Magdiretso sa kaundan

Magdiretso sa listahan sang kaundan

“Ano Na ang Natabo sa Akon Bata?”

“Ano Na ang Natabo sa Akon Bata?”

 “Ano Na ang Natabo sa Akon Bata?”

Nakibot gid sanday Scott kag Sandra * sang nagsulod sa salas ang ila 15-anyos nga dalagita. Ang bukay sini nga buhok nagpula na! Mas makapakibot pa gid amo ang ila pagbayluhanay sing mga tinaga.

“Ginpasugtan ka bala namon nga magpalugom?”

“Ti, wala man kamo naghambal nga indi puede.”

“Ngaa wala ka anay naglisensia?”

“Kay bal-an ko man nga indi kamo magpasugot!”

MAGAUGYON gid si Scott kag si Sandra nga ang pagkatin-edyer isa ka magamo nga tion, indi lamang sa mga pamatan-on kundi pati man sa ila mga ginikanan. Sa pagkamatuod, madamo nga ginikanan ang indi gid handa sa pag-atubang sa hinali nga pagbag-o sang ila mga kabataan sa tion sang ila paghinupang. “Gulpi lang nagbag-o ang amon bata nga babayi,” hinumdom ni Barbara, isa ka iloy sa Canada. “Nabalaka ako basi, ‘Ano na ang natabo sa akon bata?’ Daw subong bala nga samtang nagakatulog kami ginbayluhan sia sang iban nga bata!”

Indi lamang si Barbara ang nakaeksperiensia sini. Talupangda ang ginsugid sa Magmata! sang mga ginikanan sa bug-os nga kalibutan.

“Sang nagtin-edyer na sia, nagpalarason na ang amon bata nga lalaki kag daw ginahangkat na niya ang amon awtoridad.”​—Lia, taga-Britanya.

“Ang amon mga bata nga babayi nangin mabinalak-on na sa ila kaugalingon, ilabi na gid sa ila hitsura kag panglawason.”​—John, taga-Ghana.

“Luyag sang bata ko nga lalaki nga magdesisyon sa iya lamang kaugalingon. Indi na niya luyag hambalan kon ano ang dapat niya himuon.”​—Celine, taga-Brazil.

“Nasaw-ahan na ang amon bata nga babayi nga hakson namon ukon halukan.”​—Andrew, taga-Canada.

“Nagpalabais na ang amon mga bata nga lalaki. Sa baylo nga magpasakop sa amon mga desisyon, ginakwestyon pa nila ini.”​—Steve, taga-Australia.

“Ginahinago sang amon bata nga babayi ang iya balatyagon. May yara sia kaugalingon nga kalibutan, kag kon entrahan ko gani, nainit sia.”​—Joanne, taga-Mexico.

“Mahuyugon magtago sing sekreto ang amon mga bata kag luyag nila nga magsilahanon lang. Mas gusto pa nila mag-upod sa ila mga abyan sangsa amon.”​—Daniel, taga-Pilipinas.

Subong ginikanan sang isa ka tin-edyer, mahimo nga ang imo kahimtangan pareho sang pila nga ginsambit sa ibabaw. Kon amo, saligi nga may makabulig sa imo nga hangpon inang “tuhay” nga persona sa inyo balay, ang imo tin-edyer nga bata. Makabulig ang Biblia sa sining bahin. Paano?

Kaalam kag Paghangop

Ang isa ka hulubaton sa Biblia nagasiling: “Kuha sing kaalam, kuha sing paghangup.” (Hulubaton 4:5) Importante gid ining duha ka kinaiya sa pagpakig-angot sa isa ka tin-edyer. Nagakinahanglan ka sing paghangop agod indi lamang pamatasan ang imo makita kundi mahantop mo man kon ano ang ginahunahuna sang imo bata. Nagakinahanglan ka man sing kaalam agod magiyahan mo ang imo tin-edyer  nga anak nga mangin isa ka responsable nga adulto sa palaabuton.

Indi ka dapat magpensar nga indi ka na kinahanglan sang imo bata bangod daw naglas-ay na sia sa imo. Ang matuod, kinahanglan sang mga tin-edyer, kag luyag pa gani nila sang atension sang ila mga ginikanan sa sining makahalangkat nga tion sang ila kabuhi. Paano makabulig sa imo ang paghangop kag kaalam agod matuytuyan mo ang imo anak?

[Nota]

^ par. 2 Gin-islan ang mga ngalan sa sining serye.