Magdiretso sa kaundan

Magdiretso sa listahan sang kaundan

Magkabuhi sing Simple kag Balanse

Magkabuhi sing Simple kag Balanse

 Magkabuhi sing Simple kag Balanse

ANG simple kag balanse nga pagkabuhi makalilipay gid. Para matigayon ini, dapat mo hunahunaon kon ano ang imo mga prioridad. Paano mo ini himuon?

Pamangkuta ang imo kaugalingon: ‘Ano na ang akon nahimo? Ano pa ang dapat ko himuon?’ Isulat sa ubos ang mga butang nga gusto mo malab-ot:

1. ․․․․․

2. ․․․․․

3. ․․․․․

Sa karon, madamo ang nagapati nga malip-ot lang ang kabuhi, gani gusto nila magpaayaw sa materyal nga mga butang. Daw pareho lang nga nagasiling sila: “Magkaon kita kag mag-inom, kay buas mapatay kita.” (1 Corinto 15:32) Nagapati sila nga ang pagbakabaka sang mga tawo subong para makuha ang ila gusto, amo ang pinakamaayo nga kabuhi. Pero, indi amo sini ang pagtamod sang Biblia.

Sa isa ka parabola ni Jesus, nag-istorya sia parte sa tawo nga nagtipon sing manggad, pero wala man niya ini napuslan kay napatay sia. “Amo man sina ang nagakatabo sa tawo nga nagatipon sang bahandi para sa iya kaugalingon apang indi manggaranon sa Dios.” (Lucas 12:16-21) Sala bala nga nagpangabudlay ining tawo para maamanan ang iya kaugalingon? Indi man. Ugaling ginsentro niya ang iya kabuhi sa pagtigayon sing materyal nga mga butang. Nalipatan na niya ang Dios. Bilang resulta, ang tanan niya nga manggad kag pinangabudlayan wala niya mapuslan. Masubo gid ang iya nadangatan!—Manugwali 2:17-21; Mateo 16:26.

Sa kabaliskaran, ginasilingan kita ni Jesus nga dapat naton pangabudlayan ang padya nga indi madula. “Pangabudlay kamo, indi tungod sa kalan-on nga nagakawala,” siling niya, “kundi tungod sa kalan-on nga nagapadayon para sa kabuhi nga walay katapusan.” (Juan 6:27) Antes sini nagsiling sia: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tagsatagsa nga nagatuo sa iya indi malaglag kundi makatigayon sang kabuhi nga walay katapusan.” (Juan 3:16) Makalilipay gid ini nga padya!

Paano Mo Malikawan ang Pagkabalaka?

Nahibaluan ni Jesus nga natural lang sa tawo nga magkabalaka parte sa materyal nga mga butang. Gani ginsugo niya ang iya mga disipulo: “Untati na ninyo ang tuman nga pagkabalaka kon ano ang inyo kaunon kag kon ano ang inyo imnon; kay ini tanan amo ang mga butang nga maukod nga ginatinguhaan nga maagom sang mga  pungsod sa kalibutan, apang nahibaluan sang inyo Amay nga kinahanglan ninyo ini nga mga butang. Gani, padayon nga pangitaa ang iya ginharian, kag ini nga mga butang idugang sa inyo.”—Lucas 12:29-31.

Bangod sa sining masaligan nga mga pulong, madamo nga Cristiano ang nagpasimple sang ila kabuhi. Si Juliet, nga taga-Malaysia, nagsiling: “Ginakapoy na gid ako kag ginatak-an sa akon obra. Gani nangamuyo kami sang akon bana kay Jehova nga buligan niya kami nga pasimplehon ang amon kabuhi. Kadasig sang iya sabat. Pagligad sang isa ka bulan, gintanyagan ako sing part-time nga trabaho nga magtudlo sa mga bata nga may kasablagan.” Gin-adjust man ni Steve, nga isa ka kontraktor sa Australia, ang iya iskedyul sa trabaho para mas madamo ang iya tion sa pag-alagad sa Dios upod sa iya pamilya. Ang iya asawa nga si Maureen, nagsiling: “Mas malipayon sia subong, kag  kami malipayon man. Gusto ko ini kag sang amon kabataan! Kon simple lang ang kabuhi, mas malipayon ang pamilya.”

Kon nadulaan ka sing obra kag daw madulaan ka man sing puluy-an, daw mabudlay gid sundon ang ginsiling ni Jesus. Pero, kon unahon mo ang pag-alagad sa Dios kag magsalig ka sa iya, mangin simple man kag balanse ang imo kabuhi. Makabulig ini sa imo nga matigayon ang “matuod nga kabuhi.” Amo ini ang kabuhi nga wala sing katapusan sa matarong nga bag-ong kalibutan sang Dios, diin makalilipay na ang tanan nga obra kag may kapuslanan gid ang tanan nga pagpangabudlay.—1 Timoteo 6:17-19; Isaias 65:21-23.

Gusto mo bala nga matun-an pa ining “matuod nga kabuhi” nga ginasaad sang Biblia? Kontaka ang mga Saksi ni Jehova sa inyo lugar, ukon magsulat sa nagakaigo nga adres nga makita sa pahina 5 sini nga magasin.

[Blurb sa pahina 9]

Sa bag-ong kalibutan nga ginsaad sang Dios, ang tanan nga obra mangin makalilipay kag mapuslanon

[Kahon sa pahina 8]

MAKAPANGITA KA BALA SING OBRA SA GUA SANG BALAY

Ari ang pila ka panugda nga makabulig sa mga tawo sa pila ka lugar kon nadulaan sila sing obra:

● Pagbantay sa balay (kon ang tag-iya may ginkadtuan kag gusto niya nga may magbantay sa iya balay)

● Pagpaninlo: mga balaligyaan; opisina; balay kag apartment pagkatapos sang konstruksion; pagkatapos sang sunog; pagkatapos nagsaylo ang mga tawo; ulubrahon sa balay (sa balay sang iban); mga bintana (komersial nga bilding ukon balay)

● Pagpangay-o: bisikleta; tanan nga kagamitan sa balay

● Lainlain nga obra: pagpamanday, paghimo sang mga kabinet, puertahan; pagpaminta; pagpangudal; pagpang-atop

● Ulubrahon sa uma: pagpananom, pagpangdugos, pagpangani

Landscaping kag pag-atipan sing mga tanom sa sulod sang mga opisina, bangko, lobby, mall, kag atrium

● Pag-atipan sang mga propiedad: dyanitor, caretaker (kon kaisa libre ang ilistaran)

● Pagtakod sing karpet kag salog, pagpaninlo

● Pagpangdul-ong sing newspaper ukon mga bill; pagpanagtag sing mga pasayod

● Pagpangarga

Landscaping, pagpangorte sang mga kahoy, pag-atipan sa lawn, pagpanapas sing kahoy

● Drayber sang bus, dyip, traysikol

● Pagpangodak (personal ukon kon may okasyon)

● Pagbaligya sing paon para sa mga mangingisda

● Pagbayluhanay sing trabaho: pagkay-o sang salakyan kabaylo sang pagtakod ukon pagkay-o sang mga linya sang koryente, pagpanahi kabaylo sang pagkay-o sang mga tubo

Para sa dugang nga impormasyon, tan-awa ang Magmata! nga Marso 8, 1996, pahina 3-11.

[Kahon/Retrato sa pahina 9]

MGA OBRA NGA PUEDE HIMUON SA BALAY

Hibalua kon ano ang mga kinahanglanon sa inyo lugar. Pamangkuta ang imo mga kaingod. Magmatumato.

● Pagbantay sing bata

● Pagbaligya sing ulutanon kag mga bulak nga gintanom sa balay; mga juice

● Pagpanahi, pag-repair sang mga bayo

● Pag-obra sa mga pabrika nga binilog ang bayad

● Paghimo sing tinapay kag pagluto sing pagkaon

● Paghimo sing kolon, paggansilyo; kag iban pa

Upholstery

Bookkeeping, typing, mga trabaho nga nagagamit sing kompyuter

● Manugsabat sing telepono

● Pag-areglo sang buhok

● Pagpakasera

● Pagsulod sang mga sulat sa sobre kag pagbutang sing adres para sa mga manugpasayod

● Pagtinlo kag pagpahining sang salakyan (ginadala sang kostumer ang salakyan sa inyo balay)

● Pagpaligo, paggunting, pag-atipan, kag pag-ehersisyo sa mga hinuptanan

● Pagkay-o sang kandado kag paghimo sang mga yabi (may ulubrahan sa balay)

Patalupangod: Ang kalabanan sining mga obra puede mapasayod sing barato lang ukon libre sa mga flyer kag mga magasin. Sa iban nga pungsod, ginapasayod ini sa mga buletin sang mga supermarket.