Magdiretso sa kaundan

Magdiretso sa listahan sang kaundan

Ang Katapusan nga mga Adlaw—Sang Ano?

Ang Katapusan nga mga Adlaw—Sang Ano?

 Ang Katapusan nga mga Adlaw—Sang Ano?

ANO ang hunahunaon mo kon may magsiling sa imo nga, “Nagakabuhi na kita sa katapusan nga mga adlaw.” Ano gid bala ang buot silingon sini?

Ang mga tinaga nga “katapusan nga mga adlaw” kag “tion sang katapusan” madugay na nga ginapaathag sa Biblia. (2 Timoteo 3:1; Daniel 12:4) Ginhatagan sing palanan-awon si manalagna Daniel kapin na sa 2,500 ka tuig ang nagligad tuhoy sa magaabot nga mga kagamhanan sa kalibutan kag sang mga kinagamo nga magaluntad sa tunga nila tubtob sa “tion sang katapusan.” Ginsilingan sia nga ang kahulugan sining mga palanan-awon mangin maathag sa “tion sang katapusan.” (Daniel 8:17, 19; 11:35, 40; 12:9) Nagsulat man si Daniel: “Sa mga adlaw sadto nga mga hari magapatindug ang Dios sang langit sing ginharian nga dili gid malaglag, ukon ang pagbulut-an sini ibilin sa iban nga katawohan. Kondi dugmokon sini kag papason ini tanan nga ginharian kag ini magapadayon sa gihapon.”​—Daniel 2:44.

Ginpatuhuyan ni Jesucristo “ang katapusan” sang ginsabat niya ang pamangkot tuhoy sa “tanda sang [iya] presensia kag sang katapusan sang sistema sang mga butang.” (Mateo 24:3-42) Mahimo gid nga ginpatuhuyan ni Daniel kag ni Jesus ang katapusan nga magadul-ong sing daku nga pagbag-o para sa mga tawo karon kag sa mga napatay na. Nagsulat si Daniel tuhoy sa katapusan sang tanan nga paggobierno sa duta. Nagpamulong si Jesus tuhoy sa “katapusan sang sistema sang mga butang.”

Dapat ka bala mangin interesado sa kahulugan sang katapusan nga mga adlaw? Huo, bangod nadalahig sa sini ang tanan nga katawhan. Apang, madamo ang wala nagasapak sa sini. Ang Biblia nagtagna: “Sa katapusan nga mga adlaw ang mga mayubiton magaabot nga may pagyubit, nga ginapasundan ang ila mga kailigbon kag nagasiling: ‘Diin na ining ginsaad nga presensia niya? Sugod sang nagtulog sa kamatayon ang aton mga katigulangan, ang tanan nga butang nagapadayon nga amo gid gihapon kutob sa ginsuguran sang pagpanuga.’” (2 Pedro 3:3, 4) Huo, ang pila sa karon nagabatyag nga ginasulit lang ang mga hitabo sang una kag ang kabuhi padayon nga amo man sa gihapon.

May pamatuod bala nga nagakabuhi na gid kita sa ginasiling sang Biblia nga katapusan nga mga adlaw? Tan-awon naton.