Magdiretso sa kaundan

Magdiretso sa listahan sang kaundan

Ginpili Ko ang Mas Maayo nga Kabuhi

Ginpili Ko ang Mas Maayo nga Kabuhi

 Ginpili Ko ang Mas Maayo nga Kabuhi

Panugiron ni Plamen Kostadinov

UDTO na pagbugtaw ko. Nagalinapta lang sa salog ang mga basiyo nga botelya, kag nagapuog ang baho sang nagaawas nga mga ashtray. Nadula na ang kasadya nga nabatyagan ko sang nagparty kami sang nagligad nga gab-i. Naugot ako kag ginasubuan. Daw wala sing pulos ang tanan! Isugid ko sa inyo kon ngaa amo sini ang akon kahimtangan.

Tingadlaw sadto sang 1980. Katorse anyos pa lang ako kag gusto ko gid makaeskwela sing art. Nalipay gid ako sang ginsugiran ako ni Tatay nga nabaton ako sa isa ka kolehiyo nga nagatudlo sing art sa banwa sang Troyan, sa Bulgaria. Sang tigragas sina nga tuig, nagsaylo ako halin sa amon banwa sa Lovech, pakadto sa Troyan.

Nanamian ako nga malayo ako sa akon mga ginikanan kay mahimo ko na ang tanan nga gusto ko. Nagpanigarilyo ako kag kon kaisa nagapahubog upod sa akon mga abyan sa eskwelahan. Indi puede manigarilyo kag mag-inom sa eskwelahan, amo nga nanamian pa gid ako nga lapason ini.

Nangin interesado pa gid ako sa art. Nagsagad pa gid ako sa pagdrowing, kag gusto ko magbantog. Pagkatapos sang akon lima ka tuig nga pag-eskwela sa Troyan, gusto ko magpadayon sa Art Academy sa Sofia, ang kapital sang Bulgaria. Amo ini ang pinakabantog nga eskwelahan sa Bulgaria. Sang 1988, ginbaton ako sa sini nga eskwelahan, kag isa ako sa walo lamang ka estudyante nga ginpili sa bilog nga pungsod. Ginapabugal ko gid ang akon kadalag-an! Isa ka bes, nag-atubang ako sa espiho kag nagsiling sa akon kaugalingon, ‘Plamen, sigurado gid nga mangin bantog ka nga artist!’

Ang Akon Daan nga Personalidad

Ginpalaba ko ang akon buhok kag bungot, kag puro itom ang akon ginasuksok, kay amo sini dapat ang hitsura sang mga artist. Gin-ilog ko ang ginapatihan ko nga paagi sa pagkabuhi sang mga Bohemian artist. Nag-arkila ako sing kuarto kag ginpabay-an ini nga nagaululukay kag mahigko. Nagsagod man ako sing totoy kag isa ka kuring nga may tatlo ka miyaw. Bahin man sang akon pagkabuhi ang pagwaldas sing kuarta.

Sa pihak nga bahin, nagdugang pa gid ang akon hilig sa art. Pirme ako nagahimo sing abstract nga mga drowing halin sa akon imahinasyon. Pati ang dingding sang akon kuarto ginadrowingan ko. Sa pensar ko, amo na ini ang umpisa sang akon makalilipay nga kabuhi.

Bahin na sang akon kabuhi ang pag-party pirme upod sa iban nga mga estudyante. Pirme kami nagatipon sa akon kuarto, nagapamati sing musika, kag nagapahubog. Ginahimo pa gani namon ini samtang nagatuon para sa eksam. Ang amon pag-istoryahanay parte pirme sa musika, art, kag katuyuan sang kabuhi. Pirme man namon ginaistoryahan ang mga puersa nga labaw sa kinaugali kag mga alien. Ginapukaw sini ang akon imahinasyon amo nga  may bag-o naman ako nga ideya para sa akon masunod nga painting. Gusto ko kuntani nga sigesige ang kalipay kag kalangkag nga akon nabatyagan, pero nagakadula ini pagkaaga kon maumpawan na ako sa akon kahulugbon.

Mga napulo ka tuig nga amo sini ang akon kabuhi kag indi gid ako malipayon. Indi pareho sa masili kag buhi nga mga kolor nga makita sa akon mga painting, ang akon kabuhi madulom kag masubo. Amat-amat naman nga nagakadula ang akon handum nga mangin bantog nga artist. Ginasubuan ako kag indi ko mahibaluan kon ano ang akon himuon sa akon kabuhi. Amo na ini ang tion nga ginsugid ko kaina sa umpisa.

Ginbuligan sang Kamatuoran

Sang 1990, gin-eksibit ko ang akon mga painting sa Lovech. Ginhagad ko si Yanita, nga nakilala ko sa eskwelahan nga mag-entra sa sini nga eksibit kay taga-Lovech man sia. Sang matapos ang eksibit, nagkadto kami ni Yanita sa isa restawran para magselebrar. Samtang nagaistoryahanay kami, ginsugid niya sa akon ang iya mga natun-an sa iya pagtuon sing Biblia upod sa mga Saksi ni Jehova. Ginsugid niya sa akon ang parte sa bag-ong kalibutan nga ginasiling sang Biblia. Interesado gid ako sa iya mga ginsiling.

Ginpadayon ni Yanita ang pagtuon sing Biblia sa Sofia, kag kon kaisa ginadalhan niya ako sing balasahon parte sa Biblia. Indi ko gid malipatan nga ginbasa ko dayon ang brosyur nga “Toloka! Ginahimo Ko nga Bag-o ang Tanan nga Butang” kag pila lang ka adlaw nga naubos ko basa ang libro nga Mahimu Ka Mabuhi sing Dayon sa Paraiso sa Duta. * Kumbinsido gid ako nga may Dios, kag nagpatudlo ako dayon kon paano mangamuyo. Madumduman ko pa ang akon una nga pangamuyo. Nagluhod ako kag ginsugid kay Jehova ang tanan ko nga problema. Nagapati gid ako nga nagapamati sia kay nabatyagan ko ang kalipay kag kalinong kag wala na ako ginasubuan.

Sa Sofia, ginpakilala ako ni Yanita sa isa ka mag-asawa nga mga Saksi ni Jehova. Gin-agda nila ako nga magtuon sing Biblia upod sa ila kag magtambong sa ila pagtinipon. Madumduman ko pa ang una ko nga pagtambong sang Hunyo 1991. Nag-abot ako didto nga mas temprano sing duha ka oras kag naghulathulat ako sa isa ka parke. Ginakulbaan ako, daw indi mahim-os, kag nagapensar nga basi indi nila ako pag-abiabihon. Nakibot gid ako kay gin-abiabi nila ako sing maayo bisan pa daw indi amo ang akon hitsura. Sugod sadto, regular na ako nga nagtambong sa mga pagtilipon kag nagtuon ako sa Biblia duha ka beses kada semana.

Nalipay gid ako sang makatigayon ako sing Biblia sa una nga tion. Wala pa gid ako sing nabasa anay nga pareho ka dalayawon kag talalupangdon sa kaalam nga mabasa sa Sermon sa Bukid! Sa akon padayon nga pagtuon, naeksperiensiahan ko ang ginasiling sa Efeso 4:23: “Magbag-o kamo sa puersa nga nagapahikot sa inyo hunahuna.” Matuod gid nga mapabag-o sang Pulong sang Dios ang tawo. Gin-untatan ko ang pagpanigarilyo kag ginbag-o ko ang akon hitsura. Daku gid ang akon ginbag-o amo nga isa ka bes, sang ginsugat ako ni Tatay sa estasyon sang tren sa Lovech, ginlabayan lang niya ako kay wala na sia makakilala sa akon.

Ginbag-o ko man ang akon palibot. Ang akon nagaululukay nga kuarto, ang akon mga painting sa dingding, kag ang baho sang sigarilyo wala na nagapukaw sang akon imahinasyon. Gusto ko nga tinluan ini tanan. Gani ginpintahan ko sing puti ang dingding  kag ginpanas ang tatlo sing mata nga alien nga gindrowing ko sa sini.

Ginbiyaan ako sang mga abyan ko, pero nakakita ako sing bag-o nga mga abyan nga nakilala ko sa Cristiano nga mga pagtilipon, kag asta subong suod gihapon kami. Sa bulig sining maayo nga kaupdanan madasig ako nga nag-uswag. Sang Marso 22, 1992, ginbawtismuhan ako sa una nga asembleya sang mga Saksi ni Jehova sa Bulgaria, nga ginhiwat sa siudad sa Plovdiv.

Pagpauli sa Lovech

Mabudlay para sa isa ka artist nga mangita sing palangabuhian sa isa ka gamay nga banwa. Pero nagdesisyon ako nga paggradweyt ko, mapauli ako sa Lovech. Narealisar ko nga indi ko madungan ang akon handum nga makilala sa art kag ang pag-una sang Ginharian sang Dios sa akon kabuhi. Gani, ginbag-o ko ang akon mga plano kag nangin boluntaryo nga manunudlo sing Biblia. Samtang nagaeskwela pa ako sa Art Academy, si Yanita nga nauna gradweyt sa akon sing tatlo ka tuig, nagpauli na sa Lovech kag masako sa pagtudlo sing Biblia. Sia lang ang Saksi didto.

Pagpauli ko sa Lovech, may gamay na didto nga grupo nga nagatuon sing Biblia upod sa mga Saksi ni Jehova. Nalipay gid ako magkadto sa balay sang mga tawo kag magsugid sa ila sang paglaum nga akon ginapatihan. Gani, nagdesisyon ako nga gamiton ang akon daku nga tion sa sini nga hilikuton.

Pero, nag-abot ang mabudlay nga mga tion. Sang 1994, ginkuha sang gobierno ang amon kinamatarong nga makilala subong isa ka relihioso nga organisasyon kag grabe gid ang pagpakalain sang media sa amon. * Pirme lang ginapatawag sa presinto sang pulis ang mga Saksi kag ginapanguha nila ang amon mga balasahon. Indi man kami makatipon sa publiko nga mga lugar. Pero, nagatipon gihapon kami sa 12 por 12 metros nga gamay nga kuarto sa balay ni Yanita. Isa ka bes, 42 kami sa sulod sining gamay nga kuarto. Agod indi madisturbo ang mga kaingod, ginasira namon ang bintana kon magkanta kami sang mga ambahanon sang Ginharian. Kon kaisa, kon mainit kaayo sa gua, grabe man ang kagin-ot sa sulod, pero malipayon gihapon kami sa amon pag-updanay.

Pagpakamaayo ni Jehova

Nagdayaw gid ako sa katutom kag kapisan ni Yanita sa pag-alagad sa Dios, kag sang ulihi nahulog ang akon buot sa iya. Nagpakasal kami sang Mayo 11, 1996. Bisan pa lainlain ang amon personalidad, malipayon gid ang amon pag-updanay. Sia ang akon pinakasuod nga abyan kag ginabuligan gid niya ako. Nagapasalamat gid ako kay Jehova nga ginhatagan niya ako sang asawa nga ‘ang bili labaw pa sa mga rubi.’—Hulubaton 31:10.

Natuman sang iban ko anay nga mga abyan ang handum ko sadto nga mangin bantog nga artist. Pero nagapasalamat gid ako nga ginpili ko ang mas maayo nga kabuhi. Madamo ang akon nabuligan nga makita ang katuyuan sang ila kabuhi, kag karon kaupod ko sila nga nagaalagad sa Dios. Indi ko gid pag-ibaylo sa bisan ano nga kabantugan nga mahimo mabaton ko subong artist ang mga pagpakamaayo nga naeksperiensiahan ko sa pag-alagad kay Jehova. Nalipay gid ako nga nakilala ko ang pinakamaayo nga Artist, si Jehova nga Dios.

[Mga Nota]

^ par. 14 Pareho nga ginhimo sang mga Saksi ni Jehova. Ang Mabuhi sing Dayon nga libro wala na ginaimprinta subong.

^ par. 22 Sang 1998, ginkilala liwat ang organisasyon sang mga Saksi ni Jehova sa Bulgaria sa tapos sang ila pag-apelar sa European Court of Human Rights sa Strasbourg.

[Retrato sa pahina 12]

Kami ni Yanita