Magdiretso sa kaundan

Magdiretso sa listahan sang kaundan

Gikan sa Amon mga Bumalasa

Gikan sa Amon mga Bumalasa

 Gikan sa Amon mga Bumalasa

Ano ang Palaabuton sang Cristianismo? (Pebrero 2007) Madamo sa inyo ginsiling ang suno gid sa Pulong sang Dios, kag nagaugyon ako sa inyo. Apang, may duha ka butang sa inyo magasin nga indi ako komporme. Ang isa amo nga ginapakanubo ninyo ang iban nga Cristianong relihion, kag ang isa pa daw ginapakataas ninyo ang inyo relihion sangsa iban. Maayo kuntani kon tanan kita mag-ugyon sa isa lang ka pagtuluuhan, apang indi amo sina ang nagakatabo. Para sa akon, wala sing relihion nga labaw sangsa iban.

S. S., Estados Unidos

Sabat sang “Magmata!”: Ang mga Saksi ni Jehova indi batok sa mga tawo nga may tuhay nga relihion. Wala kami nagasiling nga mas maayo kami sangsa iban. Ginabaton namon nga ang “tanan nakasala kag wala makalab-ot sa himaya sang Dios.” (Roma 3:23) Bangod sini, ginagamit namon ang amon tion kag kuarta sa pagbisita sa mga katawhan agod isugid sa ila ang kamatuoran sa Biblia, lakip ang matahom nga paglaum nga ginaunod sini. Apang, kaangay sa ginhimo ni Jesus kag sang iya mga disipulo nga maisog nga nagbuyagyag sang pagkasalimpapaw kag sayop nga mga pagpati, amo man sina ang ginahimo sang mga Saksi ni Jehova.

Ano ang Imo Sabat? Sang una, ini nga bahin talagsa lang namon mahinun-anunan sang akon duha ka anak. Sa karon nakita ko nga mapuslanon gid ini nga bahin agod mapatudok ang kamatuoran sang Biblia sa tagipusuon sang akon mga anak. Kag nakabulig man ini nga maglig-on ang akon pagtuo.

I. H., Czech Republic

Daku gid ang akon pasalamat sa sining makawiwili nga bahin, kay maayo gid ini gamiton sa personal nga pagtuon. Ang tanan nga topiko ginhunahuna gid sing maayo, bisan ang pinakagamay nga detalye! Bangod sini, nagsuod pa gid ako sa akon maalam nga Amay, si Jehova.

A. S., Rusya

“Jehova, Palihug Tuguti Ako nga Alagaron Ka” (Hulyo 2007) Napalig-on gid ang akon pagtuo kay Jehova sang nabasa ko ang sugilanon sang kabuhi ni Danielle Hall. Bisan bata pa, wala sia nahuya magsugid sa tanan nga tawo sa iya eskwelahan nga isa sia ka Saksi ni Jehova. Napat-od ko nga amo man sini ang himuon sang madamo nga Saksi nga estudyante.

A. R., Madagascar

Nuebe anyos ako. Bag-o lang namon natapos basa ni nanay ang eksperiensia ni Danielle. Narealisar ko nga dapat ako magpasalamat nga ang akon mga ginikanan yara sa kamatuoran kag indi na mabudlay para sa akon nga alagaron si Jehova. Nanamian ko gid ang punto nga “bisan diin man kita, si Jehova malapit sa aton.” Naapresyar ko man nga kon magpauli si Danielle halin sa eskwelahan, nagapungko sia sa iya hiligdaan kag nagasugid kay Jehova sang tanan nga natabo sa iya sa sina nga adlaw, nga daw tatay gid niya si Jehova. Luyag ko makatuon gikan sa sini!

A. D., Italya

“Pamangkot sang mga Pamatan-on . . . Ngaa daw Pirme lang Ako Ginabalewala?” (Hulyo 2007) Maayo gid ini nga artikulo kay daw ginsulat ini para sa akon. Nawili man ako sa mga pamangkot nga masabtan ko. Salamat kay daku gid ang nabulig sini sa akon.

C. A., Canada