Magdiretso sa kaundan

Magdiretso sa listahan sang kaundan

Kon Paano Makita ang Matuod nga Relihion

Kon Paano Makita ang Matuod nga Relihion

 Kon Paano Makita ang Matuod nga Relihion

‘Kon may kamatuoran gid man gikan sa Dios, ngaa pangitaon ko pa ini?’ pamangkot sang iban. ‘Kon ang Dios may importante nga mensahe para sa tanan nga tawo, indi bala dapat nga ipaalinton niya ini sing maathag, agod madali ini mahangpan sang mga tawo, kag indi na kinahanglan nga usisaon pa?’

PAT-OD gid nga masarangan ina sang Dios. Apang, amo bala sini ang iya paagi sa pagpaalinton sang kamatuoran?

Kon Paano Ginapaalinton sang Dios ang Kamatuoran

Ginapaalinton sang Dios ang iya mensahe sa paagi nga makita ini sang mga tawo nga sinsero nga nagapangita sing kamatuoran. (Salmo 14:2) Binagbinaga ang mensahe nga ginpadala sang Dios paagi sa iya manalagna sang una nga si Jeremias. Para ini sa rebelyuso nga katawhan sang Dios, kag tuhoy ini sa nagahilapit nga kalaglagan sang Jerusalem sa kamot sang mga Babilonianhon.​—Jeremias 25:8-11; 52:12-14.

Apang, may kadungan man si Jeremias nga nagapanagna sing mensahe nga gikan kuno sa Dios. Si Hananias nagpanagna tuhoy sa paghidait sa Jerusalem. Baliskad gid ini sa tagna ni Jeremias. Gani, sin-o ang patihan sang mga tawo, si Jeremias bala ukon ang iban nga manalagna nga nagapamatok sa iya?​—Jeremias 23:16, 17; 28:1, 2, 10-17.

Agod mahibaluan nila kon sin-o ang husto, dapat kilalahon gid sang sinsero nga mga Judiyo si Jehova. Dapat nila mahangpan ang iya mga kasuguan kag mga prinsipio, subong man ang iya pagtamod sa sayop nga mga buhat. Kon himuon nila ini, magaugyon sila sa ginsiling sang Dios paagi kay Jeremias nga “wala sing tawo nga nagahinulsul sang iya pagkamalaut.” (Jeremias 8:5-7) Dugang pa, mahantop nila nga kon wala sing nagahinulsol, may malain nga matabo sa Jerusalem kag sa pumuluyo sini.​—Deuteronomio 28:15-68; Jeremias 52:4-14.

Natuman ang mga tagna ni Jeremias tuhoy sa Jerusalem. Ini nga siudad ginlaglag sang mga Babilonianhon sang 607 B.C.E.

Madugay na gintagna ang silot sa ila pagkamalinapason, apang kinahanglan nga mahangpan nila nga nag-abot na ang tion nga laglagon sila sang Dios.

Ang Kamatuoran nga Ginbantala ni Cristo

Kamusta naman ang kamatuoran nga ginbantala ni Jesucristo? Ginkilala bala sang tanan nga amo ini ang mensahe gikan sang Dios? Wala. Bisan pa nga ato gid mismo si Jesus nga nagapanudlo kag nagahimo sing mga milagro sa tunga sang katawhan sang Israel, wala mahantop sang kalabanan nga nagpamati sa iya nga sia ang ginsaad nga Mesias ukon ang Cristo.

Sang namangkot ang mga Fariseo kon san-o maabot ang Ginharian sang Dios, si Jesus nagsiling: “Ang ginharian sang Dios indi mag-abot nga madali matalupangdan.” Nagdugang pa sia: “Ang ginharian sang Dios yara sa tunga ninyo.” (Lucas 17:20, 21) Ang gintangdo sang Dios nga  Manuggahom nga si Jesus, kaupod nila! Apang wala ginkilala sang mga Fariseo ang ebidensia nga ginatuman ni Jesus ang mga tagna tuhoy sa Mesias kag wala man nila sia ginbaton subong “ang Cristo, ang Anak sang buhi nga Dios.”​—Mateo 16:16.

Pareho man sini ang reaksion sang mga tawo sa kamatuoran nga ginbantala sang mga disipulo ni Cristo sang unang siglo. Bisan pa nakabulig ang mga milagro agod mapamatud-an nga ginasakdag sila sang Dios, wala gihapon makita sang kalabanan ang kamatuoran. (Binuhatan 8:1-8; 9:32-41) Ginsugo ni Jesus ang iya mga sumulunod nga “maghimo sang mga disipulo” paagi sa pagtudlo sa ila. Bangod nagpamati sila kag nagtuon sang kamatuoran gikan sa Kasulatan, ang mga sinsero nga nagapangita sing kamatuoran nangin mga tumuluo.​—Mateo 28:19; Binuhatan 5:42; 17:2-4, 32-34.

Amo man sa karon. Ang “maayong balita sang ginharian” ginabantala sa “bug-os napuy-an nga duta subong panaksi sa tanan nga pungsod.” (Mateo 24:14) Wala ini ginahimo nga “madali matalupangdan,” amo nga indi ini makilala dayon sang tanan nga tawo subong mensahe nga halin sa Dios. Apang, makilala gid ang kamatuoran gikan sa Dios kag mahangpan ini sang sinsero nga mga tawo nga maluyag magsimba sa paagi nga nahamut-an sang Dios.​—Juan 10:4, 27.

Ayhan nagapangita ka man sing kamatuoran, kay ginabasa mo ini nga magasin tuhoy sa Biblia. Paano mo mahibaluan kon ano nga relihion ang nagapanudlo sini?

Ang Epektibo nga Pamaagi

Sang unang siglo, gindayaw ni apostol Pablo ang ginhimo sang pila ka taga-Berea sang nabatian nila ang panudlo niya. Wala sila dayon nagpati nga kamatuoran ang ginsiling ni Pablo, apang nagpamati gihapon sila sing maayo. May matun-an kita sa ginhimo sang mga taga-Berea sang nabatian nila ang mensahe.

Tan-awa ang paathag sang Biblia: “Karon mas maayo ang panghunahuna sang [mga taga-Berea] sangsa mga taga-Tesalonica, kay nalangkag gid sila sa pagbaton sa pulong, nga ginausisa sing maayo ang Kasulatan sa adlaw-adlaw kon bala matuod gid ini nga mga butang. Busa madamo sa ila ang nangin mga tumuluo.” (Binuhatan 17:10-12) Gani, indi lamang hapaw ang ila pagpangusisa. Nahibaluan nila nga indi nila dayon mahangpan ang kamatuoran sa isa ukon duha ka malip-ot nga pagpakigsugilanon kay Pablo.

Talupangda man nga “nalangkag gid [ang mga taga-Berea] sa pagbaton sa pulong.” May matun-an kita sa ila pamaagi sa pagtuon sa Kasulatan. Wala nila ginpatihan dayon ang tanan nga ginsiling ni Pablo, apang wala man nila ini ginsikway. Wala nila ginmulay ang mga panudlo ni Pablo, nga isa sa mga manugpaalinton sang mensahe gikan sa Dios.

Binagbinaga man ini: Amo ini ang  una nga tion nga nabatian sang mga taga-Berea ang tuhoy Cristo. Nanamian gid sila sa ila nabatian, pero daw nabudlayan sila nga patihan ini. Apang sa baylo nga sikwayon ini dayon, gin-usisa nila sing maayo ang Kasulatan, kag gintan-aw kon bala ‘matuod gid ang mga ginasiling ni Pablo.’ Talupangda man nga ang mga taga-Berea kag taga-Tesalonica nga nangusisa sing maayo nangin mga tumuluo. (Binuhatan 17:4, 12) Wala sila nag-untat ukon nagsiling nga indi nila makita ang kamatuoran. Nakilala nila ang matuod nga relihion.

Ano ang Epekto sang Kamatuoran sa mga Tawo?

Kon makita sang isa ang kamatuoran kaangay sang mga taga-Berea, mapahulag man sia nga isugid ini sa iban. Apang, mahimo may mga tawo nga indi luyag nga magsugid sini sa iban, kay ginatamod nila nga basi matuod man ang iban nga relihion. Pero, kon makita na sang isa ang kamatuoran sa Biblia, mangin kumbinsido na sia sini. Indi na sia magduhaduha kon bala may kamatuoran gid man ukon kon ang tanan nga relihion maluwas. Apang, agod makita ang kamatuoran dapat ini usisaon sing maid-id, kag gani kinahanglanon ang pagkamapainubuson.

Subong sini ang ginahimo sang mga Saksi ni Jehova. Amo kon ngaa nagapati sila nga nakita na nila ang matuod nga relihion. Kag ginaagda ka nila nga usisaon man ang Biblia agod makilala mo ang mga yara sa matuod nga relihion karon. Kapin pa ini sa pagbinagbinag lamang sang pila ka punto, kag bilang panugod, mabuligan ka sang impormasyon tuhoy sa mga Cristiano sang una nga siglo nga makita sa kahon sa sini nga pahina.

Paagi sa pagbaton sang wala bayad nga pagtuon sa Biblia sa imo puluy-an, mausisa mo sing maid-id kon ano gid ang ginatudlo sang Biblia. Kon himuon mo ini, makilala mo ang matuod nga relihion.

[Kahon sa pahina 9]

Mga Palatandaan sang Matuod nga Relihion

Binagbinaga ang pagsimba kag panudlo sang mga Cristiano sang una nga siglo:

Nagapatuytoy sila sa Pulong sang Dios.​—2 Timoteo 3:16; 2 Pedro 1:21.

Ginatudlo nila nga si Jesus Anak sang Dios. Tuhay sia nga persona kag indi tupong sa Dios.​—1 Corinto 11:3; 1 Pedro 1:3.

Ginatudlo nila nga ang mga patay pagabanhawon sa palaabuton.​—Binuhatan 24:15.

Kilala sila bangod sang ila gugma sa isa kag isa.​—Juan 13:34, 35.

Wala sila nagasimba sing kinaugalingon kundi naorganisar sa nahiusa nga mga kongregasyon nga ginadumalahan sang mga manugtatap kag hubon sang hamtong nga mga lalaki nga nagakilala kay Jesus subong ila Ulo.​—Binuhatan 14:21-23; 15:1-31; Efeso 1:22; 1 Timoteo 3:1-13.

Ginabantala nila sing makugi nga ang Ginharian sang Dios lamang ang paglaum sang katawhan.​—Mateo 24:14; 28:19, 20; Binuhatan 1:8.

[Retrato sa pahina 7]

Paano mahibaluan sang mga tawo nga si Jeremias ang matuod nga manalagna kay ginapamatukan sia sang iban nga manalagna?

[Mga retrato sa pahina 8, 9]

Ang mga taga-Berea sang una nga siglo nagpamati kay Pablo, kag gin-usisa nila dayon ang Kasulatan agod pat-uron kon bala matuod ang iya ginasiling

[Retrato sa pahina 8, 9]

Mabuligan ka nga makita ang matuod nga relihion kon tun-an mo sing maid-id ang Biblia