Magdiretso sa kaundan

Magdiretso sa listahan sang kaundan

Silot Bala sang Dios ang Imo mga Problema?

Silot Bala sang Dios ang Imo mga Problema?

 Ang Pagtamod sang Biblia

Silot Bala sang Dios ang Imo mga Problema?

“Pamatyag ko daw ginasilutan ako,” siling sang isa ka babayi nga nagaedad sing mga 55 anyos sang nahibaluan niya nga may kanser sia. Nagahinumdom sang iya mga sala sang una, naghinakop sia, “Amo ni guro ang paagi sang Dios sa pagpahibalo sa akon nga nakasala ako.”

KON nagaantos sing mga kabudlayan, madamo nga tawo ang nagapati nga ginasilutan sila sang Dios bangod sang pila nila ka sala sang una. Bangod nagainasud-asod lang ang ila mga problema, mahimo mabatian sila nga nagayamo: “Ngaa ako pa? Ano bala ang sala ko?” Dapat bala kita maghinakop nga ang aton mga problema tanda sang kaakig sang Dios? Silot gid bala sang Dios ang aton mga kabudlayan?

May Kabudlayan Man ang Matutom nga mga Sumilimba

Binagbinaga kon ano ang ginsiling sang Biblia tuhoy kay Job. Gulpi lang nga nadula ang iya manggad. Nian, napatay sa buhawi ang tanan niya nga napulo ka kabataan. Dayon, natapikan sia sing makangilil-ad nga balatian. (Job 1:13-19; 2:7, 8) Ini nga mga kabudlayan amo ang rason kon ngaa nakasiling si Job: “Ang kamut sang Dios nagtandug sa akon!” (Job 19:21) Maathag nga kaanggid sang madamo karon, nagpati si Job nga ginsilutan sia sang Dios.

Apang, ginpakita sang Biblia nga antes sang pagtilaw kay Job, ginlaragway sia sang Dios subong “tawo nga himpit kag matarung, nga mahadlukon sa Dios kag nagalikaw sa malaut.” (Job 1:8) Bangod ginpakita sang Dios nga nahamuot sia kay Job, maathag nga ang mga kabudlayan niya indi silot sang Dios.

Sa pagkamatuod, ang Biblia nagaunod sing mga rekord tuhoy sa matarong nga mga tawo nga nakaeksperiensia sing mga kabudlayan. Bisan pa matutom nga alagad sang Dios si  Jose, nagbatas sia sing tinuig nga pagkabilanggo bangod sang inhustisya. (Genesis 39:10-20; 40:15) Ang matutom nga Cristiano nga si Timoteo nag-antos man sang “masunson nga pagbalatian.” (1 Timoteo 5:23) Bisan gani si Jesucristo nga wala sing sala, ginpintasan antes mag-antos sing masakit nga kamatayon. (1 Pedro 2:21-24) Gani, sayop gid nga maghinakop nga ang kabudlayan patimaan nga wala nahamuot ang Dios sa aton. Apang kon indi ang Dios ang ginhalinan sang kabudlayan, sin-o gali, kon may yara gid man?

Ang mga Kabangdanan sang Aton mga Problema

Ginapakita sang Biblia nga si Satanas nga Yawa amo ang kabangdanan sang mga natabo kay Job. (Job 1:7-12; 2:3-8) Dugang pa, ginpakilala sini si Satanas subong ang panguna nga kabangdanan sang aton mga problema karon, sang nagsiling ini: “Kailo sa duta kag sa dagat, bangod ang Yawa nagpanaug sa inyo, nga may daku nga kaakig, kay nahibaluan niya nga malip-ot na lamang ang iya tion.” (Bugna 12:12) Subong “manuggahom sini nga kalibutan,” madamo ang naimpluwensiahan ni Satanas sa paghimo sing kalautan, nga nagaresulta sa kabudlayan kag kasakit.​—Juan 12:31; Salmo 37:12, 14. *

Apang, indi naton dapat pagbasulon gilayon ang Yawa sa tanan naton nga kabudlayan. Subong resulta sang napanubli nga sala, madali lang kita makahimo sing indi maalamon nga mga desisyon nga nagaresulta sing mga problema. (Salmo 51:5; Roma 5:12) Halimbawa, handurawa ang isa ka tawo nga wala nagakaon kag nagapahuway sing maayo. Kon magmasakit sia, mabasol bala niya ang Yawa? Indi, ginaani lamang niya ang malain nga resulta sang iya indi maayo nga ginhimo. (Galacia 6:7) Tuhoy sini, ang hulubaton sa Biblia nagsiling: “Ang kabuangon sang tawo nagapatiko sang iya dalanon.”​—Hulubaton 19:3.

Sa katapusan, dapat naton dumdumon nga madamo sa malain nga mga hitabo ang natabuan lang bangod sang ‘tion kag kahigayonan.’ (Manugwali 9:11) Binagbinaga ang isa ka tawo nga naabtan sing bagyo. Bug-os man sia nga mabasa ukon indi, depende ini kon sa diin sia nahamtang sang nag-ulan. Sing kaanggid, sa sining “makahalanguyos nga mga tion nga mabudlay atubangon,” ang indi maayo nga mga kahimtangan madali lang magresulta sa madamo nga kabudlayan. (2 Timoteo 3:1-5) Ang epekto sini sa aton masami nagadepende sa tion kag kahimtangan nga indi naton kontrolado. Buot bala silingon nga pirme na lang kita makaeksperiensia sang madamo nga kabudlayan?

Ang Tanan nga Kabudlayan Malapit Na Madula

Makalilipay gid kay sa indi madugay dulaon ni Jehova ang tanan nga kabudlayan. (Isaias 25:8; Bugna 1:3; 21:3, 4) Sa karon, ginapakita niya nga nagaulikid sia sa aton paagi sa “pagtudlo” kag ‘paglugpay sa aton paagi sa Kasulatan’ agod malandas naton ang mga pagtilaw samtang ginahulat naton ang isa ka matahom nga palaabuton. (Roma 15:4; 1 Pedro 5:7) Sa sina nga tion, ang mga matarong sa atubangan sang Dios makatigayon sing walay katapusan nga kabuhi sa bag-ong kalibutan nga wala na sing mga kabudlayan.​—Salmo 37:29, 37.

[Nota]

NAMANGKOT KA BALA?

▪ Mga makasasala lang bala ang makaeksperiensia sing kabudlayan?​—Job 1:8.

▪ Ang Yawa bala ang balasulon sang tanan naton nga mga problema?​—Galacia 6:7.

▪ Magapadayon bala ang kabudlayan?​—Bugna 21:3, 4.

[Blurb sa pahina 29]

“Ang tion kag ang kahigayonan nagakahanabu sa ila tanan.”​—Manugwali 9:11