Magdiretso sa kaundan

Magdiretso sa listahan sang kaundan

Ano Bala ang Ginapaabot sang Dios sa Imo?

Ano Bala ang Ginapaabot sang Dios sa Imo?

 Ang Pagtamod sang Biblia

Ano Bala ang Ginapaabot sang Dios sa Imo?

SA SINING masako nga panahon, madamo ang ginapaabot sa aton. Kon kaisa, kabudlay gid tumanon sang tanan naton nga obligasyon. Apang, dapat naton dumdumon nga ang kabuhi isa ka regalo gikan sa Dios. (Salmo 36:9) Daw ano bala kadamo nga tion kag kusog ang ginapaabot sang Dios nga ihatag naton sa iya? Ang makatarunganon nga sabat sang Biblia makapalig-on gid.

Si Jesus amo ang labi nga nakahibalo kon ano ang ginapaabot sang Amay sa mga tawo. (Mateo 11:27) Sang ginpamangkot sia kon ano ang pinakadaku nga sugo, si Jesus nagsiling: “Higugmaon mo si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna kag sa bug-os mo nga kusog.” (Marcos 12:30) Ano ang buot silingon sina? Indi bala ina sobra nga pangabay?

Kon Ano ang Nadalahig sa Bug-os Tagipusuon nga Gugma sa Dios

Ang aton gugma sa Dios nagatubo samtang ginapamalandungan naton ang wala tupong nga kaayo nga ginapakita niya sa aton. Kon ang aton gugma bug-os kalag, ihatag naton sa Dios ang pinakamaayo nga mahatag naton. Mabatyagan naton ang ginbatyag sang manunulat sang Biblia nga namangkot: “Ano bala ang ihatag ko sa GINOO tungud sa tanan niya nga kaayohan ayon sa akon?” (Salmo 116:12) Kon amo sina ang aton gugma sa Dios, paano naton dapat gamiton ang aton tion?

Ang Biblia wala nagapatuman sing espesipiko nga kadamuon sang oras nga dapat naton itigana para sa pagsimba kada semana. Apang, ginapakita sini kon ano nga mga hilikuton ang dapat naton unahon sa aton kabuhi kag ginapaathag sini kon ngaa. Halimbawa, gintudlo ni Jesus nga ang pagkuha sing ihibalo tuhoy sa Dios importante gid nga tikang padulong sa “kabuhi nga walay katapusan.” (Juan 17:3) Nagsiling man sia nga dapat buligan sang iya mga sumulunod ang mga wala nakakilala sa Dios nga magtigayon sing kabuhi paagi sa pagsugid sang ihibalo sang Dios sa ila. (Mateo 28:19, 20) Ginatudluan kita sang Biblia nga makig-upod sing regular sa mga masigkatumuluo agod mangin mabakod kita sa espirituwal kag magpalig-unanay. (Hebreo 10:24, 25) Ini tanan nga hilikuton nagakinahanglan sing tion.

Ginapaabot bala sang Dios nga mangin panatiko kita, nga wala na sing iban nga ginahimo kundi ang magsimba lamang sa iya? Indi gid man! May mga hilikuton kita sa matag-adlaw nga dapat man atipanon. Ginasugo sang Biblia ang mga ulo sang pamilya nga iaman ang mga kinahanglanon sang ila pamilya: “Kon sin-o man ang wala nagaaman para sa mga natungod sa iya, kag ilabi na para sa mga katapo sang iya panimalay, . . . malain pa [sia] sa tawo nga wala sing pagtuo.”​—1 Timoteo 5:8.

Gintuga sang Dios ang tawo nga magkalipay sa kabuhi. Busa, nagakaigo lamang nga maghinguyang kita sing tion upod sa aton pamilya kag mga abyan kag magkalipay sa maayo nga pagkaon kag nagakaigo nga kalingawan. Si Hari Solomon nagsulat:  “Nahibaloan ko nga wala na sing maayo pa sa ila sang sa magkalipay kag maghimo sing maayo tubtub nga nagakabuhi sila; kag nga ang tagsa ka tawo man magkaon kag mag-inum, kag magpangalipay sing kaayohan sa bug-os niya nga kinabudlayan nga amo ang hatag sang Dios.”​—Manugwali 3:12, 13.

Nahangpan man ni Jehova nga Dios ang mga limitasyon sang tawo, “nagadumdum sia nga kita yab-ok.” (Salmo 103:14) Ginakilala sang Biblia nga kinahanglan man naton ang bastante nga pahuway. Pagkatapos sang isa ka masako nga pagpanghikot, gin-agda ni Jesus ang iya mga disipulo nga magkadto sa “isa ka duog nga baw-ing nga [silahanon] lang kag magpahuwayhuway.”​—Marcos 6:31.

Busa ang kabuhi nga kalahamut-an sa Dios, balanse kag nagalakip sing madamo nga nanuhaytuhay nga hilikuton. Apang, ang tanan naton nga hilikuton, direkta man nga naangot sa aton pagsimba ukon indi, dapat nagapadayag sang aton bug-os kalag nga gugma sa Dios. Ang Biblia nagalaygay nga, “nagakaon man kamo ukon nagainom ukon nagahimo sang bisan ano nga butang, himua ang tanan nga butang para sa kahimayaan sang Dios.”​—1 Corinto 10:31.

Magpahamtang sing mga Tulumuron

Nagabatyag ka bala nga ang pag-una sa kabuhi sang pagsimba sa Dios indi realistiko kag daw indi mo masarangan? Matuod nga ang paghatag sa Dios sang iya ginapaabot nagakinahanglan sing mga pagpasibu, kag mga pagsakripisyo pa gani sang aton tion. Apang pat-od gid nga indi magapaabot ang aton Manunuga sang butang nga indi gid naton masarangan. Sa katunayan, ginahatagan niya kita sing madamo nga bulig agod matuman naton ang iya kabubut-on. Magamadinalag-on kita kon magsandig kita sa “kusog nga ginahatag sang Dios.”​—1 Pedro 4:11.

Mahimo ka makabatyag sing pila ka kabudlayan sa pagpasibu sang imo iskedyul samtang ginadugangan mo ini sing espirituwal nga mga hilikuton. Maghinguyang sing tion sa pagpakigsugilanon pirme sa “nagapamati sang pangamuyo,” si Jehova nga Dios. (Salmo 65:2) Mapabutyag mo sa pangamuyo ang bisan ano nga butang nga ginakabalak-an mo bangod ‘nagaulikid sia sa imo.’ (1 Pedro 5:7) Si Hari David nangamuyo: “Tudloi ako sa paghimo sang imo kabubut-on, kay ikaw amo ang akon Dios!” (Salmo 143:10) Sarang mo man mapangabay ang Dios nga buligan ka sa paghimo sing nagakaigo nga mga pagpasibu sa imo kabuhi.

Ang Biblia nagaunod sining mainit nga pangagda: “Magpalapit kamo sa Dios, kag magapalapit sia sa inyo.” (Santiago 4:8) Kon masugdan mo na nga makigbahin sa mga hilikuton nga nagapahamuot sa Dios, subong sang pagtuon sa Biblia kag pagtambong sa Cristianong mga miting, labi ka pa nga magasuod sa Dios. Nian, sia magapabakod sa imo nga magpadayon sa pag-uswag.

Si Jelena, nga nagatuon sang Biblia upod sa mga Saksi ni Jehova, nagsugid tuhoy sa iya mga panikasog nga pasibuon ang iya mga prioridad: “Indi ini mahapos para sa akon.” Apang nagdugang sia: “Sang nagsugod na ako sa pagtambong sa Cristianong mga miting, nakatigayon ako sing kusog nga sundon ang ginasiling sang Biblia. Nakabulig man sa akon ang padayon nga pagsakdag sang iban.” Sa tion nga makita mo ang mga benepisyo sang pagsimba sa Dios, labi ka pa gid nga mapahulag nga mangin matutom. (Efeso 6:10) Nagsiling si Jelena, “Napauswag ko ang akon kaangtanan sa akon bana kag ang paagi sang akon pagdisiplina sa akon mga anak.”

Walay sapayan sang mga pag-ipit sang pagkabuhi sa karon, sarang ka mapabakod kag mapahulag sang gamhanan nga espiritu ni Jehova nga usisaon kon ano ang ginauna mo sa imo kabuhi kag ‘baklon ang nagakaigo nga tion’ sa pag-alagad sa Dios. (Efeso 3:16; 5:15-17) Si Jesus nagsiling, “ang mga butang nga imposible sa tawo posible sa Dios.”​—Lucas 18:27.

NAMANGKOT KA BALA?

▪ Ngaa dapat mo unahon sa imo kabuhi ang paghimo sang kabubut-on sang Dios?​—Salmo 116:12; Marcos 12:30.

▪ Ano nga mga hilikuton ang ginapaabot sang Dios nga pakigbahinan mo?​—Mateo 28:19, 20; Juan 17:3; Hebreo 10:24, 25.

▪ Paano mo madinalag-on nga mapasibu ang imo mga prioridad agod mapahamut-an ang Dios?​—Efeso 5:15-17; Santiago 4:8.

[Retrato sa pahina 20]

Ang pagpahamuot sa Dios nagakinahanglan sing pagkabalanse