butang.

Hummingbird—Mas Madasig Pa sa Fighter Jet

Kon ibase ang kadasigon sang lupad sa kalabaon sang lawas, ang nagasurip nga hummingbird mas madasig sangsa fighter jet, siling sang isa ka researcher sa University of California, Berkeley, U.S.A. Ginvideo ni Christopher Clark ang nagapangaluyag nga sulog nga mga Anna’s hummingbird. Ginkalkular niya nga ang kadasigon sini kon magsurip para magpadayawdayaw sa munga nga hummingbird, “mga 400 ka pilo sangsa kalabaon sang iya lawas.” Ina nga kadasigon ‘mas madasig pa sa pinakamadasig nga lupad sang fighter jet,’ siling ni Clark. Ang pagpaibabaw sini halin sa pagsurip mas makusog sing napulo ka beses sangsa gravity. Kon himuon ini sang mga piloto sa fighter jet, malipong gid sila.