Magdiretso sa kaundan

Magdiretso sa listahan sang kaundan

Ginbayaan Ko ang Kabantugan

Ginbayaan Ko ang Kabantugan

 Ginbayaan Ko ang Kabantugan

Panugiron ni Martha Teresa Márquez

NANAMIAN gid ako magkanta. Sang bata ako, nagakanta pa gani ako sa radyo. Asta lang sa kinder ang akon iniskwelahan, pero sang ulihi nag-voice lesson ako sa Mexico City sa pagdumala sang direktor sang daku nga orkestra sang pungsod.

Sang 1969, sang 24 anyos ako, gin-agda ako sang akon amiga nga dancer nga mag-awdisyon sa bantog sadto nga restawran kag bar nga La Rampa Azul. Ginkanta ko ang bantog nga Cucurrucucú Paloma nga ginkomposo sang Mexicano nga kompositor nga si Tomás Méndez, kag nanamian gid sa sini ang mga nagatan-aw. Diri nag-umpisa ang akon kabuhi subong singer. Nangin soloista ako nga nagadala sang ngalan nga Romelia Romel.

Nakaupod ko sa trabaho si Tomás Méndez, kag ang iban pa nga maayo nga mga kompositor kag singer nga Mexicano, lakip sanday Cuco Sánchez kag Juan Gabriel. Nanamian gid ako kon makita ko ang akon ngalan sa mga karatula, mga pamantalaan, kag mga magasin. Nagakanta ako sa mga klab, mga radyo, kag mga konsierto sa Mexico kag Belize. Nakaupod ko man ang bantog nga komedyante nga Mexicano nga si Leonorilda Ochoa sang bag-o pa lang sa Mexico ang iya palaguaon sa telebisyon.

Amat-amat ako nga nagbantog kag nagmanggaranon. Nakabakal ako sing mga alahas, mga mink coat, kag nakaistar sa malahalon nga apartment. Daw ara na sa akon ang tanan, pero indi ako malipayon. May kulang gihapon. Bisan pa Romano Katoliko ako, nahuya ako magsimba. Nahigkuan gid ako sa akon imoral nga kabuhi.

Natun-an Ko nga Higugmaon si Jehova

Samtang ginapraktis ko ang akon una nga rekording sang kanta, ginsugid ko ang akon ginabatyag sa akon amiga nga isa man ka singer, nga si Lorena Wong. Ginsilingan ko sia nga gusto ko magmadre kag buligan ang mga imol. “Mamadre ka? Nagbuang ka na?” siling niya.

Dayon namangkot sia: “Kilala mo kon sin-o ang Dios?”

“Si Ginuong Jesucristo,” sabat ko.

“Indi ‘a, si Jehova iya ngalan,” siling niya. “Si Jesus, Anak n’ya lang.”

“Jehova?” pamangkot ko. Wala pa gid ako makabati sina nga ngalan. Ginhatagan ako ni Lorena sing Biblia kag nagpromisa sia nga pakadtuon niya sa akon ang nagatudlo sa iya, nga isa ka Saksi ni Jehova. *

Kada magkit-anay kami ni Lorena, ginasukmaan ko sia, “Ti, san-o mo pakadtuon sa akon ang nagatudlo sa imo?” Gusto ko gid matun-an ang parte sa Dios.

 Ginsugdan ko basa ang Biblia kag nakita ko nga Jehova gid man ang ngalan sang Dios. (Salmo 83:18, NW) Nakibot gid ako. Nabasa ko man ang Napulo ka Sugo kag naigo gid ako sa isa ka sugo nga nagasiling: “Dili ka magpanglahi.” (Exodo 20:14) Sadto nga tion, naga-live-in ako sa lalaki nga may asawa na. Kag sia ang tatay sang akon walo ka bulan nga bata nga lalaki. Ikaduha ko na ini nga bata. Lalaki man ang akon subang, pero lain ang iya amay, kag wala man kami nakasal.

Isa ka adlaw, samtang nagapraktis ako sing kanta para sa isa ka bag-o nga palaguaon, may nagpanuktok sa akon apartment. Si Mauricio Linares gali, ang nagatudlo kay Lorena, kag upod niya ang iya asawa. Ginpaathag nila sa akon kon ano ang katuyuan sang Dios sa mga tawo kag ginbilin nila ang libro nga Ang Kamatuoran nga Nagadul-ong sa Kabuhi nga Dayon. * Naubos ko ini basa sa isa lang ka gab-i, bisan pa indi ko gawa maintiendihan ang iban nga tinaga. Diri ko natun-an nga higugmaon si Jehova.

Ginbag-o Ko ang Akon Kabuhi

Samtang ginabuligan ako sang mga Saksi sa pagtuon sing Biblia kag sa pagbasa, narealisar ko nga kinahanglan ko nga magbag-o para mapahamut-an si Jehova. Ginpanghaboy ko ang akon mga santos, medalyon, kag mga pangpasuerte, bisan pa mga bulawan ini.

Pero nabudlayan gid ako nga untatan ang pagpanigarilyo kag pagpahubog. Kon maglabay ako sa balaligyaan sing ilimnon, nagalalain gid ako. Wala na ako nag-upod sa akon mga abyan, kay ginaagda nila ako mag-inom sa malahalon nga mga restawran. Nakahibalo ako nga mapahubog naman kami.

Nabudlayan man ako nga untatan ang pagkadto sa mga party sang bantog kag manggaranon nga mga tawo. Sang gin-agda ako sa birthday sang bantog nga boksingero nga taga-Cuba, nangamuyo ako: “Amay nga Jehova, amo na gid lang ini ang katapusan. Indi na gid ko maghimo liwat sing mga butang nga wala mo nahamut-an.” Kag wala na gid ako nagliwat.

Bisan pa manggaranon katama ang amay sang akon ikaduha nga bata kag madamo pa sia sing ginpromisa sa akon, ginbulagan ko sia. Mabudlay gid ini para sa akon kay palangga ko gid sia kag nakahibalo sia sini. Ginsinggitan niya ako: “Ako ang imo Dios! Ako ang imo Cristo!”

“Huo, sang una,” sabat ko, “pero subong si Jehova na ang akon Dios.” Namahog sia nga sakiton ako kag kuhaon ang amon bata.

Siling sang iban, puede ko mapadayon ang pagkanta bisan pa Saksi na ako. Pero, may mga nagapahanumdom sa akon, “Indi ka gihapon makalikaw sa sigarilyo, ilimnon, kag imoral nga pagkabuhi nga gusto sang imo mga fans.” Narealisar ko nga maalamon gid ini nga laygay.

Sang singer pa ako, ginabayaran ako sang pila ka tawo para sa pabor nga ginapangayo nila. Pero nangin determinado na ako nga likawan ini nga mga tentasyon. Gani sang 1975, wala ko gindayon ang akon kontrata nga magkonsierto sa China, kag pagligad sang anom ka bulan nagpabawtismo ako subong isa ka Saksi ni Jehova.

Mga Kabudlayan kag Kalipay

Paano ko karon saguron ang akon kaugalingon kag ang akon pamilya? Wala ako sing tinapusan kag pagkanta gid lang ang akon nahibaluan. Ang akon magulang nga babayi nga si Irma kag ang iya tatlo ka kabataan, subong man ang  akon duha ka bata, nagasalig tanan sa akon. Ginbayaan namon ang amon apartment kag nagsaylo sa duha ka gamay nga kuarto. Ang daku nga pagbag-o sa amon kabuhi nangin mabudlay gid. Halin sa maluho nga kabuhi, nangin imol kami. Ginapilit pa gani ako anay sang akon utod kag sang kabataan nga balikan ko ang pagkanta, pero determinado ako nga himuon kon ano ang dapat para alagaron si Jehova.

Amat-amat ko nga ginpamaligya ang akon mga alahas, mga fur coat, kag salakyan. Amo ini ang amon ginasaligan. Pero sa ulihi naubos ini. Para makalikaw sa pamahog sang amay sang akon ikaduha nga bata, sang 1981 nagsaylo kami sa isa ka siudad sa pihak nga bahin sang pungsod para indi niya kami makita.

Sa sini nga lugar, gintudluan ako sang mga Saksi kon paano magluto sing tamales, doughnut, kag iban pa nga pagkaon nga puede ibaligya. Nakaobra man ako sa isa ka pabrika kag gab-i ang akon obra. Pero kon kaisa, indi na ako makatambong sa Cristianong mga miting kag apektado ang akon pag-alagad sa Dios. Gani ginbayaan ko ini nga obra kag nagluto na lang sang mga tamales sa balay. Ginabutang ko ini sa basket kag ginabaligya sa mga dalan. Amo ini ang nagasuportar sa akon pagministeryo.

Wala Gid Ako Naghinulsol

Kon pamangkuton gani ako sang mga tawo kon bala naghinulsol ako nga ginbayaan ko ang pagkanta, ginasilingan ko sila nga indi ko gid pag-ibaylo sa bisan ano ang akon ihibalo kay Jehova kag sa iya matahom nga katuyuan. Nalipay gid ako nga makita ang akon mga bata nga nagauswag sa ihibalo sa Biblia, nagdedikar sang ila kaugalingon kay Jehova, kag nangasawa sang pareho man namon nga Saksi. Upod sa ila mga asawa, ginapadaku nila ang ila mga kabataan nga mag-alagad sa amon Dios nga si Jehova.

Halos 30 ka tuig na ako nga payunir, ang tawag sa mga Saksi ni Jehova nga nagahatag sang ila daku nga tion sa pagministeryo. Sa bulig sang Dios, madamo ako sing nabuligan nga makatuon sing kamatuoran sa Biblia kag magdedikar sa Dios, lakip si Irma kag ang iya bata nga babayi. Daw mga kabataan ko na sila kag nalipay gid ako nga makita sila nga nagaalagad gihapon sa Dios, kag madamo sa ila ang payunir. (3 Juan 4) Subong, 64 anyos na ako, kag 18 ka tawo ang akon ginahiwatan sing pagtuon sa Biblia.

Indi na ako gutom sa ihibalo parte sa Dios. Nalipay ako kay nabuligan ko man ang iban paagi sa pagtuman sa sugo ni Jesus nga ‘maglakat kag maghimo sing mga disipulo.’ (Mateo 28:19, 20) Nagapasalamat gid ako kay Jehova kay padayon niya ako nga ginabuligan asta subong! Napamatud-an ko gid kag nakita nga maayo sia.—Salmo 34:8.

[Mga Nota]

^ par. 12 Nangin Saksi ni Jehova man sang ulihi si Lorena Wong.

^ par. 15 Ginhimo sang mga Saksi ni Jehova pero wala na karon ginaimprinta.

[Retrato sa pahina 25]

Ang akon mga bata upod sa ila mga asawa, kag ang akon magulang nga babayi nga kaupod ko subong sa pagpayunir

[Retrato sa pahina 26]

Nagaluto gihapon ako sing mga tamales kag ginabaligya ini sa dalan para masuportahan ang akon pagministeryo