Magdiretso sa kaundan

Magdiretso sa listahan sang kaundan

Masalbar Pa Bala ang Inyo Pag-asawahay?

Masalbar Pa Bala ang Inyo Pag-asawahay?

Nakita sang mga tag-iya nga guba na gid man ang balay, pero nagdesisyon sila nga kay-uhon ini.

AMO man bala sini ang gusto mo himuon sa inyo pag-asawahay? Kon amo, sa diin ka maumpisa? Tilawi nga sundon ang masunod nga mga panugda.

1 Magdesisyon.

Kasugti ninyo nga mag-asawa nga kay-uhon ninyo ang inyo pag-asawahay. Isulat ang inyo mga ginkasugtan. Kon determinado kamo nga duha, magabuligay kamo sa pagsalbar sang inyo pag-asawahay.—Manugwali 4:9, 10.

2 Hibalua kon ano ang inyo problema.

Ano gid bala ang inyo problema? Isulat kon ano sa banta ninyo ang mga kakulangan ukon ang mga dapat bag-uhon. (Efeso 4:22-24) Natural lang nga lain ang problema nga nakita mo sangsa nakita sang imo tiayon.

3 Maghimo sing tulumuron.

Ano nga pagbag-o sa inyo pag-asawahay ang gusto ninyo makita pagligad sang anom ka bulan? Isulat ini. Kon maathag sa inyo ang mga dapat bag-uhon, mas mahapos lab-uton ang inyo tulumuron.—1 Corinto 9:26.

 4 Sunda ang laygay sang Biblia.

Kon nahibaluan na ninyo ang problema kag kon ano ang dapat ninyo bag-uhon, sunda ninyo ang laygay sang Biblia. Mapuslanon kag makabulig gid ini. (Isaias 48:17; 2 Timoteo 3:17) Halimbawa, ginalaygayan sang Biblia ang mga mag-asawa nga mangin mapinatawaron. Nagasiling ini nga “himaya . . . ang pagpasaylo sang paglalis.”—Hulubaton 19:11; Efeso 4:32.

Bisan pa sa umpisa daw wala ini sing epekto, indi mangampo! Ginsambit sang libro nga The Case for Marriage ang resulta sang isa ka pagtuon. Nagasiling ini: “Daw indi mapatihan: 86 porsiento sang indi malipayon nga mga mag-asawa nga wala nagbulagay ang nagsiling nga nangin mas malipayon ang ila pag-asawahay pagligad sang lima ka tuig.” Pati ang mga mag-asawa nga indi gid anay malipayon nagsiling man nga may nakita sila nga pagbag-o.

Mahimo nga epektibo man ini sa inyo. Nakita sang mga manugbalhag sini nga magasin, ang mga Saksi ni Jehova, nga ang Biblia may praktikal nga mga prinsipio para sa mga mag-asawa. Halimbawa, madamo nga pag-asawahay ang nangin mas malipayon sang nangin mainayuhon, mapinalanggaon, kag mapinatawaron ang mga mag-asawa. Natun-an sang mga asawa nga importante gid ang pagpakita sing “malinong kag malulo nga espiritu,” kag nabatyagan sang mga bana ang kaayuhan kon indi nila pag-akigan pirme ang ila mga asawa.—1 Pedro 3:4; Colosas 3:19.

Epektibo gid ang mga prinsipio sa Biblia kay ang Awtor sini, nga si Jehova nga Dios, amo ang naghimo sang kahimusan sang pag-asawahay. Pangabaya ang mga Saksi ni Jehova nga hatagan ka sing dugang nga impormasyon kon paano makabulig ang Biblia sa inyo pag-asawahay? *

^ par. 14 Para mabuligan ang mga pamilya, ang mga Saksi ni Jehova nagbalhag sang 192-pahina nga libro nga Ang Sekreto sang Kalipay sa Pamilya. Para sa dugang nga impormasyon, sulati ang mga manugbalhag sini nga magasin sa adres nga makita sa pahina 5.