Magdiretso sa kaundan

Magdiretso sa listahan sang kaundan

Paano Magdugang ang Akon Kompiansa?

Paano Magdugang ang Akon Kompiansa?

 Pamangkot Sang Mga Pamatan-on

Paano Magdugang ang Akon Kompiansa?

HUO | INDI/WALA

Kon mangispiho ka, nanamian ka bala sa imo hitsura?

Sa banta mo may ara ka bala dalayawon nga mga kinaiya?

Madali ka bala maimpluwensiahan sang sang imo mga katubotubo?

Mabaton mo bala kon ginamuno ang imo mga sayop?

Maatubang mo bala ang mga pagpakalain sang iban?

Nabatyagan mo bala nga ginapalangga ka?

Ginaatipan mo bala ang imo ikaayong lawas?

Nalipay ka bala kon magmadinalag-on ang iban?

Sa banta mo, madinalag-on ka bala?

Kon indi ukon wala ang imo sabat sa pila sining mga pamangkot, mahimo nga wala mo makita ang imo mga ikasarang bangod kulang ang imo kompiansa. Mabuligan ka sini nga artikulo nga makita ang mga ini!

MADAMO nga pamatan-on ang wala sing kompiansa kon parte sa ila hitsura kag mga abilidad, kag ginakomparar nila ang ila kaugalingon sa iban. Amo man bala sini ang imo ginabatyag? Kon amo, wala ka nagaisahanon!

“Kon may nahimo ako nga sala, pamatyag ko wala ako sing pulos. Sa masami, ako man lang ang nagapakalain sa akon kaugalingon.”—Leticia. *

“Bisan ano ka pa kaguapa kag kaguapo, may labaw gid pirme sa imo.”—Haley.

“Mabinalak-on ako sa ihambal sang iban sa akon kay basi magpensar sila nga waaywaay gid ako.”—Rachel.

Kon ang ginabatyag mo pareho man sa ila ginsiling, indi maluyahan sing buot. May makabulig sa imo. Binagbinaga ang tatlo ka paagi nga makabulig sa imo nga tamdon sing mas positibo ang imo kaugalingon.

 1. Makig-abyan

Makabulig nga bersikulo. “Ang matuod nga abyan mahigugmaon sa tanan nga tion, kag isa ka utod nga masaligan sa tion sang kalisdanan.”—Hulubaton 17:17, NW.

Ano ang buot silingon sini? Mahimo nga daku gid ang mabulig sang maayo nga abyan sa tion sang problema. (1 Samuel 18:1; 19:2) Bisan gani kon mahibaluan mo lang nga may nagakabalaka sa imo nalipay ka na. (1 Corinto 16:17, 18) Gani, makig-abyan sa mga tawo nga may maayo nga impluwensia sa imo.

“Indi ka gid pagpabay-an sang matuod nga mga abyan.”—Donnell.

“Kon kaisa, ang pinakaimportante sa tanan amo nga nakahibalo ka nga may nagapalangga gid sa imo. Nagapabatyag ini sa imo nga importante ka man.”—Heather.

Tandai: Pat-ura nga batunon ka sang imo mga abyan kon ano ka—kag indi mo kinahanglan nga magpakunokuno para magustuhan ka nila. (Hulubaton 13:20; 18:24; 1 Corinto 15:33) Kon maghimo ka sing malain para batunon ka nila, magabatyag ka lang nga gingamit ka nila kag madulaan ka sing kompiansa.—Roma 6:21.

Ang imo paagi. Isulat sa idalom ang ngalan sang imo abyan nga makabulig para madugangan ang imo kompiansa.

․․․․․

Ngaa indi mo pagplanuhon nga makaupod ang tawo nga imo ginlista? Tandai: Indi kinahanglan nga kaedad mo gid ini nga tawo.

2. Magbulig sa Iban

Makabulig nga bersikulo. “May kapin nga kalipay sa paghatag sangsa pagbaton.”—Binuhatan 20:35.

Ano ang buot silingon sini? Kon ginabuligan mo ang iban, ginabuligan mo man ang imo kaugalingon. Paano? “Ang mahinatagon nga tawo magauswag,” siling sang isa ka hulubaton sa Biblia. “Ang tawo nga nagabulig sa iban pagabuligan man.” (Hulubaton 11:25, APD) Matuod gid ini—mabatyagan mo nga may pulos ka kon ginabuligan mo ang iban! *

“Ginapanumdom ko kon ano ang mahimo ko para sa iban kag ginatinguhaan ko nga may isa ako nga mabuligan sa kongregasyon. Mas malipayon ako kon ginahatagan ko sing atension kag pagpalangga ang iban.”—Breanna.

“May kaayuhan gid ang pagwali sa mga tawo kay nagabulig ini sa imo nga hunahunaon ang iban kag indi lang ang imo kaugalingon.”—Javon.

Tandai: Dapat indi ka magpaabot sing balos  kon nagabulig ka. (Mateo 6:2-4) Indi gid makabulig sa imo ang paghatag nga may sala nga motibo. Mabal-an man ini gihapon sang mga tawo!—1 Tesalonica 2:5, 6.

Ang imo paagi. Sin-o ang imo ginbuligan sang una? Kag ano ang ginhimo mo para sa iya?

․․․․․

Ano ginbatyag mo sang ginbuligan mo sia?

․․․․․

Pamensara kon sin-o naman ang puede mo buligan, kag isulat sa idalom kon ano ang mahimo mo para sa iya.

․․․․․

3. Indi Mag-untat Bisan Nakasala Ka

Makabulig nga bersikulo. “Ang tanan nakasala kag wala makalab-ot sa himaya sang Dios.”—Roma 3:23.

Ano ang buot silingon sini? Natural lang ini bangod indi ka perpekto. Buot silingon, may mga tion gid nga sala ang imo mahambal kag mahimo. (Roma 7:21-23; Santiago 3:2) Indi mo malikawan nga makasala, pero mahimo mo makontrol ang imo reaksion sa sini. Ang Biblia nagsiling: “Ang matarung nga tawo mapukan sing makapito, kag nagabangon liwat.”—Hulubaton 24:16.

“Kon kaisa, madulaan kita sing kompiansa kon ikomparar naton ang aton kaugalingon sa iban.”—Kevin.

“Tanan kita may maayo kag malain nga batasan. Dapat kita malipay sa aton maayo nga batasan kag bag-uhon ang malain.”—Lauren.

Tandai: Indi paghimua nga rason nga bangod indi ka perpekto, pagusto ka na lang sa paghimo sing sala. (Galacia 5:13) Kon hungod ka nga magpakasala, madula mo ang kahamuot ni Jehova nga Dios nga amo ang pinakaimportante sa tanan!—Roma 1:24, 28.

Ang imo paagi. Isulat sa idalom ang batasan nga gusto mo bag-uhon.

․․․․․

Sa tupad sini, isulat ang petsa subong. Mag-research kon ano ang maayo mo nga himuon para bag-uhon ini, kag tan-awa kon may pagbag-o ka sa sulod sang isa ka bulan.

Importante Ka!

Ang Biblia nagasiling nga “ang Dios labaw pa sa aton tagipusuon.” (1 Juan 3:20) Buot silingon, makita niya ang maayo sa imo bisan pa daw wala mo ini makita sa imo kaugalingon. Nagbag-o bala ang iya pagtamod sa imo bangod indi ka perpekto? Ibutang ta nga ang imo ₱1,000 nga kuarta may gamay nga gisi. Ihaboy mo na lang bala ini ukon kabigon nga wala sing pulos kay may gisi ini? Indi gid! May gisi man ini ukon wala, ₱1,000 gihapon ang balor sini.

Amo man sini ang pagtamod sang Dios sa imo. Nakita kag ginapabaloran niya ang imo ginahimo para pahamut-an sia, bisan pa gamay lang ini nga butang para sa imo! Ginpasalig kita sang Biblia nga “ang Dios indi di-matarong nga kalimtan ang inyo binuhatan kag ang gugma nga ginpakita ninyo para sa iya ngalan.”—Hebreo 6:10.

Ang dugang pa nga mga artikulo sa serye sang “Young People Ask” makita sa Web site nga www.watchtower.org/ype

[Mga Nota]

^ par. 15 Gin-islan ang iban nga mga ngalan sa sini nga artikulo.

^ par. 30 Kon Saksi ka ni Jehova, hunahunaa ang kalipay nga imo mabatyagan kon isugid mo sa iban ang mensahe sang Ginharian.—Isaias 52:7.

BINAGBINAGA INI

Ano ang himuon mo kon masubuan ka bangod

● Ginahikayan ka sang imo mga katubotubo?

● Pamatyag mo mas maayo ang iban sangsa imo?

● Puro na lang malain ang makita mo sa imo kaugalingon?

[Blurb sa pahina 27]

“May mga guapa nga nalaw-ayan gihapon sa ila kaugalingon. Samtang may ara nga indi gid man guapa pero pamatyag nila sila ang pinakaguapa. Depende lang ina sa pagtamod.” —Alyssa

[Kahon/Mga Retrato sa pahina 27]

ANG GINASILING SANG IBAN NGA PAMATAN-ON

“Bisan ang pinakamabakod nga bilding dapat may suporta, kag kon kaisa kinahanglan man kay-uhon. Mabatyagan ko ang suporta paagi sa mapinalanggaon nga mga tinaga ukon paagi sa yuhum kag hakos sang isa ka abyan.”

“Sa baylo nga mahisa, tan-awa ang kaayuhan nga makuha mo sa maayo nga batasan sang iban, subong nga may makuha man sila nga maayo sa imo.”

[Mga Retrato

Aubrey

Lauren

[Retrato sa pahina 28]

Ang balor sang kuarta wala naganubo bisan may gisi ini. Sing kaanggid, ang pagtamod sang Dios sa imo wala nagabag-o bisan indi ka perpekto