Magdiretso sa kaundan

Magdiretso sa listahan sang kaundan

Gikan sa Amon mga Bumalasa

Gikan sa Amon mga Bumalasa

 Gikan sa Amon mga Bumalasa

Indi Na Ulipon sang Alkohol (Mayo 2007) Nanamian ako magbasa sang inyo magasin kon dal-an ako sini sang mga Saksi. Mas makapalig-on ini sangsa makapasubo nga mga balita sa TV kag pamantalaan. Indi ako alkoholiko, apang ang pila sa miembro sang amon pamilya kag pila ka abyan may problema sa sini. Ang lalaki sa artikulo nagsiling nga sa sulod lang sang tatlo ka bulan, nauntatan niya ang pag-inom. Nahimo niya ini sa tapos sang malawig nga pag-antos sa problema sa alkohol. Bisan pa ginadayaw ko sia, masiling ko nga daw indi mapatihan ang iya halimbawa, kag sa banta ko makapaluya lang ini sa mga luyag mag-untat sa sini nga bisyo. Natural lang para sa sini nga sahi sang mga alkoholiko nga madamo nga beses nga magbalik sa ila bisyo, bisan pa ginatinguhaan gid nila nga mag-untat.

G. A., Estados Unidos

Sabat sang “Magmata!”: Wala namon ginapahangop nga mahapos lang untatan ang pag-abuso sa alkohol. Matuod gid man nga may mga tion nga ang mga nagatinguha nga mag-untat, nagabalik sa ila bisyo kag mahimo maluyahan sing buot. Bisan pa gani ang mga gulpi nag-untat sa pag-inom kag wala na nagainom karon, dapat gid maghalong agod nga indi na sila magbalik liwat sa ila bisyo. Gani, subong sang ginsambit sa artikulo, ang isa ka ‘ulipon anay sang alkohol’ nga napulo na ka tuig nga wala nagainom, nagsiling: “Madamo ang wala makahibalo sang daku ko nga panikasog nga untatan ini kag mahimo magbalik ang akon bisyo sa isa lang ka tagay. Ang handum sa pag-inom yara pa gihapon. Nagakinahanglan sing hanuot nga pangamuyo kag determinasyon nga mangindi.” Paagi sa pangamuyo kag pagsalig sa Dios, madamo ang nakapanginpadlos sa pagkaulipon sa alkohol.​—Salmo 55:22.

Masaligan Mo Bala ang Biblia? (Nobiembre 2007) Dose anyos ako kag luyag ko magpasalamat sa sining pinasahi nga gua sang Magmata! Makawiwili kag makatudlo gid ini. Nanamian gid ako sang pahina 7 nga nagatudlo tuhoy sa paghisantuanay sang Biblia. Ginbinagbinag sini ang pila ka artikulo nga bag-o sa akon. Nalangkag na ako nga mabaton ang masunod nga pinasahi nga gua.

D. F., Estados Unidos

Hunahunaa Luyag ko magpasalamat para sa bag-o nga pormat sang Magmata! Daku gid ang nabulig sa akon sang mga pamangkot sa katapusan sang pila ka artikulo. Nakabulig ini agod madumduman kag mapamalandungan ko ang akon nabasa. Bangod sa kasakuon sang kabuhi karon, indi na naton matalupangdan kon kaisa ang importante kag makapalig-on nga mga punto sa aton ginabasa.

M.A.S., Brazil

Kamatayon Gid Bala ang Katapusan? (Disiembre 2007) Mga anom ka bulan pa lang nga napatay ang akon iloy sa isa ka aksidente. Sang nabasa ko ini nga artikulo, nalugpayan kag napabakod gid ang akon paglaum nga makita ko sia liwat sa pagkabanhaw. Madamo gid nga salamat.

L.L.R., Brazil

Pamangkot sang mga Pamatan-on . . . Ngaa Dapat Mo Sundon ang Talaksan sang Biblia? (Nobiembre 2007) Abi ko basta indi lang ako maghimo sing imoralidad, wala sing malain sa pagdeyt. Apang, sang ulihi indi na ako kontento sa pagdeyt lang kag ginahandum ko na ang imoral nga mga buhat. Madamo gid nga salamat nga inyo ginpaathag ining panudlo sang Biblia sa paagi nga mahapos mahangpan sang mga pamatan-on nga kulang sa eksperiensia.

E. F., Japan