Magdiretso sa kaundan

Magdiretso sa listahan sang kaundan

Ang Madasig nga Pag-uswag sang Teknolohiya

Ang Madasig nga Pag-uswag sang Teknolohiya

 Ang Madasig nga Pag-uswag sang Teknolohiya

SA Albania, kinaandan na lang nga makakita ka sing isa ka tigulang nga nagaistorya sa iya cell phone samtang nagasakay sa asno. Sa India naman, ang isa ka manugpakilimos mahimo nga mag-untat anay sa iya pagpakilimos agod magtawag ukon agod sabton ang iya cell phone. Huo, paagi sa cell phone, kompyuter, kag telebisyon, ang teknolohiya nakalab-ot na sa tanan nga bahin sang kalibutan. Wala ini sing ginapili nga tawo, imol man ukon manggaranon, kag nangin bahin na ini sang kabuhi sang madamo.

Ang pag-uswag sang teknolohiya makita gid sa madasig nga pagdamo sang mga cell phone, kag ang kalabanan sini indi lamang basta cell phone. Sa pinakabag-o nga mga modelo sini, may ara na sing GPS (Global Positioning System), puede na mag-Internet, mag-e-mail, mag-text, magtan-aw sing TV, magpamati sing musika, magkuha sing piktyur, kag siempre, magtawag!

Suno sa isa ka report sa Washington Post nga pamantalaan, ang mga cell phone subong “mas sopistikado kon ipaanggid sa gingamit [nga kompyuter] sang North American Air Defense Command sang 1965.” Ang Post nagsiling pa: “Subong, may isa ka cell phone sa kada duha ka tawo sa Duta,” kag indi magnubo sa 30 ka pungsod ang may mas madamo nga cell phone sangsa populasyon sini. Ang matuod, nasaksihan naton ang “pinakamadasig nga pag-uswag kag paglapnag sang teknolohiya,” siling sang pamantalaan.

Sa bilog nga kalibutan, halos 60 porsiento sang mga may cell phone ang nagaistar sa nagauswag pa lang nga mga pungsod. Bangod sini, ang cell phone amo ang numero uno nga high-tech nga gadyet para sa komunikasyon nga ginagamit sang kalabanan sa sini nga mga pungsod. Halimbawa, sang tuig 2008, mga 140,000 ang dugang nga nagagamit sing cell phone kada bulan sa Afghanistan. Sa Aprika naman sang nagliligad nga mga tinuig, ang paggamit sing cell phone nag-uswag sing halos 50 porsiento kada tuig.

Pero ang pag-uswag kag paglapnag sang mga gadyet para sa komunikasyon may indi man maayo nga epekto. Bangod sa mga cell phone, pager, kag laptop nga mga kompyuter, ang mga tawo puede na makontak bisan ano nga oras kag bisan diin, amo nga sa pamatyag sang mga nagagamit sini daw ginaulipon sila sang teknolohiya. Pero may ara man ginatawag nga mga “adik” sa teknolohiya, bangod gusto nila mahibaluan pirme ang tanan nga nagakatabo.

Sa masami, ining moderno nga mga gadyet ukon kagamitan sa komunikasyon kag media mahimo makaawat, makaisturbo, kag makaaladik. * Sa pihak nga bahin, ini nga mga gadyet may kaayuhan man. Kon amo, paano mo ini magamit sing balanse, maalamon, kag may konsiderasyon sa iban? Sabton sang masunod nga mga artikulo ini nga pamangkot.

[Nota]

^ par. 7 Binagbinagon sang masunod nga mga artikulo ang mga kagamitan subong sang cell phone, kompyuter, kag telebisyon, subong man ang Internet. Magluwas kon lain ang ginsambit, ang “teknolohiya” nagapatuhoy sa sini nga mga kagamitan.