Magdiretso sa kaundan

Magdiretso sa listahan sang kaundan

Mga Pagpakamaayo nga Labaw pa Sangsa Manggad

Mga Pagpakamaayo nga Labaw pa Sangsa Manggad

SI Jon nangin madinalag-on gid sa iya trabaho sa Estados Unidos. Bisan pamatan-on pa sia, nakakadto na sia sa iban nga pungsod kag daku ang iya kita. May matahom sila nga balay sang iya asawa kag maayo ang ila pangabuhi. Madamo ang nagapati nga ginpakamaayo gid sila.

Binagbinaga ang isa pa ka sitwasyon. Sa 5,000 ka aplikante, isa si Kostas * sa 80 nga napilian nga magtrabaho sa isa ka daku nga bangko sa Europa. Sa sulod lang sang pila ka tuig, nakakita sia sing mas maayo nga trabaho. Sang ulihi, nangin manedyer sia sang isa ka daku nga departamento sa isa naman ka bangko. Sang naghalin sia sa iya trabaho agod magnegosyo, mas daku pa ang iya kita sa isa ka tuig sangsa kita sang kalabanan nga tawo sa bug-os nila nga kabuhi. Para sa iya, ginpakamaayo gid sia.

Apang, kumbinsido ining duha ka tawo nga may mga pagpakamaayo pa nga labaw sangsa manggad. Halimbawa, sa karon nagaboluntaryo si Jon sa pagtudlo sing Biblia sa iban agod mangin suod sa Dios. “Nakita ko mismo kag naeksperiensiahan nga ang manggad wala nagahatag sing kalipay,” siling ni Jon. “Ang pagtinguha nga matigayon kag mahuptan ini nagaubos sang tion nga para kuntani sa iban nga butang. Sa pihak nga bahin, ang  pagsunod sa mga prinsipio sa Biblia nagaresulta sa madamo nga pagpakamaayo, subong sang mas malipayon nga pag-asawahay, kalinong, kag matinlo nga konsiensia.”

Amo man sini ang naobserbahan ni Kostas: “Indi luyag sang Dios nga himud-usan gid naton ang manggad. Nagapati gid ako nga kinahanglan naton gamiton suno sa iya kabubut-on ang ginahatag niya nga sobra sa aton kinahanglanon sa kada adlaw.” Sining karon lang, si Kostas kag ang iya pamilya nagtuon sang iban nga lenguahe agod mas madamo pa sila sing matudluan sa Biblia. Nagsiling sia, “Nabatyagan namon nga mas malipayon kami sa paghatag sangsa pagbaton.”​—Binuhatan 20:35.

Natun-an gid ni Jon kag ni Kostas nga mas maayo pa ang suod nga kaangtanan sa Dios sangsa manggad. Nagsiling si Daniel Gilbert, nga propesor sa Harvard, nga ang mga eksperto sa pagbulong sa hunahuna “dinekada na nga nagatuon sa kaangtanan sang manggad kag kalipay, kag halos tanan sila nagsiling nga ang manggad nagapahalipay sa tawo kon gamiton nila ini agod makatibawas sila sa kapigaduhon.” Apang nagdugang sia, “Kon makatibawas na gani sila, daw indi na makadugang sa ila kalipay ang manggad.”

Masakit nga Leksion

“Kon makatibawas na sa kapigaduhon,” siling sang isa ka mahunahunaon nga tawo, “ang pagdugang sang kinitaan daw halos indi na makahatag sing kalipay.” Sang nagligad nga siglo, amo sini ang nagpabilin sa hunahuna sang isa ka reporter sang gin-interbyu niya si Andrew Carnegie, isa sa mga una nga nagnegosyo sang salsalon, kag isa anay sa pinakamanggaranon nga tawo sa bilog nga kalibutan. “Indi kamo dapat mahisa sa akon,” siling ni Carnegie sa iya. “Paano ako mabuligan sang akon manggad? Sisenta anyos na ako, kag indi ko matunaw ang akon ginakaon. Ihatag ko ang akon milyones kon mabalik lang ang akon pagkapamatan-on kag maayong panglawas.”

 Nagsiling pa gid ang reporter: “Hinali lang nga nagtalikod si Mr. Carnegie, kag sa nagasagarak nga tingog kag may paghinulsol nga daw indi mahangpan nga balatyagon, nagsiling sia, ‘Malipay ako nga ibaligya ang tanan agod mapasag-uli ang akon pagkapamatan-on.’” Si J. Paul Getty isa man ka milyonaryo nga negosyante sang petrolyo, nagsiling man sang ulihi: “Wala sing labot ang kuarta sa kalipay. Basi may labot pa gani ini sa kasubo.”

Mahimo nga magaugyon ka sa manunulat sang Biblia nga nagapangabay: “Dili ako paghatagi sing kaimolan ukon kamanggaran; pakan-a ako sang kalan-on nga kinahanglanon ko, basi nga mabusug ako, kag magpanghiwala sa imo, kag magsiling, ‘Sin-o bala ang GINOO?’ ukon basi mag-imol ako, kag magpangawat, kag pasipalahan ang ngalan sang akon Dios.”​—Hulubaton 30:8, 9.

Si Hari Solomon sang dumaan nga Israel nagpaathag: “Nangindaku ako kag nagdugang labi sa tanan nga una sa akon sa Jerusalem.” Apang, sia nagdugang: “Ang tanan kadayawan kag pagpanikasug sa hangin.” Nagsiling pa gid si Solomon: “Ang pagpakamaayo sang GINOO nagapamanggad, kag wala sia nagadugang sing kasubo sa sini.”​—Manugwali 2:9-11; 5:12, 13; Hulubaton 10:22.

Ang maalamon nga paggamit sing kuarta magaresulta sa mas malipayon nga pagkabuhi

Kon Paano Matigayon ang Matuod nga mga Pagpakamaayo

Maathag nga matigayon lamang naton ang matuod kag wala sing katapusan nga kalipay kon suod ang aton relasyon sa Dios. Kon unahon naton ang Dios, masapwan naton nga ang tanan nga bahin sang aton kabuhi mangin mas mapuslanon kag mas malipayon.

Maayo gid kay indi na kita pirme magkabalaka tuhoy sa kuarta. Ginapasalig kita sang Biblia sang isa ka palaabuton nga wala na sing sakon kag abusado nga mga negosyante. (1 Juan 2:15-17) Matabo sa palaabuton nga ang kalibutan pagagamhan sang Dios paagi sa iya matarong nga mga prinsipio. Mangin paraiso ang duta kaangay sang orihinal nga katuyuan sang Dios sang gintuga niya ang una nga mag-asawa. Daku gid nga pagpakamaayo nga makita nga mangibabaw sa bug-os nga duta ang kalipay, paghidait, kag gugma!​—Isaias 2:2-4; 2 Pedro 3:13; 1 Juan 4:8-11.

Kon unahon naton ang Dios, ang aton pagkabuhi mangin mas malipayon

Indi mangin makatalaka ang kabuhi sa sina nga tion. Magluwas pa sa suod nga relasyon sa Dios, pakamaayuhon man niya kita sing materyal nga mga butang, samtang ginatuman niya ang iya orihinal nga katuyuan para sa katawhan nga mabuhi sing walay katapusan sa paraiso sa duta. Makasalig kita nga may bastante nga pagkaon, nagakaigo nga balay, kag makalilipay nga trabaho para sa tanan. Wala na sing kaimulon.​—Salmo 72:16; Isaias 65:21-23; Malaquias 4:4.

Ang tanan nga sinsero nga nagatuo kay Jehova, ang Dios sa Biblia, indi gid mapaslawan. (Roma 10:11-13) Gani, maalamon nga tinguhaan naton karon ang mga pagpakamaayo nga mas labaw pa sangsa manggad!​—1 Timoteo 6:6-10.

^ par. 3 Ginbag-o ang ngalan.