Magdiretso sa kaundan

Magdiretso sa listahan sang kaundan

Isugid Ko Bala ang Akon Abyan?

Isugid Ko Bala ang Akon Abyan?

 Pamangkot sang mga Pamatan-on

Isugid Ko Bala ang Akon Abyan?

“Nabudlayan gid ako, kay miguhay gid kami.”​—James. *

“Nagalalain ako sang primero. Wala na ako ginasapak sang akon mga abyan, kay ginsugid ko sila.”​—Ann.

ANG Biblia nagsiling: “May abyan nga mahirup pa labi sa utud.” (Hulubaton 18:24) May subong ka bala sina nga abyan? Kon may ara, nakatigayon ka sing isa ka maayo gid nga abyan.

Apang, kamusta kon ang imo isa ka Cristianong abyan nakasala? Ibutang ta nga nakahimo sia sing imoralidad, nagpanigarilyo, nagpahubog, nag-drugs, ukon iban pa mabug-at nga mga sala? (1 Corinto 6:9, 10; 1 Timoteo 1:9, 10) Ano ang imo himuon? Hambalon ang imo abyan? Sugiran ang imo mga ginikanan? Sugiran ang iya mga ginikanan? Isugid ini sa mga gulang sang kongregasyon? * Kon manugid ka, ano ang matabo sa inyo pag-abyanay? Mas maayo bala nga maghipos ka na lang?

Isugid Ko Bala Ukon Indi?

Ang tanan makasasala. Ang Biblia nagsiling: “Ang tanan nakasala kag wala makalab-ot sa himaya sang Dios.” (Roma 3:23) Apang, ang pila nakahimo sing mabug-at nga mga sala. Ang iban naman nakahimo sing “sayop nga tikang” nga kon indi matadlong mahimo magresulta sa mas mabug-at nga problema. (Galacia 6:1) Binagbinaga ining isa ka matuodtuod nga halimbawa.

Nahibal-an sang isa ka Cristianong pamatan-on nga si Susan, nga ang Web page sang isa niya ka Cristianong abyan, may sexy nga mga retrato kag binastos nga mga kanta.

Binagbinaga: Ano ang himuon mo kon ikaw si Susan? Isugid mo bala sia? Ukon indi mo na lang sia paghilabtan kay wala ka man sing labot kon ano ang iya ginabutang sa iya Web page? Kon pamangkuton ka ni Susan kon ano ang iya himuon, ano ang isiling mo sa iya?

․․․․․

Ang ginhimo ni Susan: Ginpamensaran sing maayo ni Susan kon ano ang iya himuon, kag nagdesisyon sia nga isugid ini sa mga ginikanan sang iya abyan. “Ginkulbaan gid ako,” siling  niya, “kay suod man ako sa ila. Kabudlay gid manugid sa ila amo nga naghilibion ako.”

Ano sa banta mo? Husto bala ang ginhimo ni Susan? Ukon mas maayo ayhan kon wala na lang sia nanugid?

Makabulig sa imo pagbinagbinag ang masunod nga mga punto:

Ano ang himuon sang isa ka matuod nga abyan? Ang Hulubaton 17:17 nagsiling: “Ang isa ka abyan nagahigugma sa tanan nga tion, kag ang isa ka utod natawo tungud sa kapiotan.” Kon ang isa may nalapas nga mga prinsipio sa Biblia, ini nga tawo yara sa “kapiotan,” nahibaluan man niya ini ukon wala. Samtang nga sayop ang mangin sobra “katarung” paagi sa pagpadaku sa magagmay nga mga butang, wala ginapabulagbulagan sang isa ka matuod nga abyan ang isa ka malain nga buhat. (Manugwali 7:16) May salabton ka sa imo nahibaluan.​—Levitico 5:1.

Paano kon ikaw naman ang ginikanan? Pamangkuta ang imo kaugalingon: ‘Kon isa ako ka ginikanan kag ang Web page sang akon bata may binastos nga mga retrato kag mga kanta, gusto ko bala nga may manugid sini sa akon? Ano ang batyagon ko kon ang abyan sang akon bata nakahibalo sini pero wala niya ako ginsugiran?’

Paano ini ginatamod sang Dios? Indi ini tion sa paghipos. Sa baylo, dapat mo sundon ang mga kasuguan sang Dios suno sa Biblia tuhoy sa kon ano ang maayo kag malain. Ang matuod, kon tindugan mo ang husto, malipay gid ang imo Manunuga. (Hulubaton 27:11) Dugang pa, mangin matawhay ang imo hunahuna, kay ginhimo mo ang para gid sa kaayuhan sang imo abyan.​—Ezequiel 33:8.

“Tion sa Paghambal”

Ang Biblia nagsiling nga may “tion sa paghipos kag tion sa paghambal.” (Manugwali 3:7, NW) Ang mga bata masami nga indi kabalo kon ano ang maayo nga himuon sa pila ka kahimtangan. Kon ang ila abyan may nahimo nga sala, nagarason sila: ‘Indi ko gusto nga akigan sia sang iya mga ginikanan’ ukon ‘Indi ko gusto nga maakig sa akon ang akon abyan.’ Kon amo lang sini ang mga rason, daw maayo nga ‘maghipos’ na lang.

Apang, samtang nagadaku ka, nagabag-o man ang imo pagtan-aw sa mga kahimtangan. Nahibaluan mo nga may problema ang imo abyan kag mahimo nga kinahanglan niya ang bulig mo. Kon amo, ano ang himuon mo kon nabatian mo nga ang imo abyan may ginhimo nga supak sa mga kasuguan kag mga prinsipio sang Biblia?

Una, siguraduha anay kon bala matuod ang imo nabatian. Basi kon tsismis lang ini. (Hulubaton 14:15) Ang isa ka tin-edyer nga si Katie nagsiling: “Ginhimuhimoan ako sing istorya sang isa ko ka abyan, kag abi sang iban nga suod man sa akon matuod ang iya ginsiling. Naglalain gid ako kay basi wala na sing may mapati sa akon!” Ang Biblia nagtagna nga si Jesus indi maghukom “paagi sa sugidsogid lang.” (Isaias 11:3, Maayong Balita nga Biblia) Buot silingon, indi pagpatihi dayon ang tanan mo nga mabatian. Usisaa anay ini sing maayo. Binagbinaga ining isa ka matuodtuod nga halimbawa.

Si James, nga ginsambit sa umpisa sini nga artikulo, may nabatian nga istorya nga ang iya suod nga abyan nag-drugs sa isa ka party.

Binagbinaga: Ano ang himuon mo kon ikaw si James? Paano mo masigurado nga matuod ang imo nabatian?

․․․․․

 Ang ginhimo ni James: Sang primero, wala lang ginsapak ni James ang iya nabatian. “Pero, ginkonsiensia ako,” siling niya. “Kinahanglan ko istoryahon ang akon abyan parte sa akon nabatian.”

Ano sa banta mo? Kon nabatian mo nga may nahimo nga sayop ang imo abyan, ngaa mas maayo nga istoryahon mo anay sia?

․․․․․

Kon nabudlayan ka gid makighambal sa imo abyan tuhoy sa imo nabatian, ano pa ang puede mo himuon?

․․․․․

Gin-ako sang abyan ni James nga nag-drugs gid man sia sa isa ka party. Apang, nakitluoy sia kay James nga indi lang ini pag-isugid sa iban. Luyag ni James nga himuon ang husto. Kag luyag niya nga amo man sini ang himuon sang iya abyan. Gani, ginsilingan niya ang iya abyan nga hatagan niya ini sing isa ka semana agod makighambal sa mga gulang sa kongregasyon. Kon indi niya ini paghimuon, si James mismo ang manugid sa mga gulang.

Sa banta mo, husto bala ang ginhimo ni James? Ngaa?

․․․․․

Wala nakighambal sa mga gulang ang abyan ni James, gani sia na mismo ang nanugid sa mga gulang. Sang ulihi, narealisar sang iya abyan ang iya sayop. Ginpahangop sa iya sang mga gulang nga kinahanglan sia maghinulsol agod mangin maayo liwat ang iya kaangtanan kay Jehova.

‘Si Sugidsugid’ Ka Bala?

Mahimo mamangkot ka: “Mangin ‘si sugidsugid’ bala ako kon isugid ko ang akon abyan? Indi ayhan mas mahapos kon indi ko na lang pagsapakon ang akon nabatian?” Kon matabo ini sa imo, ano ang himuon mo?

Una, dumduma nga sa masami mahapos himuon ang mga butang nga wala nagadala sing kaayuhan, kag ang mga butang nga nagadala sing kaayuhan mabudlay himuon. Nagakinahanglan sing kaisog nga isugid ang sayop sang imo abyan. Ipangamuyo ini sa Dios. Pangabaya sia nga hatagan ikaw sing kaalam kag kaisog. Makasalig ka nga buligan ka niya.​—Filipos 4:6.

Ikaduha, hunahunaa ang kaayuhan para sa imo abyan kon isugid mo ang problema. Sa pag-ilustrar, ibutang ta nga nagalakat kamo sang imo abyan sa kilid sang pil-as, sang nadalin-as sia kag nahulog sa ubos. Kinahanglan mo gid nga buligan ang imo abyan. Pero, nahuya sia nga mahibaluan sang iban ang natabo, amo nga nagsiling sia nga sia na lang matinguha nga makasaka? Pabay-an mo lang bala sia nga ibutang sa katalagman ang iya kabuhi?

Kaangay man sini kon ang imo abyan makadalin-as sa Cristianong dalanon. Mahimo maghunahuna sia nga indi niya kinahanglan ang bulig. Pero, sayop gid ina nga panghunahuna. Natural lang nga mahuya sia sa iya ginhimo. Apang, kon manugid ka, mahimo mo maluwas ang iya kabuhi!​—Santiago 5:15.

Gani, indi mahadlok nga magpanugid kon ang imo abyan nakahimo sing sayop. Paagi sa pagpangayo sing bulig, ginapakita mo ang pagkamainunungon kay Jehova nga Dios kag sa imo abyan. Sa pila ka adlaw, mahimo nga magapasalamat pa sia bangod nanugid ka.

Ang dugang pa nga mga artikulo sa serye sang “Young People Ask” masapwan sa Web site nga www.watchtower.org/​ype

[Mga nota]

^ par. 3 Gin-islan ang mga ngalan sa sini nga artikulo.

^ par. 6 Sa mga Saksi ni Jehova, ang mga gulang amo ang nagabulig sa mga nakahimo sing mabug-at nga sala agod mapasag-uli ang ila kaangtanan sa Dios.​—Santiago 5:14-16.

BINAGBINAGA INI

▪ Ngaa pamatuod sang imo pagkamainunungon sa imo abyan kon isugid mo ang iya nahimo nga sayop?

▪ Sin-o nga mga karakter sa Biblia ang gintilawan sa ila pagkamainunungon sa ila abyan? Ano ang matun-an mo sa ila?

[Retrato sa pahina 20]

Kon ang imo abyan nakadalin-as sa Cristianong dalanon, kinahanglan nga buligan mo gid sia