Magdiretso sa kaundan

Magdiretso sa listahan sang kaundan

Nahisuno Bala sa Biblia ang Disparatis?

Nahisuno Bala sa Biblia ang Disparatis?

 Ang Pagtamod sang Biblia

Nahisuno Bala sa Biblia ang Disparatis?

MAY dyurnalista nga isa ka tuig nga wala nagsakaysakay sa eroplano kay siling sang manugpakot mapatay sia sa aksidente sa eroplano. Ang halos tanan nga tawo, lakip ang mga pulitiko, negosyante, artista, atleta, kag mga estudyante sa kolehiyo, nagapati sa disparatis. Kon ginabudlayan sila, nagakabalaka, ukon indi makahibalo sang ila himuon, nagapati sila nga ang disparatis makaamlig ukon makabulig sa ila agod matuman ang ila mga plano.

Ang mga disparatis ginakabig sang mga tawo nga tradisyon lamang kag pamatyag nila wala kuno sing may malain nga matabo sa ila kon patihan nila ini. Ang anhing antropologo nga si Margaret Mead nagsiling: “Ginapakita sang disparatis nga luyag gid naton nga matabo ang aton ginalauman ukon mapunggan ang malain nga mga butang. Bisan daw indi gid man bug-os ang aton pagpati sa disparatis, ginasunod naton ini kay indi naton gusto nga may malain nga matabo sa aton.” Sa gihapon, dapat pamangkuton sang mga luyag magpahamuot sa Dios ang ila kaugalingon, ‘Dapat bala magpati sa disparatis ang matuod nga mga Cristiano?’

Ang Ginhalinan sang Disparatis

Ang mga tawo madamo sing ginakahadlukan. Nahadlok sila sa kamatayon, sa palaabuton, sa ginatawag nga Pihak nga Kinabuhi, kag madamo pa. Luyag gid sang manugpamatok sa Dios nga si Satanas nga ulipunon ang mga tawo, amo nga nagapahito sia sing kabutigan agod mahadlok ang mga tawo. (Juan 8:44; Bugna 12:9) Indi lang si Satanas ang nagahandum nga mapahilayo sa Dios  ang mga tawo. Sa Biblia ginatawag si Satanas nga “manuggahom sang mga demonyo.” (Mateo 12:24-27) Sin-o ang mga demonyo? Sang panahon ni Noe, madamo nga anghel ang nagbuylog kay Satanas sa pagrebelde sa Dios kag nangin mga demonyo sila. Sugod sadto, ginatinguhaan gid nila nga impluwensiahan ang hunahuna sang mga tawo. Ang isa nila ka paagi amo ang disparatis.​—Genesis 6:1, 2; Lucas 8:2, 30; Judas 6.

Ang isa sa mga kabutigan ni Satanas amo ang ginhalinan sang disparatis. Amo ini ang pagpati nga kon mapatay ang tawo, may di-makita nga elemento nga nagabulag sa iya lawas nga padayon nga nagakabuhi kag nagabalik ini agod impluwensiahan ang mga buhi. Apang ang Biblia nagasiling: “Ang patay wala makahibalo sang bisan ano.” Nagsiling pa gid ini nga “walay buluhaton ukon pahito ukon ihibalo ukon kaalam” kon mapatay ang tawo.​—Manugwali 9:5, 10.

Butang nga Kangil-aran kay Jehova

Madamo ang nagpati sa mga kabutigan ni Satanas. Apang sang una, ginhatagan sang Dios ang iya katawhan nga Israel sing maathag nga sugo tuhoy sa disparatis. Ang iya Pulong nagsiling: “Manginwalay makita sa imo nga . . . bisan sin-o nga nagagamit sing pagpamakot, ang manuglagpat, ukon manugbabaylan, ukon diwatahan, ukon manugtiwtiw, ukon manugpagowa sa mga espiritu, ukon salamangkero, ukon manugpamakot sa mga napatay. Kay ang bisan sin-o nga nagahimo sining mga butang kangil-aran sa GINOO.”​—Deuteronomio 18:10-12.

Apang masubo kay pirme ginsupak sang mga Israelinhon ini nga paandam. Halimbawa, sang panahon sang manalagna nga si Isaias, ang iban nagapati nga dapat maghalad sa dios sang “Kapalaran” agod mangin maayo ang ila patubas. Isa ini ka disparatis nga nagpalain sa ila nadangatan, kay wala na sila ginkahamut-an kag ginbugayan ni Jehova.​—Isaias 65:11, 12.

Sang magsugod na ang Cristianismo, wala nagbag-o ang pagtamod ni Jehova sa disparatis. Ginpalig-on ni Pablo ang mga tawo sa siudad sang Listra nga nagapati sa disparatis nga ‘magliso gikan sa sining wala pulos nga mga butang [“disparatis,” The Emphatic Diaglott] pakadto sa buhi nga Dios, nga naghimo sang langit kag duta kag dagat kag sang tanan nga yara sa sini.’​—Binuhatan 14:15.

Pagpanginpadlos sa Disparatis

Tuman kadamo sang disparatis, pero tanan ini indi mapaathag kag wala sing basihan. Malain ang epekto sang disparatis, kay sa baylo nga batunon ang resulta sang ila mga ginahimo, ginabasol sang mga tawo ang ila kapalaran bangod sang malain nga mga hitabo.

Makalilipay nga madamo ang nakapanginpadlos sa disparatis. Si Jesus nagsiling: “Mahibaluan ninyo ang kamatuoran, kag ang kamatuoran magahilway sa inyo.” (Juan 8:32) Ang manugpamakot sa sulod sang 25 ka tuig nga taga-Brazil nga si Clementina, nagsiling: “Ang pagpamakot amo lamang ang akon palangabuhian. Apang, ang kamatuoran sa Biblia naghilway sa akon gikan sa sini.” Sa pagkamatuod, ang regular nga pagtuon sa Biblia kag tudok nga pangamuyo kay Jehova nga Dios makabulig gid sa aton nga mangin mabakod. Makabulig ini sa aton nga mangin kalmado kag realistiko, gani makahimo kita sing maayo nga mga desisyon nga magapahilayo sa aton sa disgrasya kag magapahaganhagan sang kabalaka.​—Filipos 4:6, 7, 13.

Ang Biblia nagpamangkot: “Ano ang pag-ambitanay sang kapawa kag kadudulman? Dugang pa, ano ang paghisantuanay ni Cristo kag ni Belial [Satanas]?” Gani, dapat likawan sang matuod nga mga Cristiano ang disparatis.​—2 Corinto 6:14-16.

NAMANGKOT KA BALA?

▪ Sa baylo nga magsalig sa Dios, ano ang ginsaligan sang mga Israelinhon nga nagapati sa disparatis sang panahon ni Isaias?​—Isaias 65:11, 12.

▪ Ano ang ginpalig-on ni apostol Pablo sa mga taga-Listra nga nagapati sa disparatis?​—Binuhatan 14:15.

▪ Dapat bala magpati sa disparatis ang matuod nga mga Cristiano?​—2 Corinto 6:14-16.

[Mga retrato sa pahina 10]

Ginapapati sang disparatis ang mga tawo nga wala sing may malain nga matabo sa ila kon sundon nila ini