Magdiretso sa kaundan

Magdiretso sa listahan sang kaundan

Mainunungon, Nagabuligay nga mga Ginikanan

Mainunungon, Nagabuligay nga mga Ginikanan

 Mainunungon, Nagabuligay nga mga Ginikanan

▪ Ang temperatura sang mataas nga kapatagan sa Bagatnan nga Aprika matugnaw katama. Nabalaka gid ako samtang ginatan-aw ko halin sa akon opisina sa ikatlo nga panalgan ang isa ka kahoy nga wala na sing mga dahon kag ginauyog sang mabaskog nga hangin. Sa isa ka sanga, may isa ka salampati nga nagaluob sa iya duha ka kuyabog nga mga tatlo ka adlaw pa lang nga nabóto.

Antes mangitlog, ang mag-asawa nga salampati nagabuligay sa paghimo sing pugad—ang sulog amo ang nagadala sing mga sangasanga kag ang munga amo ang nagaplastar sini. Mabakod gid nga pugad ang ila ginhimo bangod bisan pa mabaskog ang hangin wala naguba ang pugad, nga nangin puluy-an na karon sang duha nila ka kuyabog. Ginalumluman sang munga ang itlog kon gab-i; kag ang sulog naman ang nagaluob kon adlaw. Pagligad sang mga duha ka semana, nabóto na ini. Wala pa duha ka semana, daku na ang mga kuyabog kag makasarang na ini maglupad.

Mahanduraw mo bala ang huni sang salampati? Ang munga nga salampati, nga ang iya tilaukan puno sing pagkaon para sa iya gutom nga mga kuyabog, nagahuni antes maghapon sa sanga para ipahibalo sa sulog nga puede na ini maghalin sa pugad. Bisan pa makalupad na ang mga kuyabog, ginapakaon gihapon sila sang ila ginikanan tubtob masarangan na nila nga atipanon ang ila kaugalingon.

Nagadayaw gid ako pirme sa pagbinuligay kag pagpalanggaanay sini nga mga pispis, kag ining duna nga kinaugali makita gihapon sa ila madason nga henerasyon. Ini nga mga kamatuoran nagpahanumdom sa akon sang ginsiling sang Salmo 86:8: “Wala gid sing kaangay sa imo . . . , O Ginoo; kag wala gid sing mga binuhatan kaangay sa imo mga binuhatan.”

Sa iya nasulat nga Pulong, ang Balaan nga Biblia, ginahatagan ni Jehova nga Dios ang tawhanon nga mga ginikanan sing masaligan nga laygay subong nga ginhatagan niya sing duna nga kinaugali ang mga salampati. Halimbawa, ang Biblia nagapalig-on sa mga iloy nga “higugmaon ang ila mga anak.” (Tito 2:4) Para naman sa mga amay, nagsiling ini: “Indi ninyo pagpaakiga ang inyo mga anak, kundi padayon sila nga padakua sa disiplina kag nagatuytoy nga panghunahuna ni Jehova.” (Efeso 6:4; 1 Timoteo 5:8) Makapat-od kita nga bilidhon gid sa mga mata sang Dios ang mga ginikanan nga nagatuman sa sini nga mga sugo.