Magdiretso sa kaundan

Magdiretso sa listahan sang kaundan

Ospital nga Salakyan

Ospital nga Salakyan

 Ospital nga Salakyan

● Sa isa ka daku nga awditoryum, ang babayi nga nagabusong nagapamati gid sing maayo sa isa ka programa parte sa Biblia. Pero hinali lang sia ginsakitan. Maayo lang kay may ambulansia dayon kag pila lang ka minutos, ang babayi nadala na sa ospital upod ang iya bana. Nagbun-ag sia sang isa ka matahom nga lapsag nga babayi.

Sa madamo nga pungsod subong, importante gid ang intensive-care-unit nga mga ambulansia sa pagsalbar sang kabuhi sang mga pumuluyo. Ini nga mga salakyan may mga doktor, nars, kag hanas nga mga drayber. * Kompleto sila sa mga kagamitan para sa mga emerhensia subong sang aksidente sa dalan, atake sa tagipusuon, istrok, ukon kon may manugbata. Kada tuig, linibo ka kabuhi ang ginasalbar sining pagbulong nga ginahimo sa mga ambulansia.

Sang ginbombahan ang apat ka depasahero nga tren sa Madrid, Espanya, sang 2004, mga 400 ka kabuhi ang naluwas bangod madasig nga nagresponde ang mga ambulansia. * Nadumduman pa ini ni Dr. Ervigio Corral Torres, nga direktor sang mga ahensia para sa emerhensia sa Madrid. “Ini nga sahi sang hitabo ginabalita gid,” siling niya, “pero mas daku ang amon nabulig sa amon pagresponde sa mga tawo adlaw-adlaw. Amo ini ang pinakaimportante nga bahin sang amon serbisyo, ang pagluwas sa kabuhi sang mga tawo nga ara sa bibi sang kamatayon.”

Sang ginpamangkot si Dr. Corral Torres kon paano pa gid mangin epektibo ang ila serbisyo, nagsiling sia: “Dapat pa gid naton ipahibalo sa mga tawo nga puede nila kami matawgan kon kinahanglan nila ang bulig.” Nagsiling pa sia: “Gusto gid namon hatagan sing pinakamaayo nga pagbulong ang mga tawo bisan diin kag bisan ano oras nga kinahanglan nila ini, kag himuon ini dayon pagkabaton namon sang tawag.” Sa dalagku nga mga siudad, nagaabot sila sa sulod lamang sang dies minutos.

Sa gutok nga mga siudad, pareho sang São Paulo, Brazil, daku gid nga problema ang trapik, gani may mga doktor nga nagamotor na lang. Nagauna sila sa mga ambulansia para mabal-an na ang kahimtangan kag mabuligan dayon ang pasyente. May amo man sini nga serbisyo sa London, England; Kuala Lumpur, Malaysia; kag Miami, Estados Unidos.

[Mga Nota]

^ par. 3 Dapat nahibaluan sang mga drayber kon paano gamiton ang mga kagamitan sang ambulansia kag kon paano magmaneho depende sa kahimtangan sang pasyente.

[Kahon/Retrato sa pahina 11]

KON PAANO KA MAKABULIG

Ang pila ka panguna nga paagi para makabulig ka sa nagaresponde nga mga ambulansia sa pagsalbar sang kabuhi amo ang mga masunod:

1. Tawgi gilayon ang ila emergency number. Sa Europa 112, kag sa Estados Unidos 911. (Hibalua sing abanse kon ano nga numero ang puede tawgan sa inyo lugar.)

2. Ihambal sing maathag kon ano ang imo problema.

3. Ipaathag ang sintomas nga imo nakita. Halimbawa, Nagaginhawa pa bala sia? May animo pa bala sia? May pilas bala sia?

4. Kon grabe ang mga samad ukon balda sang isa ka tawo, indi sia paghulaga kay basi maglala ini.

5. Kon nagasuka ang tawo, patakilira sia para indi masalim-ukan.