Magdiretso sa kaundan

Magdiretso sa listahan sang kaundan

Malain Bala ang Cremation?

Malain Bala ang Cremation?

 Ang Pagtamod sang Biblia

Malain Bala ang Cremation?

Para sa iban, ang cremation, nga amo ang pagsunog sang bangkay tubtob nga mangin abo, indi pagtahod sa bangkay kag sa handumanan sang napatay. Nagasiling sila, ‘Nagsugod ini sa mga pagano, kag dapat indi ini paghimuon sang mga nagapangangkon nga nagasimba sa Dios.’ Ang iban naman nagapati nga isa ini ka maayo kag matinahuron nga paagi sa paghimos sang bangkay. Ano bala ang imo pagpati sa sini?

SA TION sang Biblia kinaandan na nga ginalubong ang patay. Halimbawa, ginlubong ni Abraham ang iya asawa nga si Sara sa sulod sang kueba. Ginbutang man ang lawas ni Jesus sa lulubngan nga gin-guhab sa igang. (Genesis 23:9; Mateo 27:60) Ginapahangop bala sa sini nga rekord sang Biblia nga ang paglubong amo lang ang nagakaigo nga paagi sa paghimos sang bangkay? Ginapakita bala sini nga nagapamatok ang mga alagad sang Dios sang una sa pagsunog sa bangkay?

Patimaan Bala Ini sang Kaakig sang Dios?

Kon pahapyawan mo lang sa pagbasa ang pila ka dinalan sa Biblia, daw nagapakita ini nga ang pagsunog sa bangkay amo ang ginahimo sa mga napatay nga wala nahamut-an sang Dios. Halimbawa, suno sa Mosaikong Kasuguan, kon ang anak nga babayi sang saserdote ni Jehova mangin prostitute, dapat nga patyon sia kag dayon ‘sonogon sa kalayo.’ (Levitico 20:10; 21:9) Amo man sini ang natabo sang napierde ang mga Israelinhon sa Ai bangod sang pagkadimatinumanon ni Akan kag sang iya pamilya. Ginbato sila sang ila mga kasimanwa kag dayon “ginsonog sila sa kalayo.” (Josue 7:25) Ang pila ka maalam nga tawo nagsiling nga amo ini ang pagtrato sa mga napatay sing makahuluya. Nagapati man sila nga ang pagsunog sang bangkay isa ka di-dungganon nga paghimos sa bangkay sang malauton.

 Dugang pa, sang gintinguhaan ni Hari Josias nga tinluan ang Juda sa pagsimba sa mga diosdios, ginpangrungkab niya ang mga lulubngan sang mga pari ukon saserdote nga naghalad kay Baal kag ginsunog ang ila mga tul-an sa ila mga altar. (2 Cronica 34:4, 5) Ginapakita bala sini nga mga halimbawa nga ang mga tawo nga ginsunog ang ila bangkay wala ginakahamut-an sang Dios? Wala, ginpamatud-an ini sang isa pa ka rekord sa Biblia.

Sang napierde sang mga Filistinhon sa inaway si Hari Saul sang Israel, wala sing pagtahod nga ginlansang nila ang iya bangkay upod sa bangkay sang iya tatlo ka anak sa pader sang siudad sang Bet-san. Apang, sang nabatian sang mga Israelinhon nga nagapuyo sa Jabes-galaad ang makahuluya nga ginhimo sa mga bangkay, ginkuha nila ini kag ginsunog, dayon ginlubong ang mga tul-an. (1 Samuel 31:2, 8-13) Sa una nga pagtan-aw, daw nagaugyon ini sa negatibo nga ideya sa pagsunog sa bangkay. Kay man, si Saul isa ka malain nga tawo bangod ginpamatukan niya si David, ang ginpili ni Jehova, kag napatay sia nga wala ginakahamut-an sang Dios.

Apang talupangda nga nalakip sa ginsunog nga bangkay amo si Jonatan, nga bata ni Saul. Indi sia malain nga tawo. Sa kabaliskaran, suod pa gani sia nga amigo ni David. Tuhoy kay Jonatan, nagsiling ang mga Israelinhon: “Naghikot sia upud sa Dios.” (1 Samuel 14:45) Sang nabalitaan ni David ang ginhimo sang mga taga-Jabes-galaad, gindayaw niya sila kag ginapasalamatan sa ila ginhimo: “Pakamaayohon kamo sang GINOO, bangud nga nagpahayag kamo sining kalolo sa inyo ginoong Saul.” Maathag nga wala gid nabalaka si David sang ginsunog ang bangkay ni Saul kag ni Jonatan.​—2 Samuel 2:4-6.

Indi Ini Makapugong sa Pagkabanhaw

Maathag nga ginatudlo sang Biblia nga banhawon ni Jehova nga Dios ang madamo nga nagakatulog sa kamatayon. (Manugwali 9:5, 10; Juan:28, 29) Subong paglaragway sang tagna sa tion nga buhion liwat ang mga patay, ang tulun-an sang Biblia nga Bugna ukon Apocalipsis, nagsiling: “Ginhatag sang dagat ang mga patay nga yara sa sini, kag ginhatag sang kamatayon kag Lulubngan ang mga patay nga yara sa sini.” (Bugna 20:13) Agod tumanon ini, wala sing makapugong sa Labing Gamhanan nga Dios sa pagbuhi liwat sa mga napatay nga ginlubong, ginsunog, nalunod, ginkaon sang mabangis nga sapat, ukon natunaw bangod sang bomba atomika.

Wala naghatag ang Biblia sing espesipiko nga paagi kon paano himuson ang bangkay. Wala man ginapakamalaut ni Jehova ang pagsunog sa bangkay. Apang maathag nga ang kahimusan sa lubong dapat mangin dungganon kag nagakaigo.

Mahimo nga maimpluwensiahan sang mga kustombre sa inyo lugar ang imo mga desisyon sa paghimo sing mga kahimusan tuhoy sa lubong. Indi luyag sang mga nagasunod sa mga prinsipio sang Biblia nga may isaway ang iban sa ila. Indi man nagakaigo nga ang mga kahimusan sa lubong nagasakdag sa butig nga mga panudlo sang mga relihion kaangay sang pagpati nga ang kalag imortal. Bisan pa nga dapat binagbinagon ini nga mga butang, ang natungdan ukon ang iya pamilya amo gihapon ang dapat nga maghimo sing desisyon sa sini nga bahin.

NAMANGKOT KA BALA?

▪ Suno sa rekord sang Biblia, sin-o ang matutom nga sumilimba nga ginsunog ang iya bangkay?​—1 Samuel 31:2, 12.

▪ Ano ang ginsiling ni David sa mga tawo nga nagsunog sang bangkay ni Saul?​—2 Samuel 2:4-6.

▪ Ano ang nagapakita nga sarang mabuhi liwat ang bangkay bisan pa ginsunog ini?​—Bugna 20:13.

[Blurb sa pahina 11]

Wala naghatag ang Biblia sing espesipiko nga paagi kon paano himuson ang bangkay