Magdiretso sa kaundan

Magdiretso sa listahan sang kaundan

Kay Sin-o Nasandig ang Palaabuton sang Duta?

Kay Sin-o Nasandig ang Palaabuton sang Duta?

 Kay Sin-o Nasandig ang Palaabuton sang Duta?

“ANG pag-init sang globo amo ang labing daku nga problema nga dapat atubangon sang tawo,” siling sang Oktubre 2007 nga gua sang National Geographic. Suno sa ginsambit nga magasin, agod malubad ini nga problema kinahanglan nga “determinado kita kag maghulag gilayon​—kag ipakita naton ang pagkaresponsable nga talagsa lang naton ginapakita subong katilingban ukon grupo.”

Mangin responsable ayhan ang tawo sa paglubad sini? Madamo sing balagbag agod mahimo ini: pagpatumbaya sang tawo, pagkasakon, kakulang sing ihibalo, pag-una sa kaugalingon nga kaayuhan, sobra nga paghimakas agod magtin-ad sa nagauswag nga mga pungsod, kag ang panimuot sang minilyon nga indi luyag bag-uhon ang ila magasto sa enerhiya nga estilo sang pagkabuhi.

Ginsambit sang una sang isa ka manalagna sang Dios ang matuod naton nga ikasarang sa paglubad sa aton mga problema sa pamatasan, pagpakig-angot sa iban, kag pagdumalahan. Nagsulat sia: “Ang dalanon sang tawo wala sa iya kaugalingon, wala sa tawo nga nagalakat sa pagmando sang iya mga tikang.” (Jeremias 10:23) Ginapamatud-an ini sang masubo nga maragtas sang tawo. Bisan talalupangdon karon ang pag-uswag sa siensia kag teknolohiya, nagkomplikado man ang aton ginaatubang nga katalagman nga wala gid naton anay mahunahuna. Gani, daw ano kita ka sigurado nga mangin masanag ang palaabuton?

Madamo na nga paghinun-anon kag mga tikang ang ginhimo agod malubad ang problema sa pagbag-o sang klima kag iban pa nga makatalagam nga mga hitabo. Apang diutay lang ang nahimo. Ang isa ka halimbawa amo ang natabo sang 2007 sa Northwest Passage. Bangod sang padayon nga pagkatunaw sang yelo didto, ano ang ginhimo sang mga pungsod sang puede na ini maagyan sa una nga tion? Ang isa ka editoryal sa New Scientist nga magasin nagsabat: “Nagpaunauna sila sa pag-angkon sa makadtuan na nga mga bahin sang dagat agod makamina sila sing dugang nga langis kag gas.”

Halos 2,000 ka tuig na ang nagligad, ang Biblia sibu nga nagtagna tuhoy sa tion nga ang mga tawo ‘magalaglag sang duta.’ (Bugna 11:18) Maathag nga kinahanglan sang kalibutan indi lamang ang isa ka lider nga may kaalam kag gahom sa paglab-ot sang mga tulumuron kundi mga sakop man nga magatuman sa iya. Mahimo bala ini sang isa ka sinsero kag maalam nga pulitiko ukon sientipiko? Ang Biblia nagasabat: “Dili kamo magsalig sa mga principe, ukon sa anak sang tawo, nga sa iya wala sing bulig.”​—Salmo 146:3.

 Ang Palaabuton sang Duta​—Yara sa Maayo nga mga Kamot!

Isa lamang ka Lider ang makalubad sa mga problema sang kalibutan sing madinalag-on. Tuhoy sa iya, ang Biblia nagtagna: “Magadolog sa iya ang Espiritu sang GINOO, ang espiritu sang kaalam kag paghangup, ang espiritu sang laygay kag kusug, ang espiritu sang ihibalo kag sang kahadluk sa GINOO . . . Magahukom sia nga may pagkamatarung sang mga imol, . . . kag patyon niya ang malauton sang gininhawa sang iya mga bibig.”​—Isaias 11:2-5.

Sin-o ini Sia? Wala sing iban kundi si Jesucristo, nga mahigugmaon nga naghatag sang iya kabuhi para sa aton. (Juan 3:16) Subong gamhanan nga espiritu nga tinuga, ginhatagan sang Dios si Jesus sing gahom kag awtoridad nga maggahom sa bug-os nga duta.​—Daniel 7:13, 14; Bugna 11:15.

Lakip sa mga kwalipikasyon ni Jesus amo ang iya tuman kasangkad nga ihibalo tuhoy sa mga tinuga sang Dios, nga natigayon niya antes sia nagpanaug diri sa duta. Ang matuod, sang gintuga sang Dios ang uniberso sang nagligad nga tuman ka lawig nga tion, si Jesus amo ang iya “pangolo nga manugpangabudlay.” (Hulubaton 8:22-31) Hunahunaa ini: si Jesus, ang isa nga nagbulig sa pagtuga sa duta kag sa tanan nga buhi nga butang, amo ang magapanguna sa pagkay-o sa halit nga tuga sang kabuangan sang tawo.

Sin-o ang pagagamhan ni Jesus? Amo ang mapainubuson kag matarong nga mga tawo nga nakakilala sa matuod nga Dios, nga si Jehova, kag nagatuman kay Jesucristo subong Manuggahom. (Salmo 37:11, 29; 2 Tesalonica 1:7, 8) Si Jesus nagsiling nga ini nga mga tawo ‘magapanubli sang duta,’ nga pagahimuon nga paraiso.​—Mateo 5:5; Isaias 11:6-9; Lucas 23:43.

Ano ang himuon mo agod matigayon mo ang katumanan sang mga saad sa Biblia? Si Jesus mismo nagsiling: “Ini nagakahulugan sang kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.”​—Juan 17:3.

Huo, ang aton planeta daw yara sa katalagman, apang pat-od nga magapadayon ini subong puluy-an sang tawo. Sa pihak nga bahin, ang yara sa katalagman amo ang mga wala nagapabalor sa mga tinuga sang Dios kag wala nagatuman kay Jesucristo. Gani, ginapalig-on ka sang mga Saksi ni Jehova nga magkuha sing ihibalo nga nagadul-ong sa kabuhi nga walay katapusan.

[Kahon sa pahina 8]

INDI MASARANGAN SANG SIENSIA

Bisan pa nga nahibaluan nila ang katalagman, minilyon gihapon ang nagahalit sa ila hunahuna kag lawas paagi sa sobra nga pag-inom, pagpanigarilyo, kag paggamit sing droga subong kalingawan. Wala nila ginatamod ang kabuhi subong sagrado nga regalo halin sa Dios. (Salmo 36:9; 2 Corinto 7:1) Makapasubo nga pareho man sini ang pagtamod sang mga tawo sa duta, amo nga nagalala pa gid ang halit sa aton palibot.

Kon amo, ano ang solusyon? Malubad bala ini sang siensia kag sekular nga edukasyon? Indi. Nagakatabo ini nga problema bangod ang pagtamod sang tawo sa duta indi suno sa pagtamod ni Jehova nga Dios. Gani, kinahanglan nga dugangan sang mga tawo ang ila ihibalo tuhoy sa Dios. Nagaugyon ang Biblia sa sini. Nagasaad ini nga maabot ang tion nga ang mga tawo ‘indi [na] maghalit ukon maglaglag’ sang duta bangod ‘matugub ini sang pagkilala sa GINOO subong nga ang mga tubig nagatabon sang dagat.’​—Isaias 11:9.

[Retrato sa pahina 8, 9]

Sa idalom sang paggahom ni Cristo, magapakigbahin ang mga matarong sa paghimo sa duta nga bug-os kalibutan nga paraiso