Magdiretso sa kaundan

Magdiretso sa listahan sang kaundan

Pagbantay sa Kalibutan

Pagbantay sa Kalibutan

 Pagbantay sa Kalibutan

▪ Sa isa ka surbe sa mga 2,000 ka tawo sa Germany, halos 40 porsiento sang mga tin-edyer nga nagaedad sing 14 asta 19 ang nagapati nga puede nila tapuson ang isa ka relasyon paagi sa text ukon e-mail. Sobra sa 80 porsiento sang mga 50 anyos pataas ang wala nagaugyon sa sini.—FRANKFURTER NEUE PRESSE, GERMANY.

▪ Sa bug-os nga kalibutan, ginabulubanta nga 2.3 trilyones ka text message ang ginpadala sang tuig 2008.—HITU NEWS, TAHITI.

▪ “Pila ka tuig ang ginabuhin sang pagpanigarilyo sa kabuhi sang tawo? Naga-average ini sing mga lima tubtob napulo ka tuig.”—UC BERKELEY WELLNESS LETTER, U.S.A.

▪ Ginabanabana nga halos 60 porsiento sang mga kompyuter sa opisina sa United States ang wala ginapatay bilog nga gab-i. Bilang resulta, mga 14.4 milyones pa ka tonelada sang carbon dioxide ang ginapagua sang mga planta sang koryente kada tuig bisan nga indi na tani ini kinahanglan.—WORLD WATCH, U.S.A.

Ginapasayod sang mga Bus ang Ateismo

“Posible nga wala sing Dios. Gani untati ang pagpalibog kag magkalipay sa imo kabuhi.” Ini nga islogan gindispley sa 200 ka bus sa London, England; sa 600 pa gid ka bus sa bug-os nga pungsod; kag sa duha ka dalagku nga screen sa Oxford Street sa London, report sang pamantalaan nga The Guardian. Ang mga naghimo sini nagsiling nga ginasabat lamang sang ila pasayod ang ginasiling sang mga relihion nga ang mga wala nagatuo sunugon sa impierno. Naggamit sila sing tinaga nga “posible” bilang pagsunod sa pagsulundan sang Advertising Standards Authority sang Britanya, bangod indi gid man nila mapamatud-an nga wala nagaluntad ang Dios. Ang isa ka katuyuan sini nga kampanya amo nga palig-unon ang mga ateista nga “maggua” kag ipahayag ang ila mga pagpati.

Mga Risgo sang Pilit nga Pagbun-ag

Sa United States, nagadamo pa gid ang mga nagabun-ag bisan kulang pa sing binulan ang ila lapsag bangod gusto nila nga indi na sila mabudlayan. Ginahimo nila ini paagi sa pilit nga pagpasakit ukon paagi sa Cesarean. Pero suno sa The Wall Street Journal, ang “ulihi nga mga semana sang pagbusong amo ang importante sa tanan.” Ginapakita sang sa isa ka pagtuon sa mga 15,000 ka bag-ong bun-ag nga lapsag nga sa ika-32 kag ika-39 nga semana sang pagbusong, naganubo sing 23 porsiento kada semana ang posibilidad nga magdalag ang mata kag panit, maghapuon, makombulsion kag ma-hemorrhage sa utok ang lapsag. Pero mas daku ang risgo nga mag-abnormal ang pamatasan kag pamensaron sang mga lapsag nga ginabun-ag sa ika-32 asta ika-36 nga semana. Gani ginarekomendar sang American College of Obstetricians and Gynecologists nga dapat indi pagpiliton nga ibun-ag ang mga lapsag nga “wala pa mag-39 ka semana luwas lang kon may medikal nga rason,” siling sang Journal.

Makapaayo sa Panglawas ang Paghagdan

“Ang regular nga pagsaka-panaug sa hagdan isa ka simple kag praktikal nga paagi nga makabulig sa ikaayong lawas,” report sang isa ka balasahon sa medisina nga The Lancet sa Britanya. Ginpangabay sang mga researcher ang 69 ka empleyado nga pirme lang nagapungko sa ila obra nga maghagdan sa baylo nga mag-elevator. Pagligad sang 12 ka semana, ang resistensia sining mga trabahador nagdugang sing 8.6 porsiento, kag “nabuhinan sing 15% ang risgo nga mapatay sa kinaandan nga mga kabangdanan sang kamatayon.” Natalupangdan man sini nga mga trabahador nga nagnubo ang ‘presyon sang ila dugo kag ang ila kolesterol, nagbuhin ang ila bug-at kag tambok, kag naggamay ang ila hawak.’