Magdiretso sa kaundan

Magdiretso sa listahan sang kaundan

Pagbantay sa Kalibutan

Pagbantay sa Kalibutan

 Pagbantay sa Kalibutan

Sa Alemanya, 8 porsiento lamang sa populasyon ang nagapati nga isa ka relihioso nga selebrasyon ang bisperas sang Krismas. Sang 1980, nagataas pa ini sing 47 porsiento.​—TV NEWS CHANNEL N24, ALEMANYA.

“Sa una nga tion sa maragtas sang [E.U.], kapin sa isa sa kada 100 ka Amerikano ang yara sa prisuhan . . . Halos 1.6 milyones ang priso sa bug-os nga pungsod.”​—THE NEW YORK TIMES, E.U.A.

Nasapwan sa isa ka pagtuon nga “100% sang gin-eksamin nga mga Espanyol” ang may isa ukon kapin pa nga sahi sang pestisidio sa ila lawas. Ini nga mga pestisidio “ginakilala sa bug-os nga kalibutan nga makahalalit sa panglawas.”​—UNIVERSITY OF GRANADA, ESPANYA.

“Ginapakita sa natigayon nga mga rekord sang mga pungsod, nga ang buhis gikan sa pagbaligya sang tabako 500 ka pilo nga mas mataas sangsa ginagasto agod kontrolon ini.”​—WORLD HEALTH ORGANIZATION, SWITZERLAND.

Mas madamo na ang miembro sang Islam sangsa Romano Katoliko. Sang 2006, 19.2 porsiento sa populasyon sang bug-os nga kalibutan ang miembro sang Islam, kag 17.4 porsiento lamang ang Romano Katoliko.​—REUTERS NEWS SERVICE, BRITANYA.

Ang Borador Nakabulig sa Paglakbay sang Barko

Sa sining tion nga nagamahal ang gatong kag nagadugang ang problema sang polusyon sa palibot, ang mga tag-iya sang barko nagapangita sing paagi agod makakinot sa gatong kag mabuhinan ang ginabuga nga aso. Gani, ginpanginpuslan nila ang hangin. Ang isa ka paagi nga natilawan na nila amo ang paggamit sing borador sa paglakbay sang barko, siling sang pamantalaan nga Frankfurter Allgemeine Zeitung. Ang borador nga ginapalupad sa kataason nga 300 metros ginatulod sang hangin, gani mapahinay sang kapitan ang makina sang barko agod makakinot sa gatong. Sining karon lang, ang 8 por 20 metros nga borador nakabulig sa paglakbay sang isa ka barko nga may mga kargamento patabok sa Atlantiko.

Paglampuwas sa Tigpalamangag

“Ang itlog sang isa ka klase sang langaw nga ginatawag African fly, makalampuwas sa grabe nga tigpalamangag paagi sa pagpakigas sang iya kaugalingon kaangay sang dulse,” siling sang Science News. Kon maubos na ang tubig sa itlog sang langaw nga Polypedilum vanderplanki, nagakigas ini bangod ang nadula nga tubig sa iya mga selula ginabuslan sing elemento nga kaangay sang natunaw kag nagtig-a nga kalamay. Sa sini nga kahimtangan, ang iya panunaw wala na nagapanghikot. Ang itlog makapabilin nga daw nagatulog sing tubtob sa 17 ka tuig. Magabugtaw lang ini kon mag-ulan na liwat.

Ang Pinakamaayo nga Duog Para sa Astronomiya

Isa ka grupo sang mga astronomo ang nagpatindog sing Observatory sa Dome Argus nga mga 4,000 metros sa ibabaw sang nibel sang dagat nga amo ang pinakamataas nga bahin sa Sidlangan nga Antartika. Ini nga duog mga 1,000 kilometros gikan sa South Pole, tuman diri katugnaw kag kon kaisa tuman kadulom. Mamala ang hangin, malinong ang palibot, kag nagalawig sing apat ka bulan ang gab-i sa sini nga duog. Ginasiling nga ang Dome Argus amo ang pinakamaayo nga duog agod matun-an ang mga butang sa kahawaan. Paagi lamang sa teleskopyo, “mahimo na makakuha sing maathag nga mga laragway nga daw kaangay lang nga ginkuha ini sa kahawaan, kag mas barato pa ini sangsa magpadala sing teleskopyo sa kahawaan,” suno kay Lifan Wang, direktor sang Chinese Center for Antarctic Astronomy.